கடந்த சில மாதங்களில் வேலையிழப்பு, ஊதிய குறைப்பு எனப் பல பிரச்னைகள் உலகம் முழுவதும் தலைத் தூக்கத் தொடங்கின. அதற்கு ஒரே காரணம் கரோனா பரவல்தான்.
புதுச்சேரி உருளையன்பேட்டை கோவிந்தசாலை பகுதியைச் சேர்ந்த முத்து சரவணன் (எ) ஞானவேலும் அதில் விதிவிலக்கில்லை. ஆட்டோ ஓட்டுநரான இவர் கூடுதல் வருமானத்திற்காக திருவிழாக்களில் தற்காலிக கடை அமைத்து சாவிக்கொத்திற்கு பெயர் பதிக்கும் வேலையை செய்துவந்தார்.
கரோனா காரணமாக ஆட்டோ தொழில் மட்டுமல்லாமல் அவருடைய தற்காலிக தொழிலும் கடந்த 6 மாதங்களாக முடங்கிப்போனது. இதனால் வறுமையின் பிடியில் சிக்கித் தவித்த ஞானவேல் மாற்றுத் தொழிலாக ஆட்டோவையே காய்கறி விற்கும் கூடமாக மாற்றினார். அதில் 10 ஆயிரம் ரூபாய் வரை பொருளாதார இழப்பு ஏற்பட்டது.
இதையடுத்து, பட்டை, கிராம்பு, முந்திரி போன்றவை பாக்கெட் போட்டு விற்கும் வேலையைச் செய்தார். அதிலும் சுணக்கம்தான். அடுத்தடுத்த தோல்விகளைக் கண்டு இவர் தளர்ந்துவிடவில்லை. விடாப்பிடியாக முயன்று கொண்டே இருந்தார். அடுத்த தொழிலாக நெல்லிக்காய் விற்கும் தொழிலைத் தேர்வுசெய்தார்.
விழுப்புரம் மாவட்டத்திலிருந்து நெல்லிக்காய்களை மூட்டையாக வாங்கி வந்து விற்கத் தொடங்கினார். ஆனால் எதில் சென்று விற்க? எப்படி கடை போட என யோசித்த இவருக்கு தனது ஆட்டோவைத் தவிர வேறு போக்கிடம் இல்லை. ஆட்டோவின் மேல்டாப்பை அகற்றிவிட்டு அதில் நெல்லிக்காய் வைத்து வீதிவீதியாக விற்பனைச் செய்யத் தொடங்கினார்.
தனது தோல்விகளைக் கடந்து வந்த ஞானவேலிடம் இது குறித்து கேட்டோம். ”பிற தொழிலைவிட நெல்லிக்காய் வியாபாரம் ஓரளவு வருமானத்தைக் கொடுக்கிறது. நெல்லிக்காய் ஆரோக்கியமானது என மக்களும் அதிகம் வாங்கிச் செல்கிறார்கள். இதை வைத்து தான் எனது குடும்பத்தை கவனித்துக் கொள்கிறேன்” என்றார்.
ஆட்டோவையும், இருசக்கர வாகனத்தையும் குழு மூலம் கடனாகப் பெற்றதாகவும், அந்தத் தவணைத் தொல்லையிலிருந்து மீள இந்தத் தொழில் மூலம் வருமானத்தை ஈட்டிவருவதாகவும் அவர் தெரிவித்தார்.
இதையும் படிங்க:ஊரடங்கால் வாழ்வாதாரம் பாதிக்கப்பட்ட பூம்பூம் மாட்டுக் காரர்களுக்கு மாற்றுத் தொழில்!
