புதுச்சேரி மாநிலம், காரைக்கால் மாவட்டம் சுரக்குடியைச் சேர்ந்த ஓட்டுநர் ஒருவருக்கு கரோனா வைரஸ் தொற்று ஏற்பட்டதைத் தொடர்ந்து, காரைக்கால் மாவட்டத்தில் முதல் கரோனா தொற்று இருப்பது தெரியவந்தது.
இந்நிலையில் கும்பகோணம் காய்கறி மார்க்கெட்டில் வேலை பார்த்த ஒருவருக்கு கரோனா வைரஸ் தொற்று ஏற்பட்டதையடுத்து, அங்கிருந்து காரைக்கால் நேரு மார்க்கெட்டில் காய்கறி மற்றும் அத்தியாவசிய பொருள்கள் ஏற்றி வருவதால் அங்குள்ள வியாபாரிகளுக்கும், தொழிலாளர்களுக்கும் வைரஸ் தொற்று ஏற்பட்டிருக்கலாம் என்ற அச்சம் அம்மாவட்ட மக்களிடையே எழுந்துள்ளது.
இதையடுத்து இன்று கும்பகோணத்திலிருந்து காரைக்காலுக்கு காய், கனிகளை ஏற்றிவந்து விற்பனை செய்யும் வியாபாரிகள், லாரி ஓட்டுனர்கள் மற்றும் அத்தியாவசிய பொருள்களை ஏற்றி, இறக்கும் தொழிலாளர்கள் என 100க்கும் மேற்பட்டோருக்கு, காரைக்கால் அரசு மருத்துவமனையில் கரோனா வைரஸ் தொற்று பரிசோதனை மேற்கொள்ளப்பட்டுள்ளது. இதனால் காரைக்கால் மாவட்டத்தில் கரோனா வைரஸ் தொற்று எண்ணிக்கை அதிகரிக்கக் கூடுமோ என்ற அச்சம் மக்களிடையே எழுந்துள்ளது.
இதையும் படிங்க: காரைக்காலில் கரோனா ஊடுருவல் - ஒருவர் பாதிப்பு
