சேலம்: சேலம் மாவட்டம் மேட்டூர் அடுத்த காரைக்காடு பகுதியில் தமிழ்நாடு காவல் துறையினரின் சோதனை சாவடி அமைந்துள்ளது. அங்கிருந்து சில கிலோமீட்டர் தொலைவில் பாலாறு அடுத்த பகுதியில் கர்நாடக அரசின் சோதனைச் சாவடி இருக்கிறது. தமிழக எல்லைப் பகுதியான காரைக்காடு சோதனை சாவடியை கடந்து கர்நாடக மாநிலத்திற்கு செல்லும் வாகனங்கள் அனைத்தையும் காவல்துறையினர் சோதனை செய்து அனுப்புவது வழக்கம்.
இந்த நிலையில், இன்று வடமாநில சுற்றுலா பேருந்து ஒன்று சேலம் மேட்டூர் அணை அடுத்த கர்நாடக மாநிலத்தில் அமைந்துள்ள மாதேஸ்வர மலைக்கு சென்றது. அப்போது, காரைக்காடு பகுதியில் அமைந்துள்ள தமிழ்நாடு செக் போஸ்ட் பகுதியில் அங்குள்ள காவலர் சுற்றுலா பேருந்தை நிறுத்தி சோதனை செய்ததாக கூறப்படுகிறது.
இதனிடையே பேருந்தில் மது போதையில் இருந்த வட மாநிலத்தவர் காவலரை சரமாரியாக இரும்பு கம்பியால் தாக்கியுள்ளனர். இதனை அறிந்த அப்பகுதி பொதுமக்கள் பேருந்தைச் சுற்றி வளைத்து பிடித்து காவலரை மீட்டு மருத்துவமனைக்கு அனுப்பி வைத்தனர்.
இதையும் படிங்க: பரங்கிமலை ரயில் நிலையத்தில் சத்யபிரியா கொல்லப்பட்ட வழக்கு...இளைஞர் சதீஷ் குற்றவாளி என நீதிமன்றம் அறிவிப்பு!
இதனை அடுத்து காவலரை தாக்கிய வடமாநிலத்தவரை பிடித்து தர்ம அடி கொடுத்து காரைக்காடு தமிழ்நாடு காவல் துறை சோதனை சாவடியில் பிடித்து வைத்து கொளத்தூர் காவல் நிலையத்திற்கு தகவல் தெரிவித்தனர்.
உடனடியாக போலீசார் சம்பவ இடத்துக்கு விரைந்து சென்று கடப்பாரை கொண்டு தாக்குதல் நடத்திய வட மாநிலத்தைச் சேர்ந்த இருவரை கைது செய்து, அவர்கள் வந்த மற்றும் சுற்றுலா பேருந்தை பறிமுதல் செய்தனர்.
அதனைத் தொடர்ந்து கைதான இருவரையும் கொளத்தூர் காவல் நிலையம் அழைத்து வந்து சம்பவம் குறித்து போலீசார் விசாரணை மேற்கொண்டு வருகின்றனர். இந்த சம்பவம் அந்த பகுதியில் மிகுந்த பரபரப்பை ஏற்படுத்தியது.
மேலும், காவல்துறையினரை கடப்பாரையால் தாக்கிய வடமாநிலத்தவரை காவலரும், பொது மக்களும் சேர்ந்து தர்ம அடி கொடுக்கும் வீடியோ காட்சிகள் இணையத்தில் வைரலாகி வருகிறது. அந்த வீடியோவில், காவலரை இரும்பு கடப்பாரையால் தாக்க வரும் வடமாநில இளைஞரை போலீசாரும், பொதுமக்களும் திரும்பி தாக்குவதும், பதிலுக்கு பேருந்தில் வந்தவர்கள் கையில் கிடைப்பதை எடுத்து தாக்க முற்படுவதும் பதிவாகியுள்ளது.
