மதுரை: ஆசிரியர் தேர்வு வாரியம் மூலம் தெரிவு செய்யப்பட்ட 33 நேரடி நியமன வட்டாரக் கல்வி அலுவலர்களுக்கு, பள்ளிக் கல்வித் துறை அமைச்சர் அன்பில் மகேஷ் பொய்யாமொழி பணி நியமன ஆணைகளை மதுரை கலைஞர் நூற்றாண்டு நூலக கூட்ட அரங்கில் நடைபெற்ற நிகழ்வில் வழங்கினார்.
இந்நிகழ்ச்சியில் பேசிய பள்ளிக்கல்வித்துறை அமைச்சர் அன்பில் மகேஷ் பொய்யாமொழி, “புதிதாக நேரடி நியமனம் பெறக்கூடிய வட்டார கல்வி அலுவலர்கள் சொந்த விருப்பு வெறுப்புகளுக்கு அடிபணியாமல் பணியாற்றுவதன் மூலம் தான் நல்ல நிர்வாகத்தை தர முடியும். தங்கள் பணி புரிகின்ற பகுதிகளுக்கு ஏற்றவாறு தங்களது நிர்வாக திறனை வளர்த்துக் கொள்வது அவசியம்” என்றார்.
இது குறித்து தொடக்கக்கல்வி இயக்ககம், “பள்ளிக் கல்வித் துறையின் ஓர் அங்கமாக தொடக்கக் கல்வி இயக்ககம் செயல்பட்டு வருகின்றது. தமிழ்நாட்டில் இயங்கி வரும் அனைத்து அரசு மற்றும் அரசு உதவிபெறும் தொடக்க, நடுநிலைப் பள்ளிகளின் ஒன்றிய அளவிலான ஆய்வு அலுவலர்களாக செயல்படுபவர்கள் தொடக்கக் கல்வி இயக்ககத்தில் பணிபுரியும் வட்டாரக் கல்வி அலுவலர்கள் ஆவர்.
ஒன்றிய அளவில் செயல்படும் அரசு மற்றும் அரசு உதவிபெறும் தொடக்க, நடுநிலைப் பள்ளிகளை ஆய்வு செய்தல், ஆசிரியர்களுக்கு ஊதியம் பெற்று வழங்குதல், அரசின் நலத்திட்ட உதவிகளை மாணவர்களுக்கு கொண்டு சேர்த்தல் மற்றும் மாணவர்களின் வகுப்பறைக் கற்றல் மேம்பாட்டினை தொடர்ந்து கண்காணிப்பது இவர்களின் முக்கிய பணியாகும்.
அரசாணை (நிலை எண்.82, பள்ளிக் கல்வி (தொ.க.1(1) துறை, நாள் 20.05.2019ன்படி காலி ஏற்படும் மொத்த வட்டாரக் கல்வி அலுவலர் பணியிடங்களில் 50 சதவீதம் நேரடி நியமனமாக செய்யப்படும். இக்கல்வியாண்டில் தொடக்கக் கல்வி இயக்ககத்தால் கோரப்பட்ட 33 பணியிடங்களுக்கான பணி நாடுநர்களை ஆசிரியர் தேர்வு வாரியம் தெரிவு செய்து அனுப்பி உள்ளது. தமிழ்நாட்டில் உள்ள 414 ஒன்றியங்களில் 851 வட்டாரக் கல்வி அலுவலர் பணியிடங்கள் அனுமதிக்கப்பட்டு உள்ளன.
அதில் நடப்பாண்டில் காலியாக உள்ள வட்டாரக் கல்வி அலுவலர் பணியிடங்களின் 50 சதவீத காலி பணியிடங்களுக்கு ஆசிரியர் தேர்வு வாரியத்தின் மூலம் தெரிவு செய்யப்பட்ட 33 நபர்களுக்கு மதுரை மாநகரில் அமைந்துள்ள கலைஞர் நூற்றாண்டு நூலக அரங்கத்தில் பணி நியமன ஆணைகளை தமிழ்நாடு பள்ளிக் கல்வித் துறை அமைச்சர் அன்பில் மகேஷ் வழங்கினார்” என்று தெரிவித்து உள்ளது.
மேலும், இந்நிகழ்ச்சியில் குமரகுருபரன், பள்ளிக் கல்வித் துறை செயலாளர், பள்ளிக் கல்வி இயக்குநர், தொடக்கக் கல்வி இயக்குநர் மற்றும் உயர் அலுவலர்கள் பங்கேற்றனர்.
இதையும் படிங்க: உயர்கல்வி நிறுவனங்களில் இட ஒதுக்கீடு நீக்கம் - யுஜிசி அறிவிப்பிற்கு மத்திய கல்வி அமைச்சகம் மறுப்பு!
