திருப்பத்தூர் அருகே சுற்றுலா வந்த இளைஞரின் இருசக்கர வாகனம் தீ பற்றி எரிந்ததால் பரபரப்பு! - bike fire accident

திருப்பத்தூர்: திருப்பத்தூர் மாவட்டம் ஜோலார்பேட்டை அடுத்த ஏலகிரி மலை சுற்றுலா தளத்திற்குத் தமிழகம் மட்டுமின்றி அண்டை மாநிலங்களில் இருந்தும் சுற்றலா பணிகள் வந்து செல்கின்றனர். அந்த வகையில் இன்று (ஏப்ரல் 08) ஏலகிரி மலை சுற்றுலா பகுதிக்கு இளைஞர் ஒருவர் இருசக்கர வாகனத்தில் வந்துள்ளார். 

அப்போது, இளைஞர் வந்து கொண்டிருக்கும் போது, இருசக்கர வாகனத்தில் இருந்து புகை வந்துள்ளது. இதை அறிந்த இளைஞர் உடனடியாக இருசக்கர வாகனத்தை நிறுத்தி இறங்கி உள்ளார். இறங்கிய சற்று நேரத்தில் வாகனம் மளமளவென தீ பிடிக்கத் தொடங்கி உள்ளது. 

இதனைத் தொடர்ந்து உடனடியாக டிராக்டர் மூலம் தண்ணீர் வரவழைத்து இருசக்கர வாகனத்தின் மீது ஊற்றி தீயை அணைத்தனர். இந்த சம்பவத்தை அப்பகுதியில் இருந்த சிலர் தங்களது செல்போனில் வீடியோ எடுத்து சமூக வலைத்தளங்களில் பதிவு செய்த நிலையில், தற்போது இந்த வீடியோவானது வேகமாகப் பரவி வருகிறது. 

மேலும், சுற்றுலா வந்த இளைஞரின் இருசக்கர வாகனம் திடீரென தீ பற்றி எரிந்தது அப்பகுதியில் பெரும் பரபரப்பை ஏற்படுத்தி உள்ளது.