சென்னை: சென்னை விருகம்பாக்கம் பகுதியில் நடிகையும், நடிகர் பொன்வண்ணனின் மனைவியுமான சரண்யா வீடு உள்ளது. இவரது பக்கத்து வீட்டில் ஸ்ரீதேவி என்ற பெண் குடும்பத்துடன் வசித்து வருகிறார். இந்நிலையில் நேற்றிரவு ஸ்ரீதேவி தனது கணவருடன் வெளியே செல்வதற்காக, காரை வீட்டிலிருந்து வெளியே எடுத்தாக தெரிகிறது.
அப்போது தங்கள் வீட்டின் 10 அடி அகலம் கொண்ட கேட்டை திறந்துள்ளார். அந்த கேட் நடிகை சரண்யாவின் காரில் இடிப்பதுபோல் சென்று அருகே நின்றுள்ளது. இதனால் நடிகை சரண்யாவுக்கும், ஸ்ரீதேவிக்கும் இடையே வாக்குவாதம் ஏற்பட்டுள்ளது.
இதையடுத்து சரண்யா மற்றும் அவரது குடும்பத்தினர், தங்கள் வீட்டிற்குள் அத்துமீறி நுழைந்து ஆபாசமாக திட்டியதுடன், கொலை மிரட்டலும் விடுத்ததாக ஸ்ரீதேவி குற்றம்சாட்டியுள்ளார். மேலும், இந்த சம்பவம் குறித்து விருகம்பாக்கம் காவல் நிலையத்திலும் அவர் புகார் கொடுத்துள்ளார்.
அந்தப் புகாரில் தனக்கும் தனது குடும்பத்தினருக்கும் கொலை மிரட்டல் விடுத்த நடிகை சரண்யா மீது உரிய நடவடிக்கை எடுக்க வலியுறுத்தியுள்ளார். இந்தத் தகராறு தொடர்பான சிசிடிவி பதிவுகள் தன்னிடம் இருப்பதாகவும் அவர் புகாரில் தெரிவித்துள்ளார். இதுதொடர்பாக விருகம்பாக்கம் போலீசார் விசாரணை நடத்தி வருகின்றனர்.
சரண்யா பொன்வண்ணன்: கமல்ஹாசன் நடிப்பில் 1987 ஆம் ஆண்டு வெளியான நாயகன் திரைப்படத்தின் மூலம் தமிழ் சினிமாவில் அறிமுகமான நடிகை சரண்யா. அதன் பிறகு பல்வேறு படங்களில் நடித்து வந்தார். இந்த நிலையில் அமீர் இயக்கத்தில் 2005 ஆம் ஆண்டு வெளிவந்த ராம் திரைப்படம் இவருக்கு திருப்பு முனையாக அமைந்தது.
அதன் பிறகு பல்வேறு திரைப்படங்களில் அம்மா வேடத்தில் நடித்து முத்திரை பதித்தார். குறிப்பாக எம்டன் மகன், ஒரு கல் ஒரு கண்ணாடி, வேலையில்லா பட்டதாரி, ஆகிய திரைப்படங்களில் இவர் நடித்த விதம் இன்றளவும் பேசப்படுகிறது.
இதன் காரணமாக தமிழ் சினிமாவில் 'அம்மா கேரக்டர்' என்றாலே ஹீரோக்கள் முதலில் தேர்வு செய்வது சரண்யா பொன்வண்ணனை தான் என்றால் அது மிகையாகாது. இந்நிலையில், நடிகை சரண்யா கொலை மிரட்டல் விடுத்ததாக அவரது அண்டை வீட்டார் ஒருவர் காவல் நிலையத்தில் புகார் அளித்துள்ள சம்பவம் பரபரப்பை ஏற்படுத்தியுள்ளது.
இதையும் படிங்க: "பாக் எனும் ஆவிகளின் சக்தி பற்றிய சுவாரஸ்யமான விஷயம் சிக்கியது" - இயக்குநர் சுந்தர் சி கூறும் அப்டேட்!
