ஏ.ஆர்.ரஹ்மானின் இசை நிகழ்ச்சி ரத்து விவகாரம்: ரூ.50 ஆயிரம் இழப்பீடு வழங்க நுகர்வோர் நீதிமன்றம் ஆணை! - A R Rahman concert issue

A.R.Rahman Marakkuma Nenjam live concert cancelled issue: இசையமைப்பாளர் ஏ.ஆர்.ரஹ்மானின் "மறக்குமா நெஞ்சம்" இசை நிகழ்ச்சி ரத்தான சம்பவத்தால் பாதிக்கப்பட்ட நபருக்கு டிக்கெட் தொகை உட்பட ரூ.67 ஆயிரத்தை வழங்க வேண்டும் எனக் கரூர் மாவட்ட நுகர்வோர் குறைதீர் ஆணையம் உத்தரவிட்டுள்ளது.

கரூர்: கரூர் மாநகராட்சிக்கு உட்பட்ட சின்னாண்டாங்கோவில் வசிப்பவர்கள் அஷ்வின், மணிகண்டன், சுப்ரமணியன். இவர்கள் கடந்த ஆண்டு ஆகஸ்ட் 12ஆம் தேதி சென்னையில் நடக்கவிருந்த இசையமைப்பாளர் ஏ.ஆர்.ரஹ்மான் (Live Concert) இசை நிகழ்ச்சியில் குடும்பத்தினருடன் கலந்து கொள்வதற்காக, ஏ.சி.டி.சி நிறுவனம் செய்த விளம்பரத்தின் அடிப்படையில், ரூ.12 ஆயிரம் செலுத்தி அதற்கான நுழைவுச் சீட்டை பெற்றுள்ளனர்.

ஆனால், மேற்கண்ட தேதியில் மழை காரணமாக அந்த நிகழ்ச்சி ரத்து செய்யப்படுவதாகக் கூறி, நிகழ்ச்சியின் ஏற்பாட்டாளர்கள் வேறு தேதிக்கு ஒத்தி வைத்தனர். ஆனால், அவ்வாறு ஒத்தி வைத்த தேதியில் தன்னால் கலந்துகொள்ள இயலாது என்று மிகத் தெளிவாக குறிப்பிட்டு கடிதம் அனுப்பியதோடு மட்டுமல்லாமல், தான் செலுத்திய தொகையை திருப்பி அளிக்குமாறு கேட்டுக் அஷ்வின் கொண்டுள்ளார்.

அப்போது நிகழ்ச்சியை ஏற்பாடு செய்த ஏ.சி.டி.சி நிறுவனமும் மேற்கண்ட கட்டணத் தொகையை திருப்பி அளிப்பதாக உறுதியளித்துவிட்டு, இன்று நாளை எனக் கூறி இமெயில் மூலம் காலம் தாழ்த்தி வந்ததாகக் கூறப்படுகிறது. இதனால் அஸ்வின் கரூர் மாவட்ட நுகர்வோர் குறைதீர் ஆணையத்தில், தான் செலுத்திய கட்டணத் தொகை ரூ.12 ஆயிரத்தையும், தனக்கு பணத்தை திருப்பி அளிக்காமல் காலம் தாழ்த்தி ஏற்படுத்திய மனஉளைச்சலுக்கும், சேவைக்குறைபாட்டிற்கும் என ரூ.50 ஆயிரமும், இதற்கு செலவுத் தொகையும் அளிக்கக் கோரி கரூர் மாவட்ட நுகர்வோர் குறைதீர் ஆணையத்தில் தாக்கல் மனுத் தாக்கல் செய்தார்.

இந்த வழக்கை விசாரித்த கரூர் மாவட்ட நுகர்வோர் குறைதீர் ஆணையத்தின் தலைவர் என்.பாரி மற்றும் உறுப்பினர் ஏ.எஸ்.இரத்தினசாமி ஆகியோர், "சென்னையில் உள்ள "மறக்குமா நெஞ்சம்" ஏ.ஆர்.ரஹ்மான் லைவ் கான்சர்ட் நிகழ்ச்சியின் தலைமை அலுவலகமான ஏ.சி.டி.சி (ACTC Studio Private Ltd) தலைமை அலுவலகத்திற்கு அனுப்பிய உரிய அழைப்பாணை பெற்றுக்கொண்ட போதிலும், எதிர்தரப்பினர் இந்த ஆணையத்தில் ஆஜராகி உரிய விளக்கம் அளிக்க தவறிவிட்டது.

ஆகையால், மேற்படி எதிர்தரப்பினரின் செயல் சேவைக் குறைபாடு என முடிவு செய்து, புகார்தாரருக்கு அந்நிறுவனம் அளிக்க வேண்டிய டிக்கெட் தொகை ரூ.12 ஆயிரத்தையும், மனஉளைச்சலுக்கு இழப்பீடாக ரூ.50 ஆயிரமும் மற்றும் செலவுத் தொகை ரூ.5 ஆயிரம் என மொத்தம் ரூ.67 ஆயிரம் வழங்க வேண்டும்" என ஏ.சி.டி.சி நிறுவனத்திற்கு உத்தரவிட்டு ஆணை பிறப்பித்துள்ளனர். இந்த நிலையில், ஏ.ஆர்.ரஹ்மான் இசை நிகழ்ச்சி தொடர்பாக கரூர் நுகர்வோர் ஆணையத்தில் நடைபெற்ற வழக்கில் அளிக்கப்பட்ட தீர்ப்பு தமிழக அளவில் பெரும் பரபரப்பை ஏற்படுத்தி உள்ளது.