சேலம்: காவிரியின் நீர்பிடிப்பு பகுதிகளில் பெய்த மழை காரணமாக, கடந்த ஜூலை 3ஆம் தேதி 39.65 அடியாக இருந்த மேட்டூர் அணையின் நீர்மட்டம் படிப்படியாக உயரத் தொடங்கி, ஜூலை 27ஆம் தேதி 100 அடியை எட்டியது. தொடர்ந்து, அணைக்கு நீர்வரத்து அதிகரிப்பால், கடந்த ஜூலை 30ஆம் தேதி முழுக் கொள்ளளவான 120 அடியை எட்டியது.
பின்னர், டெல்டா மாவட்ட பாசனத்திற்காக தொடர்ச்சியாக நீர் திறக்கப்பட்டதால் கடந்த அக்டோபர் 13ஆம் தேதி அணையின் நீர்மட்டம் 89.26 அடியாக சரிந்தது. இந்நிலையில், கடந்த சில நாட்களாக தமிழகம் மற்றும் கர்நாடக எல்லையில் உள்ள காவிரி நீர் பிடிப்பு பகுதியில் பெய்த கனமழையால், மேட்டூர் அணையில் நீர்மட்டம் மீண்டும் அதிகரிக்க தொடங்கியுள்ளது.
நேற்று முன்தினம் வினாடிக்கு 17 ஆயிரத்து 586 கனடியாக இருந்த நீர்வரத்து, நேற்று 29 ஆயிரத்து 29 கன அடியாக உயர்ந்ததுள்ளது. நேற்று முன்தினம் 98.56 அடியாக இருந்த அணையின் நீர்மட்டம் 86 நாட்களுக்குப் பின் நடப்பாண்டில் இரண்டாவது முறையாக நேற்று காலை 100.01 அடியாக உயர்ந்துள்ளது. அணையில் இருந்து காவிரி டெல்டா பாசனத்துக்கு 7 ஆயிரத்து 500 கன அடியும், கிழக்கு, மேற்கு கால்வாய் பாசனத்துக்கு 600 கன அடியும் நீர் திறக்கப்பட்டு வருகிறது.
இதையும் படிங்க: 91வது ஆண்டில் அடியெடுத்து வைக்கும் மேட்டூர் அணை.. டெல்டா மாவட்டங்களின் உயிர்நாடியாக இருப்பது எப்படி?
இதனிடையே, இன்று காலை 8 மணி நிலவரப்படி மேட்டூர் அணை நீர்மட்டம் 101.40 அடியாக உள்ளது. அணையில் நீர் இருப்பு 66.66 டிஎம்சி ஆகவும், நீர் வரத்து வினாடிக்கு 29 ஆயிரத்து 850 கன அடியிலிருந்து 29 ஆயிரத்து 307 கன அடியாக குறைந்துள்ளது. இந்த ஆண்டில் 2-வது முறையாக அணை 100 அடியை எட்டி சாதனை படைத்துள்ளது.
கடந்த 86 நாட்களுக்கு பிறகு அணையின் நீர்மட்டம் 100 அடியை எட்டியுள்ளது. இதனால் விவசாயிகள் மிகுந்த மகிழ்ச்சி அடைந்துள்ளனர். நீர் வரத்து வரும் நாட்களில் அதிகரிக்க வாய்ப்புள்ளதால் மேட்டூர் அணை நீர்மட்டம் மேலும் உயர வாய்ப்புள்ளதாக பொதுப்பணித்துறை அதிகாரிகள் தகவல் தெரிவித்துள்ளனர்.
ஈடிவி பாரத் வாட்ஸ்அப் சேனலில் இணைய இங்கே கிளிக் செய்யவும்
