தேனி: உலகம் முழுவதும் மே 1ஆம் தேதியான இன்று உழைப்பாளர்கள் தினம் கொண்டாடப்பட்டு வருகிறது. இந்த நிலையில், மேலசொக்கநாதபுரம் பேரூராட்சி நிர்வாகம், அங்கு பணியாற்றும் தொழிலாளர்களை உற்சாகப்படுத்தும் விதமாக புதுவித ஏற்பாட்டைச் செய்துள்ளது.
அதாவது, மேலசொக்கநாதபுரம் பேரூராட்சியில் பணியாற்றும் நிரந்தர மற்றும் தற்காலிக தூய்மைப் பணியாளர்கள் அனைவருக்கும் பேரூராட்சி நிர்வாகம் சார்பில் 2 நாட்கள் திருச்செந்தூர் மற்றும் அதன் சுற்றுப் பகுதிகளுக்கு இலவச இன்பச் சுற்றுலா ஏற்பாடு செய்யப்பட்டுள்ளது.
இதற்குரிய அனைத்து செலவும் மேலசொக்கநாதபுரம் பேரூராட்சி நிர்வாகம் சார்பாக ஏற்றுக் கொள்ளப்பட்டுள்ளது. குறிப்பாக, சுற்றுலா செல்லும் தூய்மைப் பணியாளர்களுக்குத் தேவையான உணவு மற்றும் போக்குவரத்தில் சென்றுவதற்கான அத்தியாவசிய செலவுத் தொகையும் வழங்கப்பட்டுள்ளது. அத்தியாவசியப் பணிகளான குடிநீர் வழங்கல் மற்றும் சுகாதாரப் பிரிவு தவிர மற்றும் அனைத்து தூய்மைப் பணியாளர்களும் தங்கள் குடும்பத்துடன் சுற்றுலாவில் பங்கேற்றனர்.
தூய்மைப் பணியாளர்களை உற்சாகப்படுத்தும் விதமான இந்த ஏற்பாடுகளை மேலசொக்கநாதபுரம் பேரூராட்சி தலைவர் காளி கண்ணன் ராமசாமி செய்திருந்தார். மேலும், பேரூராட்சி செயல் அலுவலர் இளங்கோவன் பயணத்திற்கான அனைத்து ஏற்பாடுகளை கவனித்துக் கொண்டார்.
