திருநெல்வேலி: நெல்லை மாவட்ட காங்கிரஸ் தலைவர் ஜெயக்குமார் மரண வழக்கில் ஏழு நாட்களாகியும் தற்போது வரை போலீசாருக்கு துப்பு துலக்க முடியவில்லை. கடந்த மே 2ஆம் தேதி ஜெயக்குமார் காணாமல் போனதாகக் கூறப்பட்ட நிலையில், 4ஆம் தேதி அவரது சொந்த ஊரான கரைசுத்துபுதூரில் அவரது வீட்டிற்கு பின்புறம் உள்ள தோட்டத்தில் ஜெயக்குமார் பாதி உடல் எரிந்த நிலையில் சடலமாக மீட்கப்பட்டார்.
மேலும், ஜெயக்குமாரின் கை கால்கள் இரும்புக் கம்பியால் கட்டப்பட்டதோடு வயிற்றில் கடப்பாக்கல் ஒன்றும் கட்டப்பட்டிருந்தது. முன்னதாக ஜெயக்குமார் எழுதியதாக வெளியான கடிதங்களில் காங்கிரஸ் முக்கிய தலைவர்கள் பெயரைக் குறிப்பிட்டு, அவர்களால் தனக்கு ஆபத்து இருப்பதாக தெரிவித்திருந்தார்.
எனவே, ஜெயக்குமார் மரணம் பெரும் சர்ச்சையை ஏற்படுத்தியது. அரசியல் ரீதியாகவோ அல்லது தொழில் ரீதியாகவோ ஜெயக்குமார் கொல்லப்பட்டாரா அல்லது கடன் தொல்லை காரணமாக தற்கொலை செய்து கொண்டாரா என்ற கோணத்தில் போலீசார் முதல் கட்ட விசாரணையைத் தொடங்கி உள்ளனர்.
அதேநேரம், ஜெயக்குமார் உடல் மீட்கப்பட்ட விதத்தை வைத்து பார்க்கும் போது பெரும்பாலும் தற்கொலை செய்திருக்க வாய்ப்பு இல்லை என்ற முடிவுக்கு போலீசார் வந்தனர். அடுத்த கட்டமாக, ஜெயக்குமாரின் உடற்கூறு ஆய்வில் அவர் கொலை செய்யப்பட்டதற்கான அனைத்து சாத்தியக்கூறுகளும் இடம் பெற்றிருந்தது.
அதாவது, பெரும்பாலும் ஏற்கனவே உயிரிழந்த உடலை எரித்தால் மட்டுமே நுரையீரலில் திரவங்கள் தாங்காது. அந்த வகையில், ஜெயக்குமாரின் நுரையீரலிலும் திரவங்கள் தங்கவில்லை என கூறப்படுகிறது. இதன் மூலம் ஜெயக்குமார் கொலை செய்யப்பட்டிருப்பது கிட்டத்தட்ட உறுதியானது.
ஆனால், யார் கொலையாளிகள் என்பதை இன்னும் கண்டுபிடிக்கவில்லை. ஜெயக்குமாரின் மரணத்திற்குப் பின்னால் அவரது குடும்பத்தினருக்கும் தொடர்பு இருக்கலாம் என போலீசாருக்கு மிகப்பெரிய சந்தேகம் இருந்து வருகிறது. ஜெயக்குமார் காணாமல் போனதாக அவரது மூத்த மகன் கருத்தையா ஜாப்ரின் காவல் நிலையத்தில் புகார் அளித்ததில் தொடங்கி ஜெயக்குமார் சடலம் மீட்கப்பட்டு அடக்கம் செய்யப்பட்டது வரை ஜெயக்குமாரின் குடும்பத்தினர் மீது போலீசாரின் பார்வை இருந்து வருவதாகக் கூறப்படுகிறது.
அதாவது ஜெயக்குமார் காணாமல் போனதாக கூறப்படும் கடந்த மே 2ஆம் தேதி இரவு 10.45 மணி வரை ஜெயக்குமார் உயிரோடு நடமாடியதற்கான சிசிடிவி ஆதாரங்கள் போலீசாருக்கு கிடைத்துள்ளது. இரவு 10.30 மணி அளவில், ஜெயக்குமார் தனது ஊரில் உள்ள சூப்பர் மார்க்கெட் ஒன்றில் டார்ச் லைட் வாங்கும் சிசிடிவி காட்சி ஒன்று வெளியானது.
அதில் அவர் இயல்பாகவே காணப்பட்டார். அதைத் தொடர்ந்து 10.45 மணியளவில் அந்த வழியாக அவரது கார் கடந்து செல்லும் வீடியோவும் போலீசாருக்கு கிடைத்துள்ளது. மேலும், ஜெயக்குமார் கார் அவரது வீட்டின் முன்பு நிறுத்தப்பட்டுள்ளது. ஆனால் ஜெயக்குமார் வீட்டுக்குள் செல்லவில்லை என கூறப்படுகிறது. எனவே, காரை ஜெயக்குமார் தனது வீட்டில் நிறுத்திவிட்டு எங்கே சென்றார் என்பதற்கான விடை இன்னும் கிடைக்கவில்லை.
ஒருவேளை மர்ம நபர்கள் அவர்கள் அவரை பின்தொடர்ந்து காரில் இருந்து இறங்கியதும் கடத்திச் சென்றார்களா என்ற கேள்வியும் போலீசாருக்கு எழுந்தது. அதேநேரம், ஜெயக்குமார் உடல் மீட்கப்பட்ட தோட்டம் அவரது வீட்டிற்குப் பின்னால் சுமார் 300 அடி தூரத்தில் மட்டுமே அமைந்துள்ளது.
எனவே தந்தையைக் காணவில்லை என்றதும், குறைந்தபட்சம் அருகில் உள்ள தோட்டத்தில் சென்று குடும்பத்தினர் தேடாமல் இருந்தது ஏன் என்ற கேள்வியும் போலீசாருக்கு எழுந்தது. மேலும், ஜெயக்குமார் எழுதியதாகக் கூறப்படும் கடிதங்களிலும் பல்வேறு சந்தேகங்கள் போலீசாருக்கு இருப்பதாகக் கூறப்படுகிறது.
அதன் அடிப்படையில், தனிப்படை போலீசார் ஜெயக்குமார் வீட்டில் முகாமிட்டு, தொடர்ச்சியாக விசாரணை மேற்கொண்டு வருகின்றனர். அப்போது ஜெயக்குமாரின் மூத்த மகன் கருத்தையா ஜாப்ரின், 2ஆம் தேதி நான் ஊரில் இல்லை, 3ஆம் தேதி மாலை தான் ஊருக்கு வந்தேன்.
அதன் பிறகே தந்தையைக் காணவில்லை என புகார் அளித்தேன் என போலீசாரிடம் தெரிவித்ததாகக் கூறப்படுகிறது. இருப்பினும், மீண்டும் மீண்டும் போலீசாருக்கு ஜெயக்குமாரின் மகன்கள் மீது சந்தேகம் இருந்ததால், இருவரின் செல்போன்களையும் ஆய்வு செய்தனர்.
அதில் இருவரும் கடந்த மே 2ஆம் தேதி புது நபர்கள் யாருக்கும் செல்போனில் தொடர்பு கொண்டார்களா அல்லது சந்தேகப்படும்படி யாரிடமும் பேசினார்களா என ஆய்வு செய்தனர். அப்போது இரு மகன்களில் ஒருவரின் செல்போனுக்கு மும்பையிலிருந்து தொடர்ச்சியாக போன் வந்தது தெரிய வந்துள்ளது.
அதேபோல், அவரது மகனும் தொடர்ச்சியாக மும்பை நம்பருக்கு பேசியுள்ளார். எனவே, அதன் அடிப்படையில் மும்பையில் அவர் யாரை தொடர்பு கொண்டார், ஜெயக்குமார் மரணத்திற்கும், மும்பை போன் காலுக்கும் சம்பந்தம் இருக்கிறதா என விசாரணையைத் தீவிரப்படுத்தினர்.
அதுமட்டுமல்லாது, மறைந்த ஜெயக்குமாருக்கு இளம்பெண் ஒருவருடன் தொடர்பு இருந்ததாகக் கூறப்படுகிறது. எனவே, அந்த பெண்ணிடமும் விசாரித்தனர். ஆனால், தற்போது வரை ஜெயக்குமார் வழக்கில் சிறிய தடயங்கள் கூட கிடைக்கவில்லை போல் தெரிகிறது.
எனவே, ஜெயக்குமார் உடல் கிடந்த தோட்டத்தின் கிணற்றில் தடயங்கள் எதுவும் சிக்குமா என்பதை ஆராய போலீசார் கிணற்றிலிருந்து தண்ணீரை மின் மோட்டார்கள் மூலம் வெளியே இறைக்கும் பணியில் நேற்று முதல் ஈடுபட்டு வருகின்றனர்.
தொடர்ந்து நேற்று இரவு விடிய விடிய அந்தப் பணிகள் நடைபெற்ற நிலையில், இன்று கிணற்று நீரை முழுமையாக வெளியே இறைத்து அங்கு தடயங்கள் இருக்கிறதா என ஆய்வு செய்ய உள்ளனர். குறிப்பாக, ஜெயக்குமார் பயன்படுத்திய இரண்டு செல்போன்கள் மாயமாகியுள்ளது.
தற்போது வரை அந்த செல்போன்கள் எங்கே இருக்கிறது என்பதை போலீசாரால் கண்டுபிடிக்க முடியவில்லை. எனவே, கிணற்றுக்குள் அவரது செல்போன் வீசப்பட்டதா என ஆய்வு செய்ய உள்ளனர். குறிப்பாக, ஜெயக்குமார் உடல் கடப்பாக்கல்லால் கட்டப்பட்டிருந்ததால், ஒருவேளை அவர் கிணற்றில் கல்லைக் கட்டி இறக்கி கொலை செய்யப்பட்டாரா என்பதையும் ஆய்வு செய்ய உள்ளனர்.
மேலும், ஜெயக்குமாரின் செல்போன் எண்கள் மூலம் கடந்த 1 மாத காலத்தில் 2,000க்கும் மேற்பட்டோரிடம் பேசியுள்ளதாகக் கூறப்படும் நிலையில், அவர்களை விசாரணை வளையத்திற்குள் கொண்டுவர தனிப்படை திட்டமிட்டுள்ளதாக தகவல் வெளியாகியுள்ளன. இதனால் ஜெயக்குமார் வழக்கில் தொடர்ந்து பரபரப்பு நீடித்து வருகிறது.
இதையும் படிங்க: கராத்தேவில் பிளாக் பெல்ட்.. நெல்லை ஜெயக்குமார் பற்றி வெளியான ரகசியம்!
