தேனி: தேனி மாவட்டம், சின்னமனூர் அருகே உள்ள எரசக்கநாயக்கனூர் கிராமத்தைச் சேர்ந்தவர், செல்வகுமார். இவர் தனது சகோதரர் மற்றும் குடும்பத்தாருடன் உசிலம்பட்டி அருகே உள்ள சேடப்பட்டியில் இருக்கும் குலதெய்வ கோயிலுக்கு, ஆம்னி காரில் சென்று வழிபாடுகளை முடித்து விட்டு, நேற்று சொந்த ஊரான எரசக்கநாயக்கனூருக்கு திரும்பி வந்துள்ளார்.
அப்போது, தேனி - குமுளி தேசிய நெடுஞ்சாலையில் வந்த பொழுது, சீலையம்பட்டி அருகே சாலையின் ஓரம் இருந்த புளியமரத்தில் எதிர்பாராத விதமாக கார் மோதி விபத்துக்குள்ளானது. இதில் காரின் முன் பக்கத்தில் அமர்ந்திருந்த நாகராஜ் என்பவர் சம்பவ இடத்திலேயே உயிரிழந்தார். இந்த விபத்தில், காரினை ஓட்டி வந்த செல்வகுமார், அவரது மனைவி நாகலட்சுமி, மகள் கோகிலா மற்றும் நாகராஜனின் மனைவி சுதா உள்பட நான்கு பேரும் பலத்த காயமடைந்தனர்.
இந்த விபத்து குறித்து உடனடியாக சின்னமனூர் போலீசாருக்கு தகவல் தெரிவிக்கப்பட்டது. இத்தகவலறிந்து சம்பவ இடத்திற்கு விரைந்து வந்த போலீசார், படுகாயமடைந்த நான்கு பேரையும் சின்னமனூர் அரசு மருத்துவமனைக்கு சிகிச்சைக்காக அனுப்பி வைத்தனர்.
மேலும், உயிரிழந்த நாகராஜின் உடலைக் கைப்பற்றி பிரேதப் பரிசோதனைக்காக சின்னமனூர் அரசு மருத்துவமனைக்கு அனுப்பி வைத்தனர். இது குறித்து போலீசார் வழக்குப்பதிவு செய்து விசாரணை மேற்கொண்டு வருகின்றனர்.
இதையும் படிங்க: கீழடி அகழாய்வு கடந்து வந்த பாதை.. வை.பாலசுப்பிரமணியம் வைத்த துவக்கப் புள்ளியின் கள நிலவரம் என்ன?
