திருநெல்வேலி: மாஞ்சோலை மேற்குத் தொடர்ச்சி மலைப்பகுதியில் அமைந்துள்ள தேயிலைத் தோட்டங்களில் ஒப்பந்த காலம் விரைவில் முடிவடையுள்ள நிலையில், அங்குள்ள தொழிலாளர்களை விருப்ப ஓய்வு கொடுத்து வெளியேற்றும் பணி நடந்து வருகிறது.
இந்த விவகாரம் தொடர்பாக பல்வேறு தரப்பினர் நீதிமன்றம் மற்றும் மனித உரிமை ஆணையம் உள்ளிட்ட இடங்களில் வழக்கு தொடர்ந்தனர். இந்தச் சூழலில் தேசிய மனித உரிமை ஆணையத்திடம் புதிய தமிழகம் கட்சித் தலைவர் கிருஷ்ணசாமி அளித்த புகாரினை ஏற்று கள ஆய்வு மேற்கொண்டு, சம்பந்தப்பட்ட நபர்களிடம் விசாரணை நடத்த ஆணையம் உத்தரவு பிறப்பித்தது.
இந்த விசாரணையை மேற்கொள்ள, தேசிய மனித உரிமை ஆணைய டிஎஸ்பி ரவி சிங் மற்றும் ஆய்வாளர் யோகேந்தர் குமார் திரிபாதி உள்ளிட்டோர் அதிகாரிகளாக நியமிக்கப்பட்டனர். தொடர்ந்து நான்கு நாட்கள் நெல்லை மாவட்டத்தில் தங்கி இருந்து விசாரணையை அதிகாரிகள் மேற்கொள்ள உள்ள நிலையில், முதற்கட்டமாக மாவட்ட ஆட்சியர், மாவட்ட காவல் கண்காணிப்பாளர், தொழிலாளர் நலத்துறை, வனத்துறை ஆகியோரிடம் மாஞ்சோலை தொடர்பாக பொதுமக்கள் அளித்த மனு குறித்தும், மனு மீது எடுக்கப்பட்ட நடவடிக்கை குறித்தும் ஆலோசனை மேற்கொண்டனர்
இந்த ஆலோசனைக் கூட்டத்தில் நெல்லை மாவட்ட ஆட்சித் தலைவர் கார்த்திகேயன், மாவட்ட காவல் கண்காணிப்பாளர் சிலம்பரசன், களக்காடு முண்டந்துறை புலிகள் காப்பகம் அம்பை கோட்ட துணை இயக்குநர் இளையராஜா, தொழிலாளர் நலத்துறை நெல்லை மண்டல இணை ஆணையாளர் சுமதி மற்றும் வருவாய்த் துறை அதிகாரிகள் கலந்து கொண்டனர்.
தொடர்ந்து, மாஞ்சோலை தேயிலைத் தோட்டத் தொழிலாளர்களிடம் மனித உரிமை ஆணையம் விசாரணை நடத்தி வருகிறது. முன்னதாக, மாஞ்சோலை கிராமத்திற்குள் நுழையும் முன்பு நடுகாட்டில் மையப்பகுதியில் சாலையில் அமர்ந்து புகார் தெரிவித்த புதிய தமிழகம் கட்சித் தலைவர் டாக்டர் கிருஷ்ணசாமியிடம் விசாரணை மேற்கொண்டனர்.
பின்னர், மாஞ்சோலை மக்களைச் சந்தித்த மனித உரிமை ஆணைய குழுவினர், வீடு வீடாகச் சென்று மக்களைச் சந்தித்து விசாரணை மேற்கொண்டு வருகின்றனர். வழிப்பாட்டுத் தலங்களுக்குச் சென்றும் ஆய்வை மேற்கொண்டு வருகின்றனர். இரண்டாவது நாளாக இன்றும் விசாரணை நடைபெறும் என தகவல் தெரிவிக்கப்பட்டுள்ளது.
இதையும் படிங்க: “அச்சத்தின் காரணமாக கைதிகள் குறைகளை சொல்வதில்லை” - உயர் நீதிமன்றம் கருத்து!
