'ஆண்டி முதல் அரசாட்சி வரை' - இது நித்தியின் தாண்டவம்!

சாதாரண ஆண்டி ஆன்மிகவாதியாக வாழ்க்கையைத் தொடங்கிய நித்தியானந்தாவை பல்வேறு கிரிமினல் குற்றச்சாட்டுகளில் காவல் துறை தேடி வரும் தருணத்தில் 'கைலாயம்' என தேசம் ஒன்றை உருவாக்கி, அங்கு ஆட்சியமைத்து, உலகையே அசர வைக்கும் நபராக உருவெடுத்துள்ளார்.

மகாவீரர், புத்தர், சந்திரகுப்த மௌரியர் போன்ற அரசர்கள் தாங்கள் உருவாக்கிய சாம்ராஜ்ஜியத்தைத் துறந்து ஆண்டியான கதைகளை நாம் வரலாற்றில் கண்டிருக்கிறோம். ஆனால், ஆண்டி ஒருவர் தனி ராஜ்ஜியத்தை விலைக்கு வாங்கி அதற்குக் கொடி, பாஸ்போர்ட், மந்திரி சபை அமைத்துள்ள வரலாற்று நகைமுரண் தற்போது நிகழ்ந்து கொண்டிருக்கிறது. அரசர்கள் துறவறம் கண்டு ஆன்மிக வழி சென்ற காலம் தலைகீழாகி, ஆண்டி கோலத்தில் தன்னை துறவியென்று சொல்லிக்கொண்டு திரியும் ஒருவர் நாடாளும் அரசனாக உருமாறியுள்ளார்.

அவர் தான் நித்தியானந்தா. பெயருக்குத் தகுந்தாற்போல் முகத்தில் புன்னகைப் பூத்திருக்கத் தன்னை ஆனந்தமாய் காட்டிக்கொள்வார் நித்தி. தான் பெற்ற இன்பத்தை வையகத்துக்கும் கொடுக்கும்விதமாக அடிக்கடி காணொலிகளை இணையத்தில் பதிவிட்டுக் காண்போரை மகிழச் செய்து தனக்கென்று ஒரு ரசிகர் பட்டாளத்தையே சேர்த்து வைத்துள்ளார் இவர். 'நான் சிவபெருமானின் அவதாரம்' என ஒரு முறை, 'நான் ஒரு புறம்போக்கு' என மறுமுறை, இப்படி அசரவைக்கும்படி மாறி மாறி பேசும் நித்தியைப் பார்ப்பவர்கள் பலருக்கும், ஏதோ வாய்க்கு வந்ததை உளறிக்கொட்டுகிற சாமியார் இந்தாளு எனத் தோன்றுவது வாடிக்கை. ஆனால் உண்மையில், தனது பக்தர்கள், பொதுமக்கள், அரசு என்று அனைவரையும் முட்டாள்களாக்கி, இந்த சாமியார் ஒரு சாம்ராஜ்ஜித்தையே உருவாக்கியுள்ளார்.

புன்னகைத் தவழும் ஆனந்த முகத்துடன் அருள்பாலிக்கும் நித்தி

'நித்தியானந்தா தியான பீடம்' என்ற பெயரில் நாடுமுழுவதும் ஆசிரமம் நடத்தி வந்தாலும், பல்வேறு வார இதழ்களுக்கு ஆன்மிகத் தொடர் கட்டுரைகள் எழுதியதன் மூலமே வெகுஜன நீரோட்டத்தில் தன்னை மெல்ல நுழைத்துக் கொண்டார் நித்தியானந்தா. 2010ஆம் ஆண்டு வெளியான வீடியோ ஒன்றின் மூலம், ஒரே நாளில் தமிழ்நாட்டின் முக்கியப் பிரபலமாக உருவெடுத்தார் நித்தி. ஒரு ஆன்மிகவாதி இது போன்ற சர்ச்சையில் சிக்கினால், அவரின் கதை அத்தோடு முடிந்தது என்றுதானே அனைவரின் எதிர்பார்ப்பாகவும் இருக்கும். ஆனால் அதன் பின்னர்தான் நித்தியின் களி ஆட்டங்கள் வேறு விதமாகப் பரிணமித்து விஸ்வரூபம் எடுக்கத் தொடங்கியது.

சூரியனைத் தாமதமாக உதிக்க வைப்பது, சிவன், பராசக்தி, கால பைரவருடன் நேரடியாகத் தொடர்பு கொண்டு பேசுவது, ஐன்ஸ்டீனின் 'ரிலேட்டிவிட்டி தியரி'க்கு ஐன்ஸ்டீனே ஆடிப்போகும் விதமான விளக்கங்களை அளிப்பது, சிவதாண்டவமாடி கை கால்களை உருட்டி ஜி.எப்.எக்ஃஸ் காட்சிகளில் புகை வரவழைப்பது போன்ற சேட்டைகளைத் திரைக்கு முன் செய்யும் நித்தியின் மீது, திரை மறைவில் செய்ததாக 50க்கும் மேற்பட்ட கிரிமினல் வழக்குகள் இதுவரை பதியப்பட்டுள்ளன.

பாலியல் வன்புணர்வு, ஆள்கடத்தல், குழந்தைகளைத் தொழிலாளர்களாக்கி வதைத்தல் போன்ற கிரிமினல் குற்றங்களை தன்பெயரில் கொண்டுள்ளார் நித்தியானந்தா. 2010ஆம் ஆண்டு தமிழ்நாடு ஊடகங்களுக்குத் தீனியாக இருந்த நித்தி, அடுத்த பத்தாண்டுக்குள் கர்நாடகா, கேரளா, குஜராத், ஹிமாச்சலம் என இந்தியாவின் பல்வேறு மாநில போலீஸார் தேடும் கிரிமினல் சாமியாக உச்சம் தொட்டு சர்வதேச ஊடகங்களுக்குத் தீனி போடும் பிரபலமாகப் பரிணமித்துள்ளார்.

சிம்மாசனத்தில் வீற்றிருக்கும் நித்தி

ஆர்.எஸ்.எஸ் என்ற அமைப்பும், அதன் பிள்ளையாகக் கருதப்படும் நாட்டின் ஆளும் கட்சியான பாஜகவின் கனவாகக் கருதப்படும் இந்து தேசத்தை தனியொருவனாக தற்போது சாதித்துள்ளார் நித்தி. ஆமாம், தென் அமெரிக்காவில் உள்ள ஈக்குவேடாருக்கு அருகே தீவு ஒன்றை விலைக்கு வாங்கி, அந்த பகுதிக்குக் கைலாயம் எனப் பெயரிட்டு 'இறையாண்மை கொண்ட இந்து தேசம்' என்று பிரகடனப்படுத்தியுள்ளார் இந்த அவதாரம். ரிஷபக் கொடி இந்த நாட்டின் தேசியக் கொடி, தமிழ்-சமஸ்கிருதம்-ஆங்கிலம் இந்த நாட்டின் தேசிய மொழிகள், ஆலமரம் இந்த நாட்டின் தேசிய மரம், தாமரை இந்த நாட்டின் தேசிய மலர், காளை இந்த நாட்டின் தேசிய விலங்கு.

மக்கள் நலத் திட்டங்களை வாக்குறுதிகளாக அளித்து ஆட்சியைப் பிடிக்கும் தலைவர்கள் மத்தியில், ஆட்சியமைத்துவிட்டு வாக்குறுதிகளைத் தருவதுதான் நித்தியின் ஸ்டைல்.

கல்வி, சுகாதாரம், குடிநீர் ஆகியவற்றை இலவசமாகத் தருவதாக மார்க்சிய மக்கள் நல வாக்குறுதிகளை, தனது குடிமக்களுக்கு அள்ளி தெளித்துள்ளார் நித்தி. அத்தோடு விடாமல், கைலாய நாட்டின் பாஸ்போர்ட்டை வைத்துக்கொண்டு ஈரேழு பதினான்கு உலகங்களுக்கும் பயணிக்கலாம் என அடேடே வாக்குறுதிகளையும் குடிமக்களுக்கு இவர் தனது சிவராஜ்ஜியத்தில் நல்கியுள்ளார்.

சிவசொரூபமாக தன்னை மாற்றி காண்பிக்கும் நித்தி

'புலன் ஒழுக்கம் கண்டு; ஆசை, கோபம் நீக்கி; இறைவனடி சேர; என்னுடன் கைலாயத்துக்கு வாருங்கள்' என்கிறார் மாணிக்கவாசகர், தனது திருவாசகத்தின் யாத்திரை பத்து பதிகத்தில். அறநெறியுடன் ஆன்மிகம் தழைத்த காலம் தழைகீழாக மாறி தன்னை புறம்போக்கு என்று அழைத்துக்கொள்ளும் கிரிமினல் குற்றவாளி, தனது பக்தகோடிகளைக் கைலாயத்துக்கு அழைக்கிறார். ஆண்டி அரசனான வரலாற்று நகைமுரண் நம் அனைவரின் கண் எதிரே தற்போது நிகழ்ந்துள்ளது.

இதையும் படிங்க: 'நிழலில் இருந்து நிஜ அதிகாரத்திற்கு...' - மராட்டியத்தைப் புரட்டிய தாக்கரே அரசியலின் கதை