திருச்சி: நாடாளுமன்ற மக்களவைத் தேர்தலில் விடுதலை சிறுத்தைகள் கட்சி, தமிழ்நாடு, கேரளா, கர்நாடகா, ஆந்திரா, தெலங்கானா, மகாராஷ்டிரா மாநிலங்களில் போட்டியிடுகிறது. தமிழ்நாட்டில், அக்கட்சித் தலைவர் திருமாவளவன் சிதம்பரம் தொகுதியிலும், பொதுச் செயலாளர் துரை ரவிக்குமார் விழுப்புரம் தொகுதியிலும் போட்டியிடுகின்றனர்.
இந்நிலையில், அனைத்து கட்சி வேட்பாளர்களும், கட்சி நிர்வாகிகளும் தேர்தல் பிரச்சாரம் மேற்கொண்டு வருகின்றனர். அந்த வகையில், திருச்சியில் நடைபெறவுள்ள கட்சி நிகழ்வில் பங்கேற்பதற்காக, விடுதலை சிறுத்தைகள் கட்சி தலைவர் திருமாவளவன் திருச்சி விமான நிலையத்திலிருந்து வந்தார். அப்போது, விசிகவினர் பானையை கையில் ஏந்தி திருமாவளவனை வரவேற்றனர்.
பின்னர், திருச்சி விமான நிலையத்தில் விசிக தலைவர் திருமாவளவன் செய்தியாளர்களைச் சந்தித்தார். அப்போது அவர் பேசுகையில், “விடுதலை சிறுத்தைகள் கட்சி போட்டியிடும் சிதம்பரம் மற்றும் விழுப்புரம் நாடாளுமன்றத் தொகுதிகளில் வேறு யாரும் பானை சின்னம் கேட்டு விண்ணப்பிக்காததால், விசிகவிற்கு பானை சின்னம் கிடைக்கும் என்ற நம்பிக்கை இருக்கிறது.
பானை சின்னம் கேட்டு ஒரு மாதங்களுக்கு முன்பே தேர்தல் ஆணையத்திடம் விண்ணப்பித்திருந்தோம். இருந்தாலும், சின்னம் எங்களுக்கு ஒதுக்கப்படவில்லை. பாரதிய ஜனதா கட்சி நிரந்தரமாக ஆட்சியில் இருக்கும் என்ற எண்ணத்தில் தேர்தல் ஆணையம் அவர்களுக்கு ஆதரவாக செயல்படுகிறது. தேர்தல் ஆணையம் சுதந்திரமாக இயங்கவில்லை.
தேர்தல் ஆணையம் பாரதிய ஜனதா கட்சி மற்றும் சங்பரிவாரிகள் கட்டுப்பாட்டில் உள்ளது. பாஜகவிற்கு ஆதரவாக செயல்படும் தேர்தல் ஆணையம் எப்படி நேர்மையாக நாடாளுமன்றத் தேர்தலை நடத்தும் என தெரியவில்லை. நடைபெற உள்ள தேர்தல் மக்களுக்கும், பாஜகவிற்கும் நடக்கும் இரண்டாம் சுதந்திரப் போர். அதில் மக்கள் தான் வெற்றி பெறுவார்கள்” என்றார்.
அதனைத் தொடர்ந்து பேசியவர், “ டெல்லி முதலமைச்சர் அரவிந்த் கெஜ்ரிவால் கைது செய்யப்பட்டதை கண்டித்து நாளை இந்தியா கூட்டணி சார்பில் டெல்லியில் நடைபெறும் ஆர்ப்பாட்டத்தில் கலந்து கொள்கிறேன். பாஜக பட்டியலினத்திற்கு எதிரானது, சமூக நீதிக்கு, அரசியலமைப்பு சட்டத்திற்கு எதிரானது. அதனை உணர்ந்து அந்த பாஜக மாநில பட்டியல் இன தலைவர் அந்த கட்சியிலிருந்து வெளியேறி இருப்பது ஆறுதல் அளிக்கிறது.
பாஜக தலைவர் அண்ணாமலை, எப்பொழுதும் மொழி உணர்வை, இன உணர்வை கொச்சைப்படுத்தி பேசுபவர் தான். அவ்வாறு பேசுவது அவருக்கு தனிப்பட்ட முறையில் வேண்டுமானால், விளம்பரம் தேடி தரலாமே தவிர, அவர்கள் கட்சிக்கு எந்த பயனையும் தராது” என்றார். தற்போது, விசிக சார்பில் விழுப்புரம், சிதம்பரம் ஆகிய தொகுதிகளில் போட்டியிடும் வேட்பாளர்களுக்கு பானை சின்னம் வழங்கி தேர்தல் ஆணையம் தெரிவித்துள்ளது.
இதையும் படிங்க: துரை வைகோவுக்கு தீப்பெட்டி சின்னம் ஒதுக்கீடு! - Match Box Allocated For MDMK
