மதுரை: நடைபெற்று முடிந்த 18வது நாடாளுமன்றத் தேர்தலில் திமுக மற்றும் அதன் கூட்டணி கட்சிகள் தமிழ்நாடு மற்றும் புதுச்சேரியில் மொத்தமுள்ள 40 இடங்களிலும் வெற்றி பெற்று சாதனை புரிந்துள்ளது. தற்போது திமுக கூட்டணி வெற்றி பெற்றதைத் தொடர்ந்து அக்கட்சியினர் பலரும் கொண்டாட்டங்களில் ஈடுபட்டு வருகின்றனர்.
அந்த வகையில் முன்னாள் மத்திய அமைச்சர் மு.க.அழகிரி ஆதரவாளரான மதுரையைச் சேர்ந்த ப.கோ.பிரபாகரன் என்பவர் திமுக மற்றும் அதன் கூட்டணிக் கட்சிகள் இணைந்து தமிழ்நாட்டில் 40க்கு 40 இடங்களில் வெற்றி பெற்றதைக் கொண்டாடும் விதமாக, கிரிக்கெட்டோடு தொடர்புப்படுத்தி ஒரு போஸ்டரை ஒட்டியுள்ளனார்.
அதில், உதயநிதி ஸ்டாலினை மேன் ஆப் தி மேட்ச் என்றும், தமிழக முதலமைச்சர் ஸ்டாலினை மேன் ஆஃப் தி சீரியஸ் என்றும் புகழாரம் சூட்டியவர்கள், இருவருக்கிடையில் மு.க அழகிரியின் படத்தை அச்சிட்டு, அந்த சுவரொட்டியை மதுரை மாநகர் முழுவதும் ஒட்டியுள்ளார்.
தற்போது, எந்தவித அரசியல் நடவடிக்கைகளிலும் ஈடுபடாமல் மு.க.அழகிரி ஒதுங்கியுள்ள நிலையில், இந்த சுவரொட்டி சமூக வலைத்தளங்களில் வைரலாகி வருகிறது.
