சென்னை: மத்திய சுற்றுச்சூழல், வனம் மற்றும் பருவநிலை மாற்றத்துறை அமைச்சர் பூபேந்தர் யாதவ், 78வது சுதந்திர தினத்தை முன்னிட்டு, ஏற்கனவே இந்தியாவில் உள்ள 82 ராம்சார் தளங்களுடன், தமிழ்நாட்டில் உள்ள நஞ்சராயன் பறவைகள் சரணாலயம், கழுவேலி பறவைகள் சரணாலயம் மற்றும் மத்தியப் பிரதேசத்தில் உள்ள தவா நீர்த்தேக்கம் ஆகிய மூன்றும் புதிய ராம்சார் தளங்களாக அறிவித்துள்ளார். இதன் காரணமாக, இந்தியாவில் உள்ள ராம்சார் தளங்களின் எண்ணிக்கை 85ஆக உயர்ந்துள்ளது.
இந்த நிலையில், இந்தியாவில் உள்ள 85 ராம்சார் தளங்களில் தமிழ்நாட்டில் மட்டுமே 18 தளங்கள் உள்ளன. இதனால், நாட்டிலேயே தமிழகத்தில் தான் அதிக ராம்சார் தளங்கள் உள்ளன என்பது குறிப்பிடத்தக்கது. மேலும், தமிழ்நாட்டிற்கு அடுத்தபடியாக, 10 ராம்சார் தளங்களுடன் உத்தரப்பிரதேசம் இரண்டாம் இடத்தில் உள்ளது.
Triple joy!
— Bhupender Yadav (@byadavbjp) August 14, 2024
As the Nation gears up to celebrate its Independence Day, thrilled to share that we have added three Ramsar sites to our network. This takes our tally to 85 Ramsar sites, covering an area of 1358068 ha in India.
The achievement reflects the emphasis PM Shri… pic.twitter.com/GiSK6uREhV
நஞ்சராயன் பறவைகள் சரணாலயம்: தற்போது தமிழ்நாட்டில் இருந்து புதிதாக இனைக்கப்பட்ட நஞ்சராயன் பறவைகள் சரணாலயம் என்பது, திருப்பூர் மாவட்டத்தில் உள்ள ஊத்துக்குளி பகுதியில் அமைந்துள்ள ஒரு பெரிய ஆழமற்ற ஈரநிலமாகும். இப்பகுதியில் உள்ள ஈரநிலங்கள் முக்கியமாக வானிலை நிலைமைகளைப் பொறுத்தது, குறிப்பாக நல்லார் வடிகாலில் இருந்து வரும் கனமழை நீரைப் பொறுத்தது.
மேலும், சுமார் 191 வகையான பறவைகள், 87 வகையான பட்டாம்பூச்சிகள், 7 வகையான நீர்நில வாழ் உயிரினங்கள், 21 வகையான ஊர்வன, 11 வகையான சிறிய பாலூட்டிகள் மற்றும் 77 வகையான தாவரங்கள் ஏரியிலும் அதைச் சுற்றியும் பதிவு செய்யப்பட்டுள்ளன. இதன் காரணமாக, தமிழ்நாட்டின் 17வது பறவைகள் சரணாலயமாக நஞ்சராயன் ஏரி அறிவிக்கப்பட்டுள்ளது.
கழுவேலி பறவைகள் சரணாலயம்: 2021ஆம் ஆண்டில் தமிழ்நாட்டின் 16வது பறவைகள் சரணாலயமாக 5,151.6 ஹெக்டேருக்கும் அதிக பரப்பளவில் அமைந்துள்ள கழுவேலி பறவைகள் சரணாலயம் அறிவிக்கப்பட்டது. இது விழுப்புரம் மாவட்டத்தில் உள்ள கோரமண்டல் கடற்கரையில் அமைந்துள்ள ஒரு ஆழமற்ற உவர்நீர் ஏரியாகும்.
இந்த ஏரி வங்காள விரிகுடாவுடன் உப்புகழி சிற்றோடை மற்றும் எடையந்திட்டு முகத்துவாரம் மூலம் இணைக்கப்பட்டுள்ளது. கழுவேலி குறிப்பிடத்தக்க மற்றும் பல்லுயிர் வளம் நிறைந்த ஈரநிலங்களில் ஒன்றாகும். இந்த ஏரி தீபகற்ப இந்தியாவின் மிகப்பெரிய ஈரநிலங்களில் ஒன்றாகும்.
கழுவேலி பறவைகள் சரணாலயம், இடம்பெயரும் பறவைகளின் இனங்களுக்கு ஒரு முக்கியமான நிறுத்த இடமாகவும், இங்கேயே வசிக்கும் பறவைகளின் இனப்பெருக்க இடமாகவும், மீன்களுக்கான இனப்பெருக்க இடமாகவும், நீர்த்தேக்கங்களுக்கான முக்கிய நீர் சேமிப்பு ஆதாரமாகவும் செயல்படுகிறது.
இந்த பகுதியில் பல நூறு ஹெக்டேர் நிலப்பரப்பில் நாணல் காணப்படுகிறது. மேலும், பெரும் பூநாரை (Greater Flamingo), வெள்ளை அரிவாள் மூக்கன் (Black-headed ibis), வர்ணம் பூசப்பட்ட நாரை (Painted Stork), நாமக்கோழி (Eurasian Coot) ஆகியவை இப்பகுதியில் இருப்பதாக பதிவு செய்யப்பட்டுள்ளன.
ஈடிவி பாரத் தமிழ் வாட்ஸ்ஆப் சேனலில் இணைய இங்கே க்ளிக் செய்யவும்
இதையும் படிங்க: தங்கலான் கெட்டப்பில் தியேட்டருக்கு வந்து அலப்பறை.. மறுத்த திருச்சி திரையரங்கம்!
