குண்டூர்: ஆந்திர மாநிலம், குண்டூர் மாவட்டத்தில் உள்ள பிரங்கிபுரத்தைச் சேர்ந்த மாணவி ஒருவர், ஹைதராபாத்தில் நர்சிங் படித்து வருகிறார். இவர் ஆன்லைன் வகுப்புகளுக்காக தனது தந்தையின் செல்போனை வாங்கி பயன்படுத்தியதாகத் தெரிகிறது. அப்போது, உடைகள் உள்ளிட்டவற்றை வாங்க, தந்தைக்கு தெரியாமலேயே அவரது வங்கிக் கணக்கிலிருந்து சுமார் 80,000 ரூபாயை செலவு செய்துள்ளார். தந்தையின் செல்போனில் இருந்த ஆப் மூலமாகவே ஷாப்பிங் செய்துள்ளார்.
சில நாட்களுக்குப் பிறகு தான் எடுத்த பணத்தை தந்தையின் கணக்கில் திருப்பிச் செலுத்த வேண்டும் என நினைத்துள்ளார். பணத்தை ஏற்பாடு செய்யும் முயற்சியில் இருந்த மாணவியிடம், அவரது நண்பர்கள் சிறுநீரகத்தை விற்றுப் பணம் ஈட்டலாம் எனக் கூறியுள்ளனர்.
இதையடுத்து சிறுமி சிறுநீரகத்தை விற்பனை செய்ய சமூக வலைதளங்களில் தேடியுள்ளார். ஒரு இணையதளத்தில் சிறுநீரகத்திற்கு 7 கோடி ரூபாய் வழங்குவதாக விளம்பரம் செய்யப்பட்டிருந்தது. அதைப் பார்த்து பிரவீன்ராஜ் என்ற மருத்துவரைத் தொடர்பு கொண்டுள்ளார். அந்த மருத்துவர், முதற்கட்டமாக மூன்றரை கோடி ரூபாயைத் தருவதாகவும், அறுவை சிகிச்சைக்குப் பிறகு மீதிப்பணத்தை தருவதாகவும் உறுதியளித்துள்ளார்.
இதையடுத்து அவர் பரிந்துரை செய்த மருத்துவப் பரிசோதனைகளையும் செய்துள்ளார். பின்னர் அந்த மருத்துவர், கூறியபடி மூன்றரை கோடி ரூபாயை மாணவியின் தந்தையுடைய வங்கிக் கணக்கில் செலுத்திவிட்டதாக ஸ்கிரீன் ஷாட் அனுப்பியுள்ளார். ஆனால், தந்தையின் வங்கிக் கணக்கில் பணம் வரவில்லை.
இதுகுறித்து மருத்துவரிடம் கேட்டபோது, டாலரை ரூபாயாக மாற்ற 15,000 ரூபாய் செலுத்தும்படி மாணவியிடம் அறிவுறுத்தியுள்ளார். அதன்படி மாணவியும் செலுத்தியுள்ளார். இதுபோன்ற பல்வேறு காரணங்களைக் கூறி, கடந்த மார்ச் மாதம் முதல் அக்டோபர் வரை 16 லட்சம் ரூபாயை மாணவியிடமிருந்து ஏமாற்றி வாங்கியுள்ளார்.
இதனிடையே மாணவியை நம்ப வைப்பதற்காக பத்தாயிரம் ரூபாயை மாணவியின் தந்தையுடைய வங்கிக் கணக்கில் செலுத்தியதாகத் தெரிகிறது. பின்னர் டெல்லிக்கு வந்தால் நேரில் பணம் தருவதாகக் கூறி அழைத்துள்ளார். மாணவி அங்கு சென்றபோது அந்த மருத்துவர் வரவில்லை.
சில நாட்கள் கழித்து மேலும் ஒன்றரை லட்சம் ரூபாயை தரும்படி மருத்துவர் கேட்டபோது, நிலைமை கைமீறி சென்றதை அறிந்த மாணவி, தந்தைக்கு பயந்து கஞ்சிகச்சர்லாவில் உள்ள ஒரு நண்பரின் வீட்டில் தஞ்சமடைந்தார்.
மகளைக் காணவில்லை என தந்தை புகார் அளித்ததையடுத்து, போலீசார் மாணவியை கண்டுபிடித்துள்ளனர். மாணவியிடம் விசாரணை நடத்தியபோது, மாணவி ஏமாந்து போனதன் முழுப் பின்னணியும் தெரியவந்துள்ளது. இதுதொடர்பாக வழக்குப்பதிவு செய்து போலீசார் விசாரணை நடத்தி வருகின்றனர்.
சைபர் மோசடிகள் குறித்து மக்கள் எச்சரிக்கையாக இருக்க வேண்டும் என குண்டூர் எஸ்பி ஆரிப் ஹபீஸ் தெரிவித்தார். சந்தேகப்படும் வகையில் யாரேனும் தொடர்பு கொண்டால், Cyber Kavach செயலியை பயன்படுத்தவும் அறிவுறுத்தினார்.
இதையும் படிங்க: ஓட்டிப் பார்ப்பதாக கூறி ரூ.14 லட்சம் பைக்கை ஆட்டைய போட்ட இளைஞர்!
