விருதுநகர்: சிவகாசியில் தமிழ்நாடு பட்டாசு வணிகர்கள் கூட்டமைப்பு சார்பில் 4வது பாதுகாப்பு விழிப்புணர்வு மாநாடு மற்றும் வர்த்தக கண்காட்சி நடைபெற்றது. இதனை விருதுநகர் காங்கிரஸ் எம்பி மாணிக்கம் தாகூர் துவக்கி வைத்தார். இதில், சிவகாசி மேயர் சங்கீதா, தீயணைப்பு, மீட்புத்துறை மாவட்ட அலுவலர் விவேகானந்தன் கலந்துகொண்டு குத்து விளக்கு ஏற்றினர். தொடர்ந்து பாதுகாப்பு விழிப்புணர்வு கூட்டம் நடந்தது.
பின்னர் செய்தியாளர்களைச் சந்தித்து காங்கிரஸ் எம்பி மாணிக்கம் தாகூர் கூறியதாவது, “பட்டாசு தொழிலை பாதுகாப்பது எவ்வளவு முக்கியமோ, அதேபோல் பட்டாசுகளை விற்பனை செய்கின்ற வணிகர்களின் பாதுகாப்பு மிக மிக முக்கியமானது. வணிகர்களின் முக்கிய பிரச்னையாக இருப்பது, பட்டாசு கடைகளுக்கு உரிமம் வழங்குவதில் காலதாமதம் ஏற்படுவது.
குறிப்பாக, தமிழக அரசு, கர்நாடகா, ஆந்திரா, தெலங்கானா மற்றும் வட மாநிலங்கள் என அனைத்து மாநிலங்களும், தீபாவளிக்கு ஒரு மாதத்திற்கு முன்பாகவே பட்டாசு கடைகள் அமைப்பதற்கான உரிமத்தை வழங்க வேண்டும். காலதாமதம் செய்வதால் பட்டாசு வணிகர்கள் பாதிக்கப்படுகின்றனர். இதன் விளைவாக, சிவகாசியில் தொழில் பாதிக்கப்படுகிறது. எனவே, இது குறித்து தமிழக அரசு உட்பட பல்வேறு மாநிலங்களுக்கு எனது சார்பாக கடிதங்கள் அனுப்பி வைக்க உள்ளேன்.
பாஜக அரசு ஆட்சிக்கு வந்து பட்டாசுக்கு வெடி வைத்தது போல், பட்டாசு தொழிலுக்கும் வெடி வைத்துள்ளது. மத்திய அமைச்சர் சுரேஷ் கோபியின் பேச்சு வருத்தத்துக்குரிய செயலாகும். பேரியம் நைட்ரேட்டை ஒரு தடை செய்யப்பட்ட பொருளிலிருந்து மாற்ற வேண்டும். அவ்வாறு மாற்றினால் தான் பட்டாசு தொழிலை பாதுகாக்க முடியும். மத்திய பாஜக அரசு தொடர்ந்து பட்டாசு தொழிலுக்கு விரோதமான நிலையிலேயே இருந்து வருகிறது.
பட்டாசு தொழில் விருதுநகர் மாவட்டத்தின் உயிர் நாடியான தொழில். உயிர் நாடியை பாதுகாப்பாக நடத்துவது மாவட்ட நிர்வாகத்தின் கடமை. பட்டாசு தொழிலுக்கு உரிய பாதுகாப்பு வழங்குவது போல, உரிமம் வழங்குவதிலும் உரிய கவனம் செலுத்த செலுத்த வேண்டுமென மாவட்ட நிர்வாகத்திடம் வலியுறுத்துவேன்” இவ்வாறு அவர் கூறினார்.
தொடர்ந்து சிவகாசி சாட்சியாபுரம் ரயில்வே மேம்பாலம் குறித்து எழுப்பப்பட்ட கேள்விக்கு பதில் அளித்த அவர், “எல்லோரும் என்னிடம் கேள்வி கேட்காமல் சிவகாசி எம்எல்ஏ மற்றும் விருதுநகரில் உள்ள 2 அமைச்சர்களிடம் கேள்வி கேட்க வேண்டும். ஒன்றிய அரசு தற்போது மேம்பாலம் அமைப்பிற்கான பணிகளைத் தொடங்கியுள்ளது. சிவகாசி மக்கள் கொஞ்சம் பொறுமையாக இருக்க வேண்டும். 15 ஆண்டுகளாக காத்திருந்த மக்கள் தற்போது 16 மாதங்கள் பொறுத்திருக்க வேண்டும்” என்றார்.
ஈடிவி பாரத் தமிழ் வாட்ஸ்ஆப் சேனலில் இணைய இங்கே க்ளிக் செய்யவும்
இதையும் படிங்க: தேவநாதன் யாதவ் தொடர்புடைய 12 இடங்களில் சோதனை.. முக்கிய ஆவணங்கள் பறிமுதல்?
