மதுரை: மதுரை மாவட்டம், மேலூர் வட்டத்தில் உள்ள அரிட்டாபட்டி, அ.வல்லாளப்பட்டி, நரசிங்கம்பட்டி, வெள்ளரிப்பட்டி, மீனாட்சிபுரம், மாங்குளம், கிடாரிப்பட்டி, எட்டிமங்கலம், கல்லம்பட்டி, தெற்கு தெரு, புலிப்பட்டி போன்ற பகுதிகளை உள்ளடக்கிய சுமார் 5000 ஏக்கரில் அமையவிருக்கும் டங்ஸ்டன் கனிம சுரங்கத்திற்கு எதிர்ப்பு தெரிவித்து மதுரை மாவட்ட ஆட்சியர் அலுவலகம் முன்பாக கவனயீர்ப்பு ஆர்ப்பாட்டம் இன்று நடைபெற்றது.
இதில் பாரம்பரிய பண்பாட்டு மண்டலமாக அறிவித்திடு வேளாண்மை மண்டலமாக்கிட சட்டம் இயக்கம் மற்றும் டங்ஸ்டன் சுரங்கங்கத்திட்ட எதிர்ப்பு மக்கள் கூட்டமைப்பு என பல்வேறு அமைப்புகளின் சார்பில் சுமார் 150க்கும் மேற்பட்டோர் பங்கேற்றனர். இது குறித்து பேசிய டங்ஸ்டன் சுரங்கத் திட்ட எதிர்ப்பு மக்கள் கூட்டமைப்பின் ஒருங்கிணைப்பாளர் மகாலட்சுமி, “டங்ஸ்டன் கனிமம் எடுப்பதற்கு மத்திய அரசு அனுமதி தரக்கூடாது என்பதை வலியுறுத்தி இந்த ஆர்ப்பாட்டம் நடைபெறுகிறது.
பல்வேறு வகையான உயிரினங்களின் வாழ்விடமாக அரிட்டாபட்டி திகழ்கிறது. இதுபோன்ற இடங்களை கனிம சுரங்கம் அமைப்பதற்காக ஏலம் விடுவதை ஏற்க முடியாது. ஐந்தாயிரம் ஏக்கர் என இவர்கள் குறிப்பிடுகிறார்கள். பிறகு ஐம்பதாயிரம் ஏக்கராக அது மாறும். இது மேலூர் பகுதி மக்களுக்கு அச்சத்தை ஏற்படுத்திகிறது.
ஜனநாயகத்தின் மீது நம்பிக்கை வைத்திருக்கும் இந்த மக்களுக்கு தமிழக அரசு என்ன பதில் சொல்ல நினைக்கிறது? இந்த திட்டம் மேலூர் பகுதிக்கு மட்டுமின்றி மதுரைக்கே ஆபத்து விளைவிக்கக்கூடிய திட்டமாகும். மேலூர் பகுதி மக்களை அகதிகளாக்கும் திட்டத்தின் அடிப்படையில் மோடி அரசு இந்த திட்டத்தை கொண்டு வருகிறது என குற்றம் சாட்டுகிறோம். இதற்காக நாங்கள் கூட்டமைப்பாக இணைந்து தொடர்ச்சியாக குரல் கொடுப்போம்” என்றார்.
இதையும் படிங்க: "தவெக தலைவர் விஜயை மணிப்பூர் அழைத்து செல்ல தயார்"- பாஜக மாநில தலைவர் அண்ணாமலை பேட்டி!
மேலும் மகளிர் ஆயத்தின் தலைவர் அருணா கூறுகையில், “இந்தியாவிலேயே தமிழகத்தில் தான் பூமிக்கு அடியில் நிறைய கனிம வளங்கள் உள்ளன. நெய்வேலி பழுப்பு நிலக்கரி, சேலம் உருக்காலை, தாமிரபரணி ஆற்றின் கரையில் உள்ள தாமிர வளங்கள் என ஏராளமான கனிமங்கள் இங்கே உள்ளன. ஆனால் மத்திய அரசு செயற்கைக்கோள்கள் வாயிலாக இவற்றையெல்லாம் அறிந்து மொத்த தமிழகத்தையும் குறி வைக்கிறது.
டங்ஸ்டன் போன்ற கனிமங்களை எடுக்கிறோம் என்ற பெயரால் தமிழ் மண்ணை தமிழ் இனத்தை அழிக்க நினைக்கிறது. தூத்துக்குடி ஸ்டெர்லைட் ஆலையை 13 பேர் உயிரைக் கொடுத்து அப்புறப்படுத்தினார்கள். அதே குழுமம் இங்கே டங்ஸ்டன் என்ற பெயரில் சுரண்ட நினைக்கிறது. மேலூர் வட்டத்திற்குள் அடங்கும் அரிட்டாபட்டி, மிகப் பழமையான தமிழி எழுத்துக்களுக்கு பெயர் பெற்ற இடமாகும். மேலும் முல்லைப் பெரியாறு பாசனத்திற்கு உட்பட்டு முப்போகம் விளையக்கூடிய மண். டங்ஸ்டன் கனிம சுரங்கம் என்ற பெயரில் அந்த இயற்கை தாயின் மார்பை அறுக்க துடிப்பதை ஒருபோதும் அனுமதிக்க மாட்டோம்” என்றார்.
இந்நிலையில் இன்று காலை நடந்த சட்டப்பேரவை கூட்டத்தொடரில் உறுபினர்கள் அனைவரும் இணைந்து ஒரு மனதாக டங்ஸ்டன் சுரங்கத் திட்டத்திற்கு எதிராக தீர்மானம் நிறைவேற்றப்பட்டது குறிப்பிடத்தக்கது.
