சென்னை: சவுக்கு சங்கரை குண்டர் தடுப்புச் சட்டத்தில் சிறையில் அடைத்த உத்தரவை ரத்து செய்யக் கோரி தொடரப்பட்ட வழக்கில் நீதிபதிகள் மாறுபட்ட தீர்ப்பை பிறப்பித்துள்ளதையடுத்து, மூன்றாவது நீதிபதியாக நீதிபதி ஜெயசந்திரன் நியமிக்கப்பட்டுள்ளார். இந்த வழக்கு இன்று (செவ்வாய்க்கிழமை) விசாரணைக்கு பட்டியலிடப்பட்டுள்ளது.
பெண் போலீசாரை அவதூறாகப் பேசிய வழக்கில் கைது செய்யப்பட்ட சவுக்கு சங்கர் மீது அடுத்தடுத்து 7 வழக்குகள் பதிவு செய்யப்பட்ட நிலையில், கடந்த 12ஆம் தேதி குண்டர் சட்டத்தில் சவுக்கு சங்கரை சிறையில் அடைக்க சென்னை மாநகர போலீஸ் கமிஷனர் உத்தரவு பிறப்பித்தார்.
இதனை எதிர்த்து சவுக்கு சங்கரின் தாயார் தொடர்ந்த ஆட்கொணர்வு மனுவை விசாரித்த இரு நீதிபதிகள் அமர்வு மாறுபட்ட தீர்ப்பை வழங்கியது. வழக்கமான நடைமுறைப்படி, சவுக்கு சங்கரின் தாய் தாக்கல் செய்த மனுவுக்கு அரசுத் தரப்பு பதில் அளிக்க அவகாசம் தர வேண்டும் என நீதிபதி பாலாஜி உத்தரவிட்டார். ஆனால், நீதிபதி சுவாமிநாதன், குண்டர் சட்டத்தை ரத்து செய்து உத்தரவிட்டார்.
மேலும், இந்த வழக்கில் தீர்வு காணும் வகையில், மூன்றாவது நீதிபதி விசாரணைக்காக பொறுப்பு தலைமை நீதிபதிக்கு வழக்கை பரிந்துரைத்தும் உத்தரவிட்டனர். அதன்படி, வழக்கின் மூன்றாவது நீதிபதியாக நீதிபதி ஜி.ஜெயச்சந்திரனை நியமித்து பொறுப்பு தலைமை நீதிபதி உத்தரவிட்டுள்ளார். இந்நிலையில், சவுக்கு சங்கர் தாயார் தாக்கல் செய்த மனு நீதிபதி ஜி.ஜெயச்சந்திரன் முன்னிலையில் இன்று விசாரணைக்கு பட்டியலிடப்பட்டுள்ளது.
இதையும் படிங்க: சாதி, மத, மொழி ரீதியாக வாக்கு சேகரிப்பதாக வழக்கு; தேர்தல் ஆணையம் பதிலளிக்க ஐகோர்ட் உத்தரவு! - Madras High Court
