மதுரை: தேனி மாவட்டத்தைச் சேர்ந்த மகாராஜன் என்பவர், உயர் நீதிமன்ற மதுரை அமர்வில் மனுத் தாக்கல் செய்தார். அந்த மனுவில், தேனி மாவட்டம், அல்லிநகரம் அருகே அரசு புறம்போக்கு நிலத்தில் சட்ட விரோதமாக கல்குவாரி நடத்தி, அரசு அனுமதி அளித்துள்ள அளவை விட, விதிமுறைகளையும் பின்பற்றாமல் அளவுக்கு அதிகமாக சுமார் 32,000 யூனிட் அளவிலான உடைகற்கள் மற்றும் மண் எடுத்துள்ளனர்.
இதனால் தமிழ்நாடு அரசுக்கு சுமார் 100 கோடி ரூபாய் வரை நஷ்டம் ஏற்பட்டுள்ளது. மேலும், பாறைகளை உடைப்பதற்காக நாட்டு வெடிகுண்டுகள் பயன்படுத்தி உள்ளதால், அருகில் உள்ள விவசாய நிலங்கள் மற்றும் கிராமவாசிகள் பெருமளவிற்கு பாதிக்கப்பட்டுள்ளனர். சம்பந்தப்பட்டவர்கள் மீது நடவடிக்கை எடுக்க அதிகாரியிடம் மனு அளித்தும் நடவடிக்கை எடுக்கவில்லை. எனவே, சட்டவிரோத குவாரி நடத்தியவர்கள் மீது உரிய நடவடிக்கை எடுக்க உத்தரவிட வேண்டுமென மனுவில் கூறியிருந்தார்.
இதையும் படிங்க: சென்னை மாமன்ற கூட்டம்; அம்மா உணவகங்களுக்கு நிதி ஒதுக்கீடு, தனியார் டெண்டர் குறித்த தீர்மானங்கள் நிறைவேற்றம்!
இந்த வழக்கு உயர் நீதிமன்ற தலைமை நீதிபதி ஸ்ரீராம் மற்றும் நீதிபதி முகமது சபீக் முன்பாக விசாரணைக்கு வந்தது. அப்போது மனுதாரர் தரப்பில் ஆஜரான வழக்கறிஞர், சட்ட விரோத குவாரி நடைபெறுவதால், அருகில் உள்ள கிராமங்களுக்கு சுற்றுச்சூழல் பாதிப்பு ஏற்படுகிறது. மேலும், நிலத்தடி நீர் பாதிக்கப்படுகிறது. அரசுக்கு பல கோடி ரூபாய் நஷ்டம் ஏற்படுகிறது. அதற்கான ஆவணங்களை நீதிபதிகள் முன்பு சமர்ப்பிக்கப்பட்டது. எனவே, சட்ட விரோத குவாரி நடத்துபவர்கள் மீது உரிய நடவடிக்கை எடுக்க வேண்டும் என வாதிடப்பட்டது.
அரசுத் தரப்பில் ஆஜரான வழக்கறிஞர், சட்ட விரோத குவாரி செயலில் ஈடுபட்டவர்கள் மீது வழக்குப் பதிவு செய்யப்பட்டு காவல் துறையினர் விசாரணை நடத்தி வருகின்றனர் என வாதிடப்பட்டது.
அதனைத் தொடர்ந்து தலைமை நீதிபதி ஸ்ரீராம், இதுபோன்று சட்ட விரோத குவாரிகள் நடைபெறுவதை அதிகாரிகள் கண்காணித்து நடவடிக்கை எடுக்க வேண்டும். காவல்துறையினருக்கு புகார் வந்தால் உரிய நடவடிக்கை எடுக்க வேண்டும், இல்லாவிட்டால் காவல்துறையினர் தங்களது பணியை இழக்க நேரிடும் என்று தெரிவித்தார்.
மேலும், வழக்கு குறித்து மத்திய அரசின் சுற்றுச்சூழல் துறை அமைச்சகம் மற்றும் தமிழ்நாடு அரசின் வருவாய்த் துறை செயலர் மற்றும் மாசு கட்டுப்பாடு வாரியம், தேனி மாவட்ட ஆட்சியர் ஆகியோர் பதில் மனுத் தாக்கல் செய்ய உத்தரவிட்டு வழக்கு விசாரணையை இரண்டு வாரங்களுக்கு ஒத்திவைத்து நீதிபதிகள் உத்தரவு பிறப்பித்தனர்.
ஈடிவி பாரத் தமிழ்நாடு வாட்ஸ் சேனல் மூலம் செய்திகளை உடனுக்குடன் அறிய இங்கே க்ளிக் செய்யவும்
