கோயம்புத்தூர்: கோவை மாவட்டத்தில் ஊருக்குள் புகுந்த யானை ஒன்று விவசாயியை தாக்கியதில், அவர் சிகிச்சைகாக மருத்துவமனைக்கு அழைத்து செல்லும் வழியிலேயே உயிரிழந்த சோகம் பெரியநாயக்கன்பாளையம் அடுத்த பழைய புதூர் பகுதியில் நிகழ்ந்துள்ளது.
கோவை மேற்கு தொடர்ச்சி மலையை ஒட்டி உள்ள ஆனைகட்டி, பெரியநாயக்கன்பாளையம், காரமடை மற்றும் மருதமலை சுற்று வட்டாரப் பகுதிகளில் கடந்த இரு மாதங்களாக 20க்கும் மேற்பட்ட காட்டு யானைகள் முகாமிட்டுள்ளன. அந்த யானைகள் கூட்டமாகவும், தனியாகவும் வனப்பகுதியை ஒட்டியுள்ள கிராமங்களுக்குள் உலா வரும் சூழல் ஏற்பட்டுள்ளது.
உணவுத் தேடி உலா வரும் யானைகள்: அவ்வாறு வரும் யானைகள் விளை நிலங்களை சேதப்படுத்துவது, உணவு மற்றும் தண்ணீருக்காக குடியிருப்பு பகுதிக்குள் புகுந்து, கடைகளை சேதப்படுத்துவதை வழக்கமாக கொண்டுள்ளது. இதனால், இரவு மற்றும் அதிகாலை நேரங்களில் வனப்பகுதியை ஒட்டியுள்ள கிராம மக்கள் எச்சரிக்கையாக இருக்கும்படி வனத்துறையினர் அறிவித்துள்ளனர். மேலும், யானைகள் குடியிருப்பு பகுதிக்குள் வரும் போது அதனை விரட்ட முயற்சி செய்யக் கூடாது. வனத்துறையினருக்கு தகவல் அளித்தால் அவர்கள் அங்கு வந்து யானைகளை வனப்பகுதிக்குள் விரட்டுவார்கள் எனவும் அறிவித்துள்ளனர்.
விவசாயியை தாக்கிய யானை: இந்நிலையில், பெரியநாயக்கன்பாளையம் அடுத்த பழைய புதூர் பகுதிக்குள் நேற்று இரவு ஒன்றை யானை புகுந்துள்ளது. இது குறித்து வனத்துறையினர் அந்த பகுதி மக்களுக்கு ஒலிப்பெருக்கி மூலம் எச்சரிக்கை விடுத்து வந்தனர். அப்போது மேட்டுத் தோட்டத்தைச் சேர்ந்த விவசாயி வேலுமணி (74) என்பவர் தோட்டத்திற்கு முன்புறம் கேட்டை பூட்டிக் கொண்டு இருந்துள்ளார்.
உயிரிழந்த விவசாயி: அப்போது அங்கு வந்த ஒற்றைக் காட்டு யானை அவரை தாக்கியதில் அவர் படுகாயம் அடைந்தார். இதுகுறித்து அப்பகுதி மக்கள் வனத்துறை மற்றும் பெரியநாயக்கன்பாளையம் காவல் துறையினருக்கு தகவல் அளித்துள்ளனர். பின் படுகாயமடைந்த விவசாயி வேலுமணியை மீட்டு அரசு மருத்துவமனைக்கு அனுப்பி வைத்தனர். ஆனால், அங்கு வேலுமணி மருத்துவமனைக்கு வரும் வழியிலேயே உயிரிழந்துவிட்டதாக கூறப்பட்டதை அடுத்து போலீசார் அவரது உடலை மீட்டு பிரேத பரிசோதனைக்காக கோவை அரசு மருத்துவமனைக்கு அனுப்பி வைத்தனர். தோட்டத்தை மூடுவதற்காக சென்ற விவசாயியை யானை தாக்கி பரிதாபமாக உயிரிழந்த சம்பவம் அப்பகுதியில் பெரும் சோகத்தை ஏற்படுத்தியுள்ளது.
இதையும் படிங்க: முன்விரோதத்தால் இருதரப்பு மோதல்; 4 பேருக்கு கத்தி குத்து.. ஒருவர் உயிரிழப்பு - பொங்கலன்று நேர்ந்த சோகம்!
அலறும் வீடியோ காட்சி வைரல்: இந்நிலையில் அதை பகுதியில் ஒற்றை யானை ஊருக்குள் உலா சென்ற வீடியோ காட்சிகள் வெளியாகி இணையத்தில் வைரலாகி வருகிறது. அந்த வீடியோவில் யானை ஒன்று குடியிருப்புக்குள் சென்றுக்கொண்டிருந்தது. அப்போது அருகில் இருந்த பெண் ஒருவர் குடும்பத்தினரை உள்ளே வரும்படி அலறுவது பதிவாகிருந்து. அதில் அந்த பெண் யானையை வெளியே சென்று பார்க்க சென்ற தாத்தாவை "ஐயோ தாத்தா உள்ளே வந்துருங்க, அப்பா நீங்களும் வேகமாக வீட்டுக்குள் வாங்க” என அலறுகிறார். அப்போது அந்த வழியாக யானை அவர்களது வீட்டின் கதவை இழுந்து பார்ப்பது போல் பதிவாகி இருந்தது.
