தெலங்கானா மாநிலம் ஹைதராபாத்தை சேர்ந்த பட்டதாரி ஒருவர், வேலை தேடுவதற்காக Naukri இணையதளத்தில் பணத்தை செலுத்தி பதிவு செய்துள்ளார். இருப்பினும் நிறுவனம் தரப்பில் பதிவு செய்தது தொடர்பான மின்னஞ்சல் எதுவும் வரவில்லை எனக் கூறப்படுகிறது.
இதையடுத்து, கடந்த செப்டம்பர் 16ஆம் தேதி, அந்த இளைஞருக்கு தெரியாத எண்ணிலிருந்து அழைப்பு ஒன்று வந்துள்ளது. அதில் பேசிய நபர், சார் நாங்கள் Naukriயிலிருந்து பேசுகிறோம். நீங்கள் மீண்டும் ஒரு முறை பதிவு செய்ய வேண்டும் என படிவம் ஒன்றை வழங்கியுள்ளனர். இம்முறை நீங்கள் செலுத்தும் பணம் விரைவில் திரும்பு செலுத்தப்படும் என ஆசை வார்த்தைகளையும் அவரிடம் கூறியுள்ளனர்.
இதை உண்மை என நம்பிய அந்த இளைஞர், படிவத்தை பூர்த்தி செய்தது மட்டுமன்றி ஒரு முறை செல்போனுக்கு வரும் ஓடிபி எண்ணையும் அனுப்பியுள்ளார். அவ்வளவுதான், ஓடிபி எண் அனுப்பிய சில நொடிகளிலேயே இளைஞரின் வங்கி கணக்கிலிருந்து ரூ.96 ஆயிரத்தை சுருட்டியுள்ளனர். நாம் ஏமாற்றப்பட்டோம் என்பதை அறிந்த அந்த இளைஞர், உடனடியாக ஹைதராபாத் சைபர் காவல் துறையிடம் புகார் அளித்துள்ளார். இதுகுறித்து வழக்குப்பதிவு செய்த காவல் துறையினர் டிஜிட்டல் மோசடி கும்பலை தீவிரமாக தேடி வருகின்றனர்.
இதேபோன்ற மற்றொரு ஆன்லைன் மோசடி சம்பவம் தலாப் கட்டா பகுதியில் நடைபெற்றுள்ளது. அதில், Quicker ஆன்லைன் தளத்தில் உடனடியாக வேலை என்ற விளம்பரத்தை பார்த்த இளைஞர் ஒருவர், அதில் குறிப்பிட்டுள்ள எண்னை தொடர்புகொண்டு பேசியுள்ளார்.
அதில், நீங்கள் தளத்தில் பதிவு செய்தால் உடனடியாக வேலை கிடைத்திடும் என உறுதியளித்துள்ளனர். பல நாள் கனவு நினைவாகும் ஆசையில், ரூ.2 லட்சத்தை பதிவு கட்டணமாக செலுத்தியுள்ளார். அதன்பிறகு தான், பொய்யான நிறுவனம் என்பதை அறிந்து சைபர் காவல் துறையிடம் புகார் அளித்துள்ளார்.
தொழில்நுட்ப வளர்ச்சி உதவிகரமாக இருந்தாலும், பலரும் அதை தவறாக பயன்படுத்தி மோசடியில் ஈடுபடுவதை வாடிக்கையாக வைத்துள்ளனர். இத்தகைய டிஜிட்டல் மோசடியிலிருந்து தப்பிக்க மக்களிடையே பண மோசடி தொடர்பான விழிப்புணர்வை ஏற்படுத்த வேண்டிய கட்டாயத்தில் நாம் உள்ளோம் என சைபர் கிரைம் பிரிவு காவல் துறையினர் தெரிவிக்கின்றனர்.
