அண்ணல் காந்தியின் 150ஆவது பிறந்தநாளை இந்தியா இன்று வெகு விமரிசையாக கொண்டாடி வருகிறது. நவீன இந்தியாவுக்கு சிறகு முளைத்து எங்கோ பறந்துகொண்டிருக்கிறது எனக் கூறிவரும் நிலையில், சாதியப் பாகுபாடுகளும், பட்டியலின மக்களை ஒதுக்கி வைப்பதும் நாளுக்குநாள் அதிகரித்துக்கொண்டே இருக்கிறது. ஒடிசா மாநிலம் கஞ்சம் மாவட்டத்தில் உள்ளது கோபாபூர் கிராமம். அந்த கிராமத்தில் திங்கள் கிழமையன்று, 6 பட்டியலினப் பெண்களை மலம் உண்ண வைத்து கட்டாயப்படுத்தியுள்ளனர். இந்த சம்பவம் நாடு முழுவதும் பெரும்அதிர்வலைகளை ஏற்படுத்தியுள்ளது.
கஞ்சன் கிராமத்தில் மூன்று பேர் திடீரென நோய்வாய்ப்பட்டு உயிரிழந்துள்ளனர். இந்த உயிரிழப்புக்குக் காராணம் தெரியாத கிராம மக்கள், ஜோசியம் பார்க்கும் ஒருவரிடம் ஏன் என குறி கேட்டதற்கு, கிராமத்திற்கு சூனியம் வைக்கப்பட்டுள்ளதாக அவர் கூறியுள்ளார். இதனால் கோபமடைந்த உயர் சாதி எனத் தன்னைச் சொல்லிக்கொள்ளும் மக்கள், ஜோகி தாஸ், நாம் நாகக், ஹரி நாகக், ஜோகேந்திர நாகக், கூரியா நாகக் உள்ளிட்ட 6 பட்டியலினப் பெண்களை ஒரு அறையில் வைத்து கட்டி வைத்து அடித்துள்ளனர். அவர்களை அடித்ததோடு மட்டுமல்லாமல், மனித மலத்தை கட்டாயப்படுத்தி உண்ண வைத்துள்ளனர்.
இந்த சம்பவம் வெளியே தெரிய வந்ததையடுத்து தாசில்தார் சித்ரஞ்சன் மஹந்தா மற்றும் காவல்துறையினர் பாதிக்கப்பட்டவர்களை சந்திக்க சென்றுள்ளனர். ஆனால் அதனை அனுமதிக்காத உயர்சாதி கிராம மக்கள், அரசு அலுவலர்கள் மீது கற்களை வீசியும், மிளகாய்ப் பொடி தூவியும் தாக்கியுள்ளனர்.
இதையடுத்து அரசு அலுவலர்களும், காவல்துறையினரும் இணைந்து பெண்கள் உட்பட இந்தத் தாக்குதலில் ஈடுபட்ட 30க்கும் மேற்பட்டோரை கைது செய்துள்ளனர். மேலும் பாதிக்கப்பட்டவர்கள் மருத்துவமனையில் சிகிச்சை பெற்று வரும் நிலையில், அந்த கிராமத்தில் அசம்பாவிதங்கள் நடைபெறாமல் தடுக்க காவலர்கள் குவிக்கப்பட்டுள்ளனர்.
இதையும் படிக்கலாமே: நாற்காலியில் அமர்ந்தது குற்றமா? தீண்டாமைக்கு பலியான தலித் இளைஞர்!
