கோயம்புத்தூர்: மருதமலை வனப்பகுதியில் கடந்த மே 30ஆம் தேதி உடல் நலம் பாதித்த நிலையில் தரையில் படுத்து கிடந்த 40 வயது பெண் யானைக்கு, 5 நாட்களாக வனத்துறையினர் சிகிச்சை அளித்தனர். அந்த பெண் யானையுடன் இருந்த 3 மாத ஆண் குட்டி யானை, ஜூன் 1-ம் தேதி மற்றொரு யானைக் கூட்டத்துடன் இணைந்து வனப்பகுதிக்குள் சென்றது.
பின்னர், உடல் நலம் தேறிய தாய் யானை, கடந்த ஜூன் 3ஆம் தேதி வனப்பகுதிக்குள் விடுவிக்கப்பட்டது. இந்நிலையில், கடந்த 4ஆம் தேதி கூட்டத்தில் இருந்து பிரிந்து வந்த குட்டி யானையை வனத்துறையினர் மீட்டு தாயுடன் சேர்க்கும் முயற்சியில் ஈடுபட்டனர். இதற்காக, ஆனைமலை டாப்சிலிப் கோழிகமுதி யானைகள் முகாமில் இருந்து அனுபவம் வாய்ந்த பாகன்கள், காவடி உள்ளிட்ட 4 பேர் வரவழைக்கப்பட்டு, குட்டி யானையை சேர்க்கும் முயற்சி மேற்கொள்ளப்பட்டு வந்தது.
மேலும், தாய் யானை குட்டியை ஏற்காத நிலையில், மற்றொரு யானைக் கூட்டத்துடன் குட்டியை சேர்க்க வனத்துறையினர் முயற்சித்தனர். இந்நிலையில், மருதமலை வனப்பகுதியில் மற்றொரு யானைக் கூட்டத்துடன் குட்டியை சேர்க்க வனத்துறையினர் சனிக்கிழமை காலை முதல் முயற்சி மேற்கொண்டனர். ஆனால், அந்த முயற்சியும் பலன் அளிக்கவில்லை.
இது குறித்து மாவட்ட வன அலுவலர் ஜெயராஜ் கூறுகையில், "குட்டி யானையை முகாமுக்கு கொண்டு செல்வது குறித்து தலைமை வன உயிரினக் காப்பாளருக்கு தகவல் தெரிவிக்கப்பட்டது. அவர் உத்தரவின் பேரில், யானை குட்டியை அதன் தாயுடன் சேர்க்கும் முயற்சி ஒரு வாரம் நடைபெற்றும் வெற்றி பெற முடியாததால் உயர் அதிகாரிகளின் உத்தரவின் பேரில், குட்டி யானையை முதுமலை புலிகள் காப்பகத்தில் உள்ள தெப்பக்காடு யானைகள் முகாமில் வைத்து பராமரிக்க முடிவு செய்யப்பட்டுள்ளதாக” தெரிவித்தார்.
இதையடுத்து, இன்று அதிகாலை 4 மணி அளவில் யானை குட்டி முதுமலை யானைகள் முகாமுக்கு கொண்டு செல்லப்பட்டது. முன்னதாக, யானை குட்டிக்கு பால் கொடுக்கப்பட்டு வனத்துறை வாகனம் மூலம் கொண்டு செல்லப்பட்டது. ஒரு வார காலம் குட்டி யானையுடன் பயணித்து உணவு வழங்கி நன்கு கவனித்துக் கொண்ட கோவை வனத்துறையினர் யானை குட்டியை பிரிய முடியாமல் வழியனுப்பி வைத்தனர்.
