குடியரசுத் தலைவராக ராம்நாத் கோவிந்த் பொறுப்பேற்று நேற்றுடன் (ஜூலை 25) மூன்று ஆண்டுகள் நிறைவடைந்துள்ளன. இந்த காலக்கட்டத்தில் அவர் மத்திய அரசின் 48 மசோதாக்கள், மாநில அரசின் 22 மசோதாக்கள் என 70 மசோதாக்களில் கையெழுத்திட்டுள்ளார். அதில் குடியுரிமை திருத்தச் சட்டம், ஜம்மு காஷ்மீர் சிறப்பு அந்தஸ்து நீக்கம் உள்ளிட்டவைகளும் அடங்கும்.
இதுதவிர 13 கட்டளைகளும் குடியரசுத் தலைவரால் அறிவிக்கப்பட்டுள்ளன. கடந்த மூன்று ஆண்டுகளில் ராம்நாத் கோவிந்த் தினம்தோறும் ராணுவ வீரர்கள், விஞ்ஞானிகள் மற்றும் விவசாயிகள் என 20 பேரை சந்தித்துவருகிறார். அந்த வகையில் இதுவரை 6991 பேரை சந்தித்துள்ளார். உள்நாட்டில் 21 முறை பயணம் செய்துள்ளார்.
அதில், முதல் ஐந்து மாநிலங்கள் மகாராஷ்டிரா (3), ஜார்க்கண்ட் (2), மேற்கு வங்காளம் (2), உத்தரப் பிரதேசம் (2), கர்நாடகா (2) ஆகியவை ஆகும். குடியரசுத் தலைவருக்கு அழைப்பிதழ்கள் அனுப்ப பிரத்யேகமாக மின்னஞ்சல் முகவரி ஒன்றை ராம்நாத் கோவிந்த் தொடங்கினார். அந்த மின்னஞ்சல் 2019-20ஆம் ஆண்டுகளில் பரபரப்பாக நிரம்பி வழிந்தது.
ராம்நாத் கோவிந்த் 2019ஆம் ஆண்டு ஜூலை முதல் 2020ஆம் ஆண்டு ஜூலை முதல் ஒன்பது வெளிநாட்டு குடியரசுத் தலைவர்களுடனும், 15 உலகத் தலைவர்களுடனும், 5 உயர் தூதர்களுடனும் ஆலோசனை நடத்தியுள்ளார். இவருக்கு 28 நாடுகளின் தூதர்கள் வெவ்வேறு விழாக்களில் நற்சான்றிதழ்களை வழங்கியுள்ளனர்.
