விழுப்புரம்: நாடாளுமன்ற மக்களவைத் தேர்தலுக்கு இன்னும் இரண்டு தினங்களே உள்ள நிலையில், தமிழகம் மற்றும் புதுச்சேரியில் அனைத்து கட்சியினரும் தீவிர வாக்கு சேகரிப்பில் ஈடுபட்டுள்ளனர். அந்த வகையில், விழுப்புரம் நாடாளுமன்றத் தொகுதியில் இந்தியா கூட்டணிக் கட்சிகளின் சார்பில் போட்டியிடும் விடுதலைச் சிறுத்தைகள் கட்சி வேட்பாளர் து.ரவிக்குமார்-யை ஆதரித்து அமைச்சர் செஞ்சி மஸ்தான் திண்டிவனம் ஜெயபுரம், நள்ளிகொண்டபுரம் பகுதியில் பரப்புரை மேற்கொண்டார்.
அப்போது பேசிய அமைச்சர் செஞ்சி மஸ்தான், “இந்த நாடாளுமன்றத் தேர்தல் இந்தியாவை யார் ஆள வேண்டும், யார் ஆள கூடாது என்பதை நிர்ணயிக்கும் தேர்தல். என்ன காரணத்துக்காக ஆளக்கூடாது, என்ன காரணத்துக்காக ஆள வேண்டும் என்பதற்காக நடைபெறுகிற தேர்தல். சட்டமன்ற தேர்தலில் மக்களுடைய ஆதரவைப் பெற்ற தமிழ்நாடு முதலமைச்சர் ஸ்டாலின் ஆட்சிப் பொறுப்பை ஏற்ற மூன்று ஆண்டுகளில் பல்வேறு சாதனைகளைப் படைத்திருக்கிறார்.
அவர் சொன்ன வாக்குறுதிகளை எல்லாம் நிறைவேற்றி இருக்கிறார். மகளிர் உரிமைத் தொகை, விடியல் பயணம், புதுமைப்பெண் திட்டம், இல்லம் தேடி மருத்துவம், இல்லம் தேடி கல்வி என்று பல்வேறு திட்டங்களை மக்களுக்காகப் பார்த்துப் பார்த்து செயல்படுத்தி வருகிறார். இந்த கல்வியாண்டில் இருந்து மாணவர்களுக்கும் தமிழ் புதல்வன் திட்டம் மூலமாக மாதம் ரூபாய் ஆயிரம் கொடுக்கப்படுகிறது.
முதலமைச்சர் சொன்னதை எல்லாம் நிறைவேற்றிக் கொண்டிருக்கிறார். விவசாயிகளுடைய கடனை தள்ளுபடி செய்தோம். விவசாயிகளுக்கு இலவச மின்சாரம் தமிழகத்தில் கலைஞர் ஆட்சியில் வழங்கினார். அதை தொடர்ந்து நம்முடைய முதலமைச்சர் குறுகிய காலத்தில் 2 லட்சம் விவசாயிகளுக்கு மின் இணைப்பை வழங்கியுள்ளார். மறுபுறம் இந்தியா விவசாயிகள் டெல்லிக்கு சென்று வேளாண் சட்டத்தை எதிர்த்துப் போராடி வருகிறார்கள்.
மோடி ஆட்சி வந்த பிறகு விவசாயிகள் போராட்டத்தில் இதுவரையிலும் ஒரு லட்சத்து 20 ஆயிரம் பேர் இறந்துள்ளனர். இந்த பாசிச அரசு முற்றிலும் விவசாயிகளுக்கு எதிரான அரசாக இருக்கிறது. இந்த தேர்தலில் விவசாயிகளைக் கொன்று குவித்த மோடிக்கு பாடம் புகட்ட வேண்டும். அது மட்டுமல்ல விவசாயக் கடனை தள்ளுபடி செய்ய முடியாது என்று அடம்பிடிக்கிறார்.
அதே நேரத்தில் டாட்டா, பிர்லா, அம்பானி, அதானி போன்ற 10 பணக்காரர்களுக்கு 25 லட்சம் கோடி கடன் தள்ளுபடி செய்து விவசாயிகளை வஞ்சித்து வருகிறார். மேலும், வெளிநாடுகளில் இருக்கிற கருப்புப் பணத்தை எல்லாம் மீட்டு ஒவ்வொரு குடும்பத்திற்கும் 15 லட்சம் வழங்குவேன் என்று மக்களை ஏமாற்றி 15 பைசா கூட வழங்காத மோசடி பேர்வழி தான் மோடி.
அதுமட்டுமல்லாமல், ஆண்டுக்கு 2 கோடி பேருக்கு வேலை வாய்ப்பை வழங்குகிறேன் என்று சொன்னார். இதுவரை தமிழகத்தைச் சார்ந்த எவருக்கும் வேலை கிடைக்கவில்லை. ஆனால் நம்முடைய முதலமைச்சர் திண்டிவனத்திலேயே சிப்காட் தொழிற்பேட்டையை உருவாக்கி 25 ஆயிரம் பேருக்கு வேலை வாய்ப்பை வழங்கி இருக்கிறார்.
உண்மையில் குலக்கல்வியும், சனாதனத்தையும் முன்னிறுத்துவது தான் மோடி ஆட்சியின் சித்தாந்த தத்துவம். எல்லோரும் சமம் எல்லாருக்குமான கல்வி, உரிமை என்பது அவர்களால் ஏற்றுக் கொள்ள முடியாது. அவர்களைப் பொறுத்தவரை நாம் எல்லோரும் முட்டாள்களாக இருக்க வேண்டும். படித்து முன்னேறக் கூடாது. எனவே இந்த தேர்தலில் பாசிச பாஜகவிற்கும், அதிகாரம் மோடிக்கும் பாடம் புகட்ட வேண்டும்” என்றார்.
