டெல்லி: லிபியாவில், கடந்த மாதம் கடத்தப்பட்ட ஏழு இந்தியர்களை மீட்பதற்கான முயற்சிகளை தீவிரமாக மேற்கொண்டு வருவதாக வெளியுறவுத் துறை அமைச்சகம் தெரிவித்துள்ளது. இந்த வாரம் நடைபெற்ற செய்தியாளர் சந்திப்பின்போது பேசிய வெளியுறவுத் துறையின் செய்தித்தொடர்பாளர் அனுராக் ஸ்ரீவஸ்தாவா, "லிபியா அரசாங்கத்துடன் தொடர்ச்சியாகப் பேசி அனைத்து சாத்தியமான முயற்சிகளையும் நாங்கள் எடுத்து வருகிறோம்.
கடத்தப்பட்டவர்களை சிறையிலிருந்து விடுதலை செய்ய முயற்சித்து வருகிறோம். லிபியாவில் உள்ள இந்தியத் தூதரகம், இந்த ஏழு பேரையும் மீட்பதற்கு லிபியா அரசாங்கம், பன்னாட்டு அமைப்புகள் ஆகியவற்றை அணுகியுள்ளது. கடத்தப்பட்டவர்களின் குடும்பத்தினருடன் நாங்கள் தொடர்பில் இருக்கிறோம்" என்றார்.
ஆந்திரா, பீகார், குஜராத், உத்தரப் பிரதேசத்தைச் சேர்ந்த இந்த ஏழு பேரும் லிபியாவிலுள்ள அஸ்வேரிஃப் என்ற இடத்திலிருந்து செப்டம்பர் 14ஆம் தேதி கடத்தப்பட்டனர். இவர்கள் அனைவரும் அங்குள்ள எண்ணெய் நிறுவனங்களில் பணிபுரிந்து வந்தவர்கள்.
எண்ணெய் வளங்கள் மிகுந்த லிபியாவில், 2011ஆம் ஆண்டு கடாஃபியின் ஆட்சி கவிழ்ந்ததற்குப் பின், அங்கு பெரிய அளவில் வன்முறை நடைபெற்று வருகிறது. லிபிய அரசுடன் சண்டையிட்டு வரும் ஐஎஸ் பயங்கரவாத அமைப்பு 2017ஆம் ஆண்டு வாக்கில் லிபியாவின் பெரும்பாலான கடற்கரை நகரங்களை தங்கள் கட்டுப்பாட்டுக்குள் கொண்டு வந்தது. ஆனால், தற்போது, அவ்வியக்கத்தின் கட்டுப்பாட்டில் பாலைவனப்பகுதிகளே உள்ளன.
லிபியாவில் பாதுகாப்பு இல்லாததால், அங்கு இந்தியர்கள் செல்ல வேண்டாம் என்று மத்திய அரசு கடந்த 2015ஆம் ஆண்டு எச்சரிக்கை விடுத்திருந்தது. அதைத் தொடர்ந்து, 2016ஆம் ஆண்டு கட்டாயம் லிபியாவுக்கு இந்தியர்கள் செல்லக்கூடாது என மத்திய அரசு விதித்த தடை இன்றும் தொடர்கிறது.
இதையும் படிங்க: ராம்விலாஸ் பஸ்வான் உடலுக்கு தலைவர்கள் அஞ்சலி...!
