ஈரோடு: தமிழ்நாடு முழுவதும் நேற்று முதல் 18ஆம் தேதி வரை, திமுக சார்பில் உரிமைகளை மீட்க ஸ்டாலினின் குரல் என்கிற பெயரில் நாடாளுமன்ற பரப்புரை பொதுக்கூட்டம் நடத்தப்பட்டு வருகிறது. இதனைத் தொடர்ந்து, ஈரோடு தொகுதிக்கான பரப்புரை கூட்டம் ஆணைக்கல்பாளையத்தில் நடைபெற்றது.
இதில் பள்ளிக்கல்வித்துறை அமைச்சர் அன்பில் மகேஷ், மதுவிலக்கு மற்றும் ஆயத்தீர்வைத்துறை அமைச்சர் முத்துசாமி, செய்தித்துறை அமைச்சர் சாமிநாதன், ஆதிதிராவிடர் நலத்துறை அமைச்சர் கயல்விழி செல்வராஜ் ஆகியோர் உள்பட ஆயிரக்கணக்கான திமுகவினர் பங்கேற்றனர்.
இதைத் தொடர்ந்து பரப்புரை பொதுக்கூட்டத்தில் பேசிய பள்ளிக்கல்வித் துறை அமைச்சர் அன்பில் மகேஷ், “தமிழ்நாட்டை மத்தியில் ஆளும் பாஜக எப்படியெல்லாம் வஞ்சித்தது, அதற்கு துணையாக அதிமுக எப்படி செயல்பட்டது என்பதை மக்கள் மறந்து விடக்கூடாது. நாட்டின் ஜனநாயகத்தின் வேரில் வெந்நீர் பாய்ச்சிய பாஜகவிற்கு, தமிழ்நாடு மக்கள் நாடாளுமன்றத் தேர்தல் வாயிலாக பாடம் கற்பிக்க வேண்டும். பாஜகவைச் சேர்ந்த மோடி, அமித்ஷா, நட்டா ஆகியோரால் நாள்தோறும் திமுக பற்றி பேசமால் தூங்க முடியவில்லை. பாஜகவின் ஆயுதமாக வருமானவரித்துறை, சிபிஐ, அமலாக்கத்துறை இருக்கிறது.
வரும் காலங்களில் தேர்தல் இருக்குமா இருக்காதா, ஜனநாயகம் நீடிக்குமா நீடிக்காதா, மாநிலத்தின் உரிமைகள் நிலை நாட்ட முடியுமா முடியாதா என்பதை நிலை நாட்டத்தான் நாடாளுமன்றத் தேர்தல் வருகிறது. பிரதமர் மோடி மாநிலங்கள்தோறும் சென்று கோயில் மட்டும் திறந்து வைத்து வருகிறார். டெல்லியில் போராடும் விவசாயிகளை அழைத்து பேச்சுவார்த்தை நடத்தாமல், பிரதமர் மோடி கார்பரேட் நிறுவனங்களுக்கு சிகப்பு கம்பளமும், விவசாயிகளுக்கு முள்படுக்கையும் விரிக்கிறார்.
முன்னாள் முதல்வர் ஜெயலலிதாவிற்குப் பிறகு, 2016ஆம் ஆண்டு முதல் மாநில உரிமைகள் அனைத்தும் டெல்லியில் உள்ள மருத்துவமனையில் அடகு வைக்கப்பட்டது. 2016ஆம் ஆண்டு நீட் கட்டாயமாக்கப்பட்டபோது, அதிமுக நாடாளுமன்ற உறுப்பினர்கள் 52 பேர் எதிர்த்து கையெழுத்து போட்டிருந்தால் நீட் வந்திருக்காது. தமிழ்நாட்டில் சுகாதார கட்டமைப்பு வலுவாக இருப்பதால், மத்திய அரசின் கண்னை உறுத்துவதாக" தெரிவித்துள்ளார்.
இதைத் தொடர்ந்து பேசிய ஆதிதிராவிடர் நலத்துறை அமைச்சர் கயல்விழி செல்வராஜ், “பாஜக தலைவர் அண்ணாமலை பொய்யான தகவல்களை பரப்பி, மக்களை முட்டாள் என்று நினைத்துக் கொண்டு பேசுகிறார். ஆனால், மக்கள் ஏமாறமாட்டார்கள். எல் முருகன், நிதியமைச்சர் நிர்மலா சீதாராமன் போன்றவர்கள் தேர்தலில் போட்டியிட்டு வெற்றி பெறாமல், மோடியின் ஆசியால் அமைச்சராக உள்ளனர்.
ஊட்டி நாடாளுமன்றத் தொகுதியில் மத்திய இணை அமைச்சர் எல்.முருகன், கடந்த இரண்டு ஆண்டுகளாக வேலை செய்து வந்த நிலையில், மகாராஷ்டிரா மாநிலத்தில் இருந்து மாநிலங்களவைக்கு வேட்புமனுத் தாக்கல் செய்துள்ளார். ஏனென்றால், திமுக எம்பி ஆ.ராசா எதிர்த்து போட்டியிட்டால் டெபாசிட் கூட பெற மாட்டோம் என்று எல்.முருகன் மாநிலங்களவைக்கு போட்டியிடுகிறார். தேர்தலைச் சந்திக்கமால் பொறுப்பு வாங்க வேண்டும் என்ற எண்ணத்தில் பாஜக நிர்வாகிகள் பேசி வருகின்றனர். தாமரை மலரும் என்று சொல்லும் பாஜகவினருக்கு உதய சூரியன்தான் உதயமாகும் என்று பதிலடி கொடுக்க வேண்டும்” என பேசினார்.
இதையும் படிங்க: ஈரோடு மாநகராட்சி அவசர மாமன்ற கூட்டத்திலிருந்து அதிமுக வெளிநடப்பு.. காரணம் என்ன?
