கேரள தங்கக் கடத்தல் விவகாரத்தில் தேசிய புலனாய்வு முகமையால் முக்கியக் குற்றவாளியாக அடையாளம் காணப்பட்டுள்ள ஸ்வப்னா சுரேஷ் மீது, சுங்கத்துறை அலுவலர்கள் புதிய வழக்கைப் பதிந்துள்ளனர். ஸ்வப்னா சுரேஷ் தனது அடையாள அட்டையை முறைகேடாகப் பயன்படுத்தி, ஐக்கிய அமீரகத்தில் உள்ள தூதரகத்திலிருந்து சட்டவிரோத பணப்பரிவரத்தனை மேற்கொண்டதாகக் கூறி இந்த வழக்கைப் பதிவுசெய்துள்ளனர்.
முன்னதாக, கேரளாவுக்குத் தங்கம் கடத்தியதாகக் குற்றஞ்சாட்டி தேசிய புலனாய்வு முகமை, அமலாக்கத்துறை, சுங்கத்துறை ஆகியவை ஸ்வப்பனா சுரேஷை காவலில் எடுத்து தீவிரமாக விசாரித்துவருகின்றன.
கேரளா மாநிலம் திருவனந்தபுரம் விமான நிலையத்தில் ரூ.14.82 கோடி மதிப்பிலான 30 கிலோ தங்கத்தை கடந்த ஜூலை மாதம் 5ஆம் தேதி சுங்கத் துறை அலுவலர்கள் கைப்பற்றினர்.
இந்தக் கடத்தல் சம்பவத்தில் முக்கியக் குற்றவாளியாக குற்றஞ்சாட்டப்பட்டுள்ள ஸ்வப்னா சுரேஷ், கேரள முதலமைச்சர் அலுவலகத்தில் தனக்குள்ள நெருக்கம் மூலம் இந்தக் கடத்தலில் ஈடுபட்டார் எனப் புகார் எழுந்துள்ளது. இதில், முதலமைச்சரின் முன்னாள் முதன்மைச் செயலர் சிவசங்கர் மீதும் விசாரணை நடைபெற்றுவருகிறது.
இதையும் படிங்க: கரோனா அச்சுறுத்தல் பள்ளியை மூடிய எம்எல்ஏ!
