சென்னை: தமிழ்நாடு முதலமைச்சரின் திறனாய்வுத் தேர்வு ஜூலை மாதம் நடக்கவிருப்பதை முன்னிட்டு, அரசுப் பள்ளியில் பயிலும் மாணவர்கள் ஜூன் 11ஆம் தேதி முதல் ஜூன் 26ஆம் தேதி வரை விண்ணப்பிக்கலாம் என அரசுத் தேர்வுகள் இயக்ககம் தெரிவித்துள்ளது. அரசுப் பள்ளியில் படிக்கும் மாணவர்கள் 11, 12ஆம் வகுப்பில் மாதம் ஆயிரம் ரூபாய் கல்வி உதவித் தொகை பெறுவதற்கான தமிழ்நாடு முதலமைச்சரின் திறனாய்வுத் தேர்வு நடத்தப்பட உள்ளது.
இத்தேர்விற்கு ஜூன் 11ஆம் தேதி முதல் 26ஆம் தேதி வரையில் பள்ளித் தலைமை ஆசிரியர்கள் மூலம் விண்ணப்பிக்கலாம் என அறிவிக்கப்பட்டுள்ளது. இது தொடர்பாக அரசுத் தேர்வுத்துறை இயக்குனர் சேதுராமவர்மா வெளியிட்டுள்ள செய்திக் குறிப்பில், “2024 - 2025ஆம் கல்வியாண்டிற்கான தமிழ்நாடு முதலமைச்சரின் திறனாய்வுத் தேர்வு, ஜூலை 21ஆம் தேதி (ஞாயிற்றுக்கிழமை) நடைபெறவுள்ளது.
தமிழ்நாடு மாநிலப் பாடத்திட்டத்தின் கீழ் 2023 - 2024ஆம் கல்வியாண்டில் அரசுப் பள்ளிகளில் பத்தாம் வகுப்பு பயின்று தற்போது 2024 - 2025ஆம் கல்வியாண்டில் 11ஆம் வகுப்பினை அரசுப் பள்ளிகளில் பயிலும் இந்தத் தேர்விற்கு விண்ணப்பிக்கலாம். இந்தத் தேர்வில் 1000 மாணவர்கள் (நடைமுறையில் உள்ள இடஒதுக்கீட்டின் அடிப்படையில் 500 மாணவர்கள் + 500 மாணவியர்கள்) தேர்வு செய்யப்பட்டு அவர்களுக்கு உதவித்தொகையாக ஒரு கல்வியாண்டிற்கு ரூபாய் 10 ஆயிரம் (மாதம் ரூ.1000 வீதம் ஒரு கல்வியாண்டிற்கு 10 மாதங்களுக்கு மட்டும்) இளநிலை பட்டப்படிப்பு வரை வழங்கப்படும்.
தமிழ்நாடு அரசின் 9 மற்றும் 10ஆம் வகுப்புகளில் கணிதம், அறிவியல் மற்றும் சமூகஅறிவியல் பாடப் புத்தகத்தில் உள்ள பாடத்திட்டங்களின் அடிப்படையில் கொள்குறிவகையில் தேர்வு இருதாள்களாக நடத்தப்படும். முதல் தாளில் கணிதம் தொடர்புடைய வினாக்கள் 60 இடம்பெறும். இரண்டாம் தாளில் அறிவியல் மற்றும் சமூகஅறிவியல் தொடர்புடைய வினாக்கள் 60 இடம்பெறும். முதல் தாள் காலை 10 மணி முதல் 12 மணி வரையிலும், இரண்டாம் தாள் மதியம் 2 மணி முதல் 4 மணி வரையிலும் நடைபெறும்.
www.dge.tn.gov.in என்ற இணையதளத்தில் விண்ணப்பப் படிவத்தினை ஜூன்11ஆம் தேதி முதல் 26ஆம் தேதி வரை பதிவிறக்கம் செய்து கொள்ளலாம். அவ்வாறு பதிவிறக்கம் செய்யப்படும் விண்ணப்பத்தினை பூர்த்தி செய்து தேர்வு கட்டணம் ரூபாய் 50 சேர்த்து, ஜூன் 26ஆம் தேதிக்குள் மாணவர் பயிலும் பள்ளித் தலைமையாசிரியரிடம் ஒப்படைக்க வேண்டும்” என அதில் கூறியுள்ளார்.
இதையும் படிங்க: நீட் தேர்வு முடிவுகள் வெளியீடு: 8 தமிழக மாணவர்கள் முழு மதிப்பெண் பெற்று அசத்தல்! - NEET Exam Results 2024
