டெல்லியில் அமேசான் மேலாளர் சுட்டுக்கொலை!

Amazon Manager Shot dead: டெல்லி பஜன்புரா பகுதியில் நடந்த துப்பாக்கிச் சூட்டில் அடையாளம் தெரியாத ஒரு கும்பலால் இருவர் தாக்கப்பட்ட நிலையில். ஒருவர் உயிரிழந்துள்ளார். மேலும் ஒருவருக்கு சிகிச்சை அளிக்கப்பட்டு வருகிறது.

புதுடெல்லி: அமேசான் இ-காமர்ஸ் நிறுவனத்தில் மூத்த மேலாளராக பணியாற்றி வந்த நபர், வடகிழக்கு டெல்லியின் பஜன்புரா பகுதியில் அடையாளம் தெரியாத ஒரு கும்பலால் சுட்டுக்கொல்லப்பட்ட சம்பவம் அப்பகுதியில் பரபரப்பை ஏற்படுத்தியுள்ளது. அமேசான் இ-காமர்ஸ் நிறுவனத்தில் மூத்த மேலாளராக பணியாற்றி வந்தவர் ஹர்பிரீத் கில் (36). இவர் நேற்று (ஆகஸ்ட் 29) இரவு தனது நண்பர் கோவிந்த் சிங் (32) உடன் இருசக்கர வாகனத்தில் சென்றுள்ளார்.

அப்போது இரவு 11.30 மணியளவில் வடக்கு டெல்லியில் உள்ள பஜன்புரா பகுதியில் ஸ்கூட்டர் மற்றும் மோட்டார் சைக்கிளில் வந்த 5 அடையாளம் தெரியாத இளைஞர்கள், இவர்களை வழிமறித்து துப்பாக்கியால் சுட்டதாகக் கூறப்படுகிறது. இந்த துப்பாக்கிச் சூட்டில் புல்லட் ஹர்பிரீத் கில்-இன் தலையின் வலதுபுறம் காதுக்கு பின்னால் நுழைந்து மறுபக்கத்தில் வெளிவந்துள்ளதாகக் கூறப்படுகிறது. மேலும், அவரது நண்பரும் துப்பாக்கியால் சுடப்பட்டதாக கூறப்படுகிறது.

தலையில் சுடப்பட்ட கில், ஜக் பிரவேஷ் சந்திரா மருத்துவமனையில் அனுமதிக்கப்பட்ட நிலையில், அவர் இறந்துவிட்டதாக மருத்துவர்கள் தெரிவித்தனர். மேலும் அவரது நண்பர் தீவிர சிகிச்சை பெற்று வருகிறார்.

இச்சம்பவம் குறித்து துணை காவல் ஆணையர் (வடகிழக்கு) ஜாய் டிர்கி கூறுகையில், “பஜன்புராவில் வசிக்கும் சிங் என்பவர், அப்பகுதியில் உணவகம் ஒன்றை நடத்தி வந்த நிலையில், அவரும் தலையில் சுடப்பட்ட நிலையில் லோக் நாயக் ஜெய் பிரகாஷ் மருத்துவமனையில் அனுமதிக்கப்பட்டுள்ளார்” என கூறியுள்ளார்.

மேலும் அவர், "இருவரும் இருசக்கர வாகனத்தில் சென்றபோது ஸ்கூட்டர் மற்றும் மோட்டார் சைக்கிளில் வந்த 5 அடையாளம் தெரியாத நபர்கள் அவர்களை வழிமறித்து துப்பாக்கியால் சுட்டுள்ளனர்" என கூறியுள்ளார்.

தாக்குதல் நடத்தியவர்களை அடையாளம் காண அப்பகுதியில் உள்ள சிசிடிவி கேமராக்களை ஆய்வு செய்து வருவதாக பேலீசார் தெரிவித்துள்ளனர். இச்சம்பவம் தொடர்பாக கொலை வழக்குப் பதிவு செய்யப்பட்ட நிலையில், இந்த துப்பாக்கிச் சூட்டுக்கான சரியான காரணம் என்ன என்பது குறித்து கண்டறியப்பட்டு வருவதாக போலீசார் தெரிவித்துள்ளனர்.

“அவரது தலையில் சுடப்பட்டுள்ளது. இந்த சம்பவத்துக்கான காரணம் என்ன என்பது தெரியவில்லை. அவருக்கு யாருடனும் பகை ஏதும் இல்லை. சிசிடிவி காட்சிகளை ஆய்வு செய்யுமாறு காவல் துறையிடம் கோரிக்கை வைத்துள்ளேன்” என உயிரிழந்தவரில் உறவினர் கூறி உள்ளார்.

மேலும், நேற்று இரவு 11.53 மணிக்கு காவல் நிலையத்துக்கு எச்சரிக்கை வந்துள்ளதாகவும், இதனைத் தொடர்ந்து பஜனபுரா போலீசார் சம்பவ இடத்திற்கு சென்றதாகவும் கூறப்படுகிறது. இச்சம்பவம் குறித்து டிசிபி கூறுகையில் உயிரிழந்த நபர் பைக் மற்றும் ஸ்கூட்டியில் வந்த ஐந்து நபர்களிடம் வாக்குவாதத்தில் இடுபட்டதாக கூறியுள்ளார்.