திண்டுக்கல்: திண்டுக்கல் - திருச்சி சாலையில் உள்ள பிரபல தனியார் எலும்புமுறிவு மருத்துவமனை ஒன்றில் இன்றிரவு பயங்கர தீ விபத்து ஏற்பட்டுள்ளது. இதுகுறித்து தகவல் அறிந்த தீயணைப்புத்துறையினர் போராடி தீயணைத்து வருகின்றனர். மேலும் மருத்துவமனையில் உள்ள நோயாளிகளை வெளியேற்றும் பணியில் ஈடுபட்டு வருகின்றனர்.
நான்குக்கும் மேற்பட்ட தீயணைப்பு வண்டிகள் தீயை அணைக்கும் பணியில் ஈடுபட்டு வருவதாகவும், பத்துக்கும் மேற்பட்ட ஆம்புலன்ஸ்கள் மூலம் நோயாளிகள் வேறு மருத்துவமனைக்கு மாற்றப்பட்டுள்ளதாகவும் தெரிவிக்கப்பட்டுள்ளது.
மேலும் லிப்டில் சிக்கிக்கொண்டவர்களை தீயணைப்புத் துறையினர் மற்றும் பொதுமக்கள், போலீசார், மருத்துவர்கள் மீட்டு, திண்டுக்கல் அரசு மருத்துவக் கல்லூரி மருத்துவமனைக்கு அனுப்பி வைக்கும் பணியில் ஈடுபட்டுள்ளனர்.
சம்பவ நடைபெற்ற இடத்துக்கு மாவட்ட ஆட்சியர் பூங்கொடி மற்றும் பழநி சட்டமன்ற உறுப்பினர் ஐபி செந்தில்குமார் ஆய்வு மேற்கொண்டு வருகின்றனர். விபத்து குறித்தான காரணம் இதுவரை தெரிவிக்கப்படவில்லை. இந்த சம்பவம் தொடர்பாக போலீசார் விசாரணை மேற்கொண்டு வருகின்றனர்.
இந்த விபத்தில் மூன்று ஆண்கள், மூன்று பெண்கள், ஒரு குழந்தை என ஏழு பேர் உயிரிழந்துள்ளனர். மேலும் பலர் தீக்காயங்களுடன் மருத்துவமனையில் அனுமதிக்கப்பட்டுள்ளதாகவும் முதல்கட்ட தகவல் வெளியாகியுள்ளது
இதையும் படிங்க: சென்னையில் தரையிறங்க முடியாமல் வானில் வட்டமடித்த ஹைதராபாத் விமானம்.. வந்த வழியே திரும்பி சென்றது!
