புதுச்சேரி காமராஜ் நகர் தொகுதி இடைத்தேர்தலில் அதிமுக கூட்டணி சார்பில் என்.ஆர். காங்கிரஸ் வேட்பாளர் புவனேஸ்வரன் பேட்டியிடுகிறார்.
இந்நிலையில், புவனேஸ்வரை ஆதரித்து என்.ஆர். காங்கிரஸ் தலைவர் ரங்கசாமி இன்று கிருஷ்ணா நகர் பிரதான சாலை, ரெயின்போ நகர் பிரதான சாலையில் வீடுவீடாகச் சென்று வாக்குச் சேகரிப்பில் ஈடுபட்டார்.
பின்னர் செய்தியாளர்களைச் சந்தித்த ரங்கசாமி, "ஆளும் காங்கிரஸ் அரசு தங்களால் செய்ய முடியாத நலத்திட்டங்களை ஆளுநர் தடுப்பதாக தினமும் சொல்லிக் கொண்டு வருகின்றனர். எத்தனை ஆண்டாக இதனைச் சொல்லிக் கொண்டிருப்பார்கள். ஆளும் காங்கிரஸ் கட்சியினர் ஆளுநரை ஒரு கருவியாகப் பயன்படுத்திக் கொள்கின்றனர்.
இதையும் வாசிங்க : புதுச்சேரியில் கொலை முயற்சி: 6 பேர் அதிரடி கைது
தங்களால் எதுவும் செய்யமுடியாத காரணத்தால் அவர் மீது வீண்பழி போட்டு அவரை ஒரு கருவியாகப் பயன்படுத்துகின்றனர் (ஏனாமில் ஆளுநருக்கு எதிராக அமைச்சர் நடத்தும் போராட்டம் குறித்த கேள்விக்கு இவ்வாறு பதிலளித்தார்)
நான் முதலமைச்சராக இருந்தபோது, ஏனாம் வெள்ளத்தால் பாதிப்புக்குள்ளானது. அப்போது அங்கு சென்று சேதங்களைப் பார்வையிட்டு பணிகளைத் துரிதப்படுத்தினேன். என்னால் முடிந்தவற்றை ஏனாம் மக்களுக்குச் செய்தேன்" என்றார்.
