தேனி: தமிழ்நாடு முன்னாள் முதலமைச்சரும், ராமநாதபுரம் மக்களவைத் தொகுதி பாஜக ஆதரவு சுயேட்சை வேட்பாளருமான ஓ.பன்னீர்செல்வம், பெரியகுளம் கைலாசப்பட்டியில் உள்ள பண்ணை வீட்டில் நடந்த ஆலோசனைக் கூட்டத்தில் அவரது ஆதரவாளர்களிடம் பேசும் போது, "வரும் நாடாளுமன்றத் தேர்தலில் தொண்டர்களை களம் இறக்கினால் மிகப்பெரும் பொருளாதாரச் செலவு ஏற்படும்.
அந்த செலவுகளுக்குப் பின்னாலும், பல்வேறு சோதனைகளை தொண்டர்கள் சந்திக்க நேரிடும். எனவே, தொண்டர்களை சோதனைக்கு உள்ளாக்க வேண்டாம் என்பதற்காகத்தான், இந்த மாபெரும் பொறுப்பை நானே ஏற்று மக்களவைத் தேர்தலில் போட்டியிடுகிறேன்.
கடந்த 1999இல் பெரியகுளம் மக்களவைத் தொகுதியில் டிடிவி தினகரன் வெற்றி பெற்று எம்.பியானார். நலத்திட்டங்கள் மூலம் தாராள மனப்பான்மையை கற்றுக் கொடுத்தவர். அதற்குப் பின் நடைபெற்ற தேர்தலில் அவர் தோல்வியைத் தழுவினாலும், அவரது எண்ணம், செயல், இதயம் தேனியைச் சுற்றியே இருந்தது என்பதை நான் நன்றாகவே அறிவேன். அதன்படி, தேனி தொகுதியில் டிடிவி தினகரன் போட்டியிட நாங்கள் விருப்பம் தெரிவித்தோம்.
அதன்படி தேனி மக்களவை தொகுதியில் தேசிய ஜனநாயகக் கூட்டணி ஆதரவுடன் போட்டியிடும் டிடிவியை வெற்றி பெறச் செய்யப் பாடுபட வேண்டும். தேசிய ஜனநாயகக் கூட்டணியில் மக்களவைத் தேர்தலில் நான் போட்டியிட வேண்டும் என்று கூட்டணி தலைமை, தொண்டர்கள் விரும்பினர்.
"நான் எங்கு போய் நிற்பேன், தேனியில் தானே நான் நிற்க வேண்டும்" என்று டிடிவி தினகரனும் தேனியை விரும்பியதால், நமது நன்றிக்கடனாக தேனி தொகுதியை அவருக்கு கொடுத்துள்ளோம். நான் எங்கு போட்டியிட வேண்டும் என்பதை ரகசியமாக வைத்திருந்தேன்.
நீதி கேட்க ராமநாதபுரம் தான் சரியான தொகுதி என்று முடிவு செய்தேன். சரியான விடை அவர்களால் தான் தர முடியும். அதிமுக உண்மை தொண்டர்களின் உரிமையைக் காக்கும் இந்த போராட்டம் வெற்றியடைந்து, அது ஒரு சக்தியாக வெளிப்படும் தொகுதி ராமநாதபுரம் தான்.
நான் ராமநாதபுரம் சென்றாலும், என் இதயம் இங்கு தான் இருக்கும். டிடிவி தினகரனை அமோக வெற்றியடையச் செய்ய வேண்டும்” என்று பேசினார். முன்னதாக ஓ.பன்னீர்செல்வத்தை 'வருங்கால மத்திய அமைச்சர்' என நிர்வாகி ஒருவர் கோஷமிட்டதால், அதிர்ந்து போன பன்னீர்செல்வம் அவரை அமைதியாக இருக்குமாறு கூறினார்.
இதையும் படிங்க: தேனி தொகுதியை காங்கிரஸ் கட்சிக்கு ஒதுக்கீடு செய்யாதது ஏன்? தங்க தமிழ்ச்செல்வன் விளக்கம்! - DMK Thanga Tamilselvan
