நாட்டின் 74ஆவது சுதந்திர தினம் நாடு முழுவதும் கொண்டாடப்பட்டுவருகிறது. இதனை முன்னிட்டு, குடியரசுத் தலைவர் ராம்நாத் கோவிந்த் தேசிய போர் நினைவிடத்திற்கு சென்று மரியாதை செலுத்தினார். முப்படைகளின் தலைமை தளபதி பிபின் ராவத், ராணுவ தளபதி முகுந்த் நரவனே, கடற்படை தளபதி கரம்பிர் சிங், விமானப்படை தளபதி ஆர்.கே.எஸ். பதாரியா ஆகியோர் குடியரசுத் தலைவரை வரவேற்றனர்.
சுதந்திரத்திற்கு பிறகு, ராணுவ வீரர்கள் செய்த தியாகத்தை போற்றும் வகையில் தேசிய போர் நினைவிடம் கட்டப்பட்டது. இதை, கடந்தாண்டு பிப்ரவரி மாதம் பிரதமர் மோடி திறந்து வைத்தார். முன்னதாக, நாட்டு மக்களிடையே உரையாற்றிய குடியரசுத் தலைவர் ராம்நாத் கோவிந்த், அமைதியான வாழ்வின் மீது நம்பிக்கை கொண்டிருப்பதாகவும் ஆக்கிரமிப்பு முயற்சிகள் எது நடந்தாலும் தகுந்த பதிலடி தரும் திறனும் நமக்கு இருப்பதாகவும் அவர் தெரிவித்தார்.
சுதந்திர தினத்தை முன்னிட்டு, டெல்லியில் உள்ள செங்கோட்டையில் பிரதமர் மோடி மூவர்ண கொடியை ஏற்றினார். கடந்த காலத்தை ஒப்பிடுகையில், 20 விழுக்காடு விவிஐபிக்கள் மட்டுமே இந்தாண்டு செங்கோட்டையில் நடைபெற்ற சுதந்திர தின விழாவில் கலந்து கொண்டனர். விழாவில் தகுந்த இடைவெளி உள்ளிட்ட வழிகாட்டுதல்கள் கடைபிடிக்கப்பட்டன.
இதையும் படிங்க: 'ஆப்டிகல் பைபர் மூலம் கிராமங்கள் இணைக்கப்படும்' பிரதமர் அறிவிப்பு!
