கோவிட்- 19 தொற்று நாளுக்கு நாள் அதிகரித்த வண்ணம் உள்ள நிலையில், நீதிமன்றங்களில் கோவிட்- 19 பரவலைத் தடுப்பது குறித்து தலைமை நீதிபதி எஸ்.ஏ. பாப்டே, நீதிபதிகள், வழக்குரைஞர் சங்கங்கள் மற்றும் மருத்துவர்களுடன் ஆலோசனை நடத்தினார். அப்போது, கைதிகள் அதிகமுள்ள சிறைகளில் கோவிட்-19 வைரஸ் தாக்குதல் ஏற்பட்டால், அது பெரிய எண்ணிக்கையில் சிறைக்கைதிகளைப் பாதிக்கும் என்றும் மற்றவர்களுக்கு வைரஸ் தொற்று பரவும் எனவும் தெரிவித்திருந்தார்.
துணை அட்டர்னி ஜெனரல் துஷார் மேத்தா, திகார் போன்ற கைதிகள் அதிகம் உள்ள சிறைச்சாலைகளில் கோவிட்-19 பரவுவதைத் தடுக்க முன்னெச்சரிக்கை நடவடிக்கைகள் எடுக்கப்பட்டுள்ளன. கைதிகள் யாருக்கேனும் கோவிட்-19 தொற்று இருப்பதற்கான அறிகுறிகள் தென்பட்டால் அவர்கள் தனிமைப்படுத்தப்பட்டு கோவிட்-19 சோதனை நடத்தப்படும் என்று தெரிவித்தார்.
இதனையடுத்து, கொரோனா பரவுதலைத் தடுப்பதற்கு எவ்வித நடவடிக்கைகள் சிறைச்சாலைகளில் எடுக்கப்பட்டுள்ளன என்பது குறித்து அறிக்கை தாக்கல் செய்ய வேண்டும் என்று உச்ச நீதிமன்றம், சிறைத்துறையின் தலைவர்கள், அனைத்து மாநில மற்றும் யூனியன் பிரதேசங்களில் உள்ள சமூக நலத்துறையின் தலைவர்கள், அனைத்து தலைமை செயலர்கள் ஆகியோருக்கு நோட்டீஸ் அனுப்பியுள்ளது.
இதையும் படிங்க: 'ம.பி., யில் உடனடியாக நம்பிக்கை வாக்கெடுப்பு நடத்த வேண்டும்' - உச்ச நீதிமன்றத்தில் பாஜக மனு
