பீகார் மாநிலத்தைச் சேர்ந்த பிரசாந்த் கிஷோர் என்பவர் ஐநாவில் எட்டு வருடம் பணியாற்றிவிட்டு இந்தியா திரும்பி, 2012 குஜராத் சட்டமன்றத் தேர்தலில் பாஜக வெற்றிபெறுவதற்கு நவீன திட்டங்கள் வகுத்துக் கொடுத்தார்.
இதனையடுத்து, 2013ல் 'சிட்டிசன்ஸ் பார் அக்கவுன்டபுள் கவர்னன்ஸ்' என்ற அமைப்பைத் தொடங்கி, 2014 மக்களவைத் தேர்தலில் மோடி அலையை உருவாக்கி அவரை அரியணை ஏற்றியதில் பிரசாந்த் கிஷோர் பெரும்பங்காற்றினார். இது, அரசியல்வாதிகளின் பார்வையை இவர் பக்கம் திருப்ப வழிவகுத்தது.
தொடர்ந்து, 2015ஆம் ஆண்டு தனது அமைப்பின் பெயரை 'இந்தியன் பொலிட்டிக்கல் ஆக்சன் கமிட்டி', அதாவது 'ஐபேக்' என மாற்றினார். இதன்மூலம், தேர்தல் சமயத்தில் அரசியல் கட்சிகளுக்குத் தேவைப்படும் தேர்தல் வியூகங்கள், விளம்பரங்கள், யுக்திகளை வகுத்து கொடுத்து வருகிறார். இதற்காக இவருக்கு பல கோடி ரூபாய் வழங்கப்படுகிறது.
2015இல் மதசார்பற்ற ஜனதா தளம் கட்சித் தலைவர் நித்தீஷ் குமாரை பீகாரிலும், 2016இல் காங்கிரஸ் கட்சியின் கேப்டன் அமரீந்தர் சிங்கை பஞ்சாபிலும், 2019இல் ஒய்.எஸ்.ஆர் ஜெகன் மோகன் ரெட்டியை ஆந்திராவிலும் வெற்றிபெறச் செய்தார் பிரசாந்த் கிஷோர்.
எடப்பாடியுடன் கைகோர்க்கும் கிஷோர்?
மக்களவைத் தேர்தலில் அதிமுகவின் படுதோல்விக்குக் காரணம், சரியான தேர்தல் வியூகமும், விளம்பரமும் இல்லாததுமே என, சமீபத்தில் நடந்த அக்கட்சி நிர்வாகிகள் கூட்டத்தில், முதலமைச்சர் எடப்பாடி பழனிசாமி தெரிவித்திருந்தார்.
இந்நிலையில், 2021ஆம் ஆண்டு தமிழ்நாடு சட்டமன்றத் தேர்தலில் அதிமுகவை வெற்றிபெறவைக்க பிரசாந்த் கிஷோரின் 'ஐபேக்' நிறுவனத்தோடு முதலமைச்சர் எடப்பாடி பழனிசாமி ஒப்பந்தம் செய்துள்ளதாக கூறப்படுகிறது.
