ஒரே இரவில் அதி தீவிரப் புயலாக மாறிய ஆம்பன் புயல், அடுத்த 12 மணி நேரத்தில் 'சூப்பர் புயலாக' மாற வாய்ப்புள்ளது என்று வானிலை மையம் தெரிவித்துள்ளது. இதனால் மேற்குவங்கம் மற்றும் ஒடிசாவுக்கு புயல் எச்சரிக்கை விடுக்கப்பட்டுள்ளது. தொடர்ந்து, இந்தப் புயல் வங்கதேச கடற்கரைப் பகுதியில் புதன்கிழமையன்று கரையைக் கடக்கும் என்றும் எதிர்பார்க்கப்படுகிறது.
இதுதொடர்பாக இந்திய வானிலை ஆய்வு மையம் வெளியிட்டுள்ள அறிவிப்பில், 'தீவிர புயலான ஆம்பன், வங்க கடலின் தென்கிழக்குப் பகுதியிலிருந்து, வடக்கு, வடகிழக்காக கடந்த 6 மணிநேரத்தில் 13 கி.மீ., வேகத்தில் சென்று வருகிறது. இது மேலும் தீவிரமடைந்து, அதி தீவிரப்புயலாக உருவெடுத்துள்ளதாக வானிலை மையம் தெரிவித்துள்ளது.
இதனால் ஒடிசா, மேற்கு வங்கம், இமயமலை மற்றும் சிக்கிம், அஸ்ஸாம், மேகாலயா ஆகிய பகுதிகளிலும் வரும் 21ஆம் தேதி வரை, கடும் மழைப் பொழிவு நிகழும் என வானிலை ஆய்வுமையம் தெரிவித்துள்ளது.
இதனைத் தொடர்ந்து ஆம்பன் புயலைச் சமாளிக்க தேசியப் பேரிடர் மீட்புப் படை தயார் நிலையில் உள்ளது. இது தொடர்பாக தேசியப் பேரிடர் மீட்புப் படைத் தலைவர் பிரதன் கூறுகையில், 'சவாலின் அளவை மனதில் கொண்டு, மீட்புப் படை நடவடிக்கை எடுத்து வருகிறது. தேசியப் பேரிடர் மீட்புப் படை இரண்டு பேரழிவு சூழ்நிலைகளைச் சமாளிப்பது இதுவே முதல்முறை' எனத் தெரிவித்துள்ளார்.
இதையும் படிங்க: ஊக்குவிப்பு முதல் வேலைவாய்ப்பு வரை
