ரயில் பயணிகள் கவனத்திற்கு.. திண்டுக்கல் - திருச்சி வழி இனி வழக்கம் போல் செயல்படும்!

ரயில் பாதை மேம்பாட்டு பணிகளின் காரணமாக, திண்டுக்கல் - திருச்சி ரயில் போக்குவரத்து மாற்றம் ரத்து செய்யப்பட்டுள்ளதாக தெற்கு ரயில்வே அறிவித்துள்ளது.

மதுரை: திண்டுக்கல் - திருச்சி ரயில் பாதையில் மேம்பாட்டு பணிகள் நடைபெறவுள்ள காரணத்தால் அப்பகுதியில் செல்லும் ரயில்களின் போக்குவரத்தில் செய்யப்பட்ட மாற்றங்கள், தற்போது ரத்து செய்யப்பட்டுள்ளதாக தெற்கு ரயில்வே அறிவித்துள்ளது.

இதுகுறித்து தென்னக ரயில்வே வெளியிட்டுள்ள அறிவிப்பில், "திண்டுக்கல் - திருச்சி ரயில் பாதை பிரிவில் ரயில் பாதை மேம்பாட்டு பணிகளுக்காக செங்கோட்டையில் இருந்து டிசம்பர் 27, 28, 30 மற்றும் 31 ஆகிய நாட்களில் காலை 07:05 மணிக்கு புறப்பட வேண்டிய மயிலாடுதுறை விரைவு ரயில் (வண்டி எண் - 16848), குருவாயூரிலிருந்து டிசம்பர் 27, 30 ஆகிய நாட்களில் புறப்பட வேண்டிய சென்னை எழும்பூர் விரைவு ரயில் (வண்டி எண் - 16128).

கன்னியாகுமரியில் இருந்து டிசம்பர் 28 ஆகிய நாட்களில் புறப்பட வேண்டிய கொல்கத்தா ஹௌரா விரைவு ரயில் (வண்டி எண் - 12666), நாகர்கோவிலில் இருந்து டிசம்பர் 31 அன்று புறப்பட வேண்டிய சிஎஸ்டி மும்பை விரைவு ரயில் (வண்டி எண் - 16340), நாகர்கோவிலில் இருந்து டிசம்பர் 28 ஆகிய நாட்களில் புறப்பட வேண்டிய கச்சக்குடா விரைவு ரயில் (வண்டி எண் - 16354).

மேலும், பனாரஸிலிருந்து டிசம்பர் 29 அன்று புறப்பட வேண்டிய கன்னியாகுமரி தமிழ்ச்சங்கம் விரைவு ரயில் (வண்டி எண் - 16368) நாகர்கோவில் மற்றும் கோயம்புத்தூரில் இருந்து டிசம்பர் 28, 31 ஆகிய நாட்களில் புறப்பட வேண்டிய கோயம்புத்தூர் மற்றும் நாகர்கோவில் பகல் நேர விரைவு ரயில்கள் (வண்டி எண் - 16321 / 16322) ஆகியவை மாற்றுப் பாதையில் இயக்கப்படும் என அறிவிக்கப்பட்டிருந்தது.

இதையும் படிங்க: தாம்பரம் - கொச்சுவேலி சிறப்பு ரயில் சேவை நீட்டிப்பு - தெற்கு ரயில்வே அறிவிப்பு!

தற்போது இந்த அறிவுப்பு ரத்து செய்யப்பட்டுள்ளது. எனவே பயணிகளின் வசதிக்காக இந்த ரயில்கள் வழக்கமான பாதையில் இயக்கப்படும். மேலும், சென்னை எழும்பூர் மற்றும் மதுரையிலிருந்து டிசம்பர் 28, 31 ஆகிய நாட்களில் புறப்பட வேண்டிய மதுரை மற்றும் சென்னை எழும்பூர் தேஜாஸ் விரைவு ரயில்கள் (வண்டி எண் - 22671 / 22672) திருச்சி - மதுரை இடையே பகுதியாக ரத்து செய்யப்பட்டு திருச்சி வரை மட்டுமே இயக்கப்படும் என அறிவிக்கப்பட்டு இருந்தது.

இந்த ரயில்கள் வழக்கம் போல மதுரை வரை இயக்கப்படும். ஈரோட்டில் இருந்து டிசம்பர் 27, 30 ஆகிய நாட்கள் புறப்பட வேண்டிய செங்கோட்டை விரைவு ரயில் (வண்டி எண் - 16845) மற்றும் செங்கோட்டையில் இருந்து டிசம்பர் 28, 31 ஆகிய நாட்களில் புறப்பட வேண்டிய ஈரோடு (வண்டி எண் - 16846) விரைவு ரயில் ஆகியவை கரூர் - செங்கோட்டை இடையே பகுதியாக ரத்து செய்யப்பட்டு கரூர் வரை மட்டும் இயக்கப்படும் என அறிவிக்கப்பட்டிருந்தது. தற்போது இந்த அறிவிப்பும் ரத்து செய்யப்பட்டுள்ளது. எனவே இந்த ரயில்கள் செங்கோட்டை - ஈரோடு ரயில் நிலையங்கள் இடையே முழுமையாக இயக்கப்படும்" எனத் தெரிவிக்கப்பட்டுள்ளது.