கரோனா நேரத்தில் பணியாற்றிவரும் மருத்துவர்களுக்கு ஊதியத்தை குறைப்பதும், ஊதியம் வழங்காமலும் இழுத்தடிப்பதும், சில மாநிலங்களில் உள்ளது. ஆகையால் இந்தப் பிரச்னைகளுக்கு தீர்வுகாண மருத்துவர் ஒருவர் உச்ச நீதிமன்றத்தில் மனு ஒன்றை தாக்கல் செய்தார்.
இந்த மனுவை நீதிபதிகள் அசோக் பூஷன், எஸ்.கே.கவுல், எம்.ஆர். ஷா ஆகியோர் அடங்கிய அமர்வு விசாரித்தனர்.
அப்போது, “போர்க்களத்தில், போர்புரியும் பாதுகாப்புப் படை வீரர்களை எப்படி அந்த நாடு வஞ்சிக்காதோ அதைபோல், கரோனா காலத்தில் மக்களின் உயிர்களைப் போராடி காப்பாற்றிவரும் மருத்துவர்களுக்கு அளிக்கும் ஊதியத்தில் அதிருப்தியை ஏற்படுத்தாமல் அரசு இருக்க வேண்டும்” என நீதிபதிகள் கருத்து தெரிவித்தனர்.
மேலும், மருத்துவர்கள் 14 நாள்கள் தனிமைப்படுத்துவது குறித்து மத்திய அரசு கொண்டுவந்த புதிய கரோனா வழிமுறைகளுக்கு எதிராக, அருஷி ஜெயின் என்பவர் பிரமாணப் பத்திரம் ஒன்றையும் தாக்கல் செய்திருந்தார்.
அதனையும் இந்த வழக்கோடு ஏற்று விசாரித்த நீதிபதிகள், "மத்திய அரசின் புதிய கரோனா வழிமுறைகளில், 14 நாள்கள் பணியிலிருந்த மருத்துவர்களுக்கு தொற்றின் அறிகுறி இருந்தால் மட்டும்தான் தனிமைப்படுத்தப்பட வேண்டும் என்று தெரிவிக்கப்பட்டதற்கு மருத்துவர்கள் தரப்பில் எதிர்ப்புத் தெரிவித்துள்ளனர்" எனக் கூறினர்.
இதையடுத்து மத்திய அரசு சார்பாக ஆஜரான வழக்கறிஞர் துஷார் மேத்தா, "மத்திய அரசு கூறிய கரோனா வழிமுறைகளை அடுத்து மருத்துவர்களிடம் வேறேதும் சிறந்த ஆலோசனைகள் இருந்தால் அதனை அரசு செயல்படுத்தும்" என்றார்.
மேலும் நீதிபதிகளுக்கு பதில் அளிக்கும் விதமாக மத்திய சுகாதாரத்துறை அமைச்சகம் சார்பில் தாக்கல் செய்த அறிக்கையில், “மருத்துவர்கள் தரப்பில் ஆதாரமற்ற தகவல்களை முன்வைப்பதாக கூறப்பட்டது. மேலும் மருத்துவர்கள் பாதுகாப்பிற்காக அளிக்கப்பட்ட மருத்துவ உபகரணங்கள் கிட் குறித்தும் மேலும் கரோனாவால் பாதிக்கப்படுவோரின் எண்ணிக்கை அதிகரிப்பதால் கரோனா நோயாளிகளுக்கு கூடுதல் தற்காலிக மருத்துவனைகள் ஏற்பாடு செய்யப்பட உள்ளது' என அதில் தெரிவிக்கப்பட்டது.
அதைத் தொடர்ந்து நீதிபதி கூறுகையில், "பல மாநிலங்களில் ஊதியம் குறைவினால் மருத்துவர்கள் போராட்டங்களில் ஈடுபடுவதை செய்திகள் வாயிலாகவும் தெரியவருகிறது.
ஆகையால் மத்திய அரசு உடனடியாக மருத்துவர்களின் ஊதிய பிரச்னைகளில் கவனம் செலுத்த வேண்டும் எனக் கூறி இந்த வழக்கை வரும் ஜுன் 17ஆம் தேதிக்கு ஒத்திவைத்தனர்.
இதையும் படிங்க: ஆன்லைன் மது விற்பனை: தமிழ்நாடு அரசுக்கு உச்ச நீதிமன்றம் உத்தரவு
