தூத்துக்குடி: கர்நாடக மாநில தலைநகரம் பெங்களூரு வழியாக மைசூருக்கு தினசரி தூத்துக்குடியில் இருந்து ரயில் இயங்கி வருகிறது. வண்டி எண் 16235, தூத்துக்குடியில் இருந்து தினமும் மாலை 5.15 மணிக்கு புறப்பட்டு, மறுநாள் காலை 10.20-க்கு மைசூரைச் சென்றடைகிறது. மறுமார்க்கமாக வண்டி எண் 16236, மைசூரில் இருந்து தினமும் மாலை 6.20 மணிக்கு புறப்பட்டு, மறுநாள் காலை 10.45 மணிக்கு தூத்துக்குடியை வந்தடைகிறது.
இந்த ரயிலானது சேலத்தில் இருந்து நாமக்கல் வழியாக இயக்கப்படாமல், ஈரோடு வழியாக இயக்கப்படுவதால், தினமும் இந்த ரயிலின் இரு மார்க்கங்களிலும் இன்ஜினை கழற்றி எதிர் திசையில் மாற்ற வேண்டியுள்ளது. ஆனால், நாமக்கல் வழியாக இயக்குவதன் மூலம், அதிகபட்சமாக ஒன்றரை மணி நேரம் வரை மிச்சமாகும். அது மட்டுமன்றி, ரயில்வே ஊழியர்களின் பணிச் சுமையும் குறையும்.
தென்காசி-விருதுநகர் வழித்தட மக்கள், குருவாயூர்-மதுரை ரயில் மூலம் விருதுநகர் வரை வந்து, பின் தூத்துக்குடி- மைசூர் ரயிலில் பயணம் மேற்கொண்டு வருகின்றனர். ஆனால், மைசூரில் இருந்து தூத்துக்குடி நோக்கி வரும்போது, வண்டி எண் 16236 ஆனது, மதுரைக்கு காலை 07.25 மணிக்குதான் வந்தடைகிறது.
மேலும், மதுரை-செங்கோட்டை பயணிகள் ரயில், மதுரையில் இருந்து காலை 7.10 மணிக்கே புறப்படுவதால், விருதுநகர், தென்காசி, திருநெல்வேலி வழித்தட மக்களால் மதுரை-செங்கோட்டை ரயிலைப் பிடிக்க முடிவதில்லை. மைசூர்-தூத்துக்குடி எக்ஸ்பிரஸ் நாமக்கல் வழியாக இயக்கப்படும் பட்சத்தில், இந்த ரயில் மதுரைக்கு மிக எளிதாக காலை 6.25 மணிக்கு வந்தடையும்.
இதனால் பயண நேரம் குறைவதோடு, மதுரை-செங்கோட்டை விரைவு ரயிலைப் பிடிக்க வசதியாக இருக்கும். மேலும், தூத்துக்குடிக்கு காலை 10.40 மணிக்குப் பதிலாக, காலை 9.15 மணிக்குச் சென்றடையும் வாய்ப்பு உள்ளதால் தூத்துக்குடி மக்களின் நெடுநாள் கோரிக்கையும் நனவாகும்.
இது குறித்து தென்காசி மாவட்ட ரயில் பயணிகள் சங்கச் செயலாளர் ஜெகன் கூறுகையில், “தென்காசி வழியாக பெங்களூருக்கு ரயில்களே இல்லாத காரணத்தால், நெல்லைக்கோ அல்லது மதுரைக்கோ சென்று, பின் அங்கிருந்து பெங்களூரு செல்லும் ரயில்களை பிடிக்கும் நிலை உள்ளது.
எனவே, மைசூர்-தூத்துக்குடி ரயிலை ஈரோடுக்குப் பதில் நாமக்கல் வழியாக இயக்கினால் விருதுநகர்-தென்காசி வழித்தட மக்களுக்கு இணைப்பு ரயில் கிடைக்கும். மேலும், தூத்துக்குடி செல்லும் மக்களுக்கும் பயண நேரம் மிச்சமாகும். எனவே, தெற்கு ரயில்வே உடனடியாக இந்த வழி மாற்றத்தை செய்ய வேண்டும்” என கோரிக்கை விடுத்தார். இந்நிலையில் ஏற்கனவே வண்டி எண் 16339 அல்லது 16340 மும்பை-நாகர்கோவில் ரயிலானது ஈரோடுக்குப் பதிலாக நாமக்கல் வழியாக இயக்கப்படுவது குறிப்பிடத்தக்கது.
இதையும் படிங்க: "கோதண்டராமர் கோயில் அர்ச்சகர்களிடம் கண்ணில் பயம்" - ஆளுநர் ஆர்.என்.ரவி
