சென்னை: ஒரு நாட்டை சர்வதேச அரங்கில் நேரடியாக பிரதிநிதித்துவபடுத்துவது விளையாட்டு போட்டிகளாகும் ஏனென்றால் ஒரு நாட்டின் சாதனையை குறுகிய காலத்தில் உலகம் முழுவதும் எடுத்துச் சென்று பொதுமக்களிடம் சேர்ப்பது விளையாட்டு மட்டுமே!
2024 ஆண்டு சர்வதேச, தேசிய அளவில் நடைபெற்ற முக்கிய விளையாட்டு நிகழ்வுகளும், அவற்றில் சாதித்த இந்திய, தமிழக வீரர், வீராங்கனைகள் குறித்து இத்தொகுப்பில் காணலாம்.
ஜனவரி: விளையாட்டுத் துறையில் சாதனை படைக்கும் வீரர்களை கௌரவிக்கும் விதத்தில் ஆண்டுதோறும் மத்திய அரசு அர்ஜூனா விருது வழங்கி வருகிறது. அந்த வகையில் தமிழகத்தை சேர்ந்த செஸ் வீராங்கனை வைஷாலிக்கு குடியரசுத் தலைவர் திரௌபதி முர்மு, 2024 ஜனவரியில் அர்ஜுனா விருதை வழங்கினார்.
இந்தோனேஷியாவின் ஜகார்த்தாவில் நடைபெற்ற ஆசிய ஒலிம்பிக் தகுதிச்சுற்று துப்பாக்கிச் சுடுதலில் தமிழக வீராங்கனை இளவேனில் வெள்ளிப் பதக்கம் வென்று ஒலிம்பிக் போட்டிக்கு தகுதி பெற்றார்.
நெதர்லாந்தில் நடைபெற்ற உலக செஸ் போட்டியில் உலக சாம்பியன் டிங் லிரெனை வீழ்த்தியதன் மூலம் ஃபிடே மதிப்பு 2748.3 பெற்று இந்தியாவின் நம்பர் ஒன் வீரராக திகழ்ந்த விஸ்வநாதன் ஆனந்தை பின்னுக்கு தள்ளி தமிழகத்தை சேர்ந்த பிரக்ஞானந்தா இந்தியாவின் நம்பர் ஒன் வீரராக உயர்ந்தார்.
காது கேளாதோர் மற்றும் செவித்திறன் குன்றியோர் பங்கேற்ற ஆஸ்திரேலியா ஓபன் டென்னிஸ் போட்டிகளில் ஒற்றையர் பிரிவில் சாம்பியன் பட்டமும் இரட்டையர் பிரிவில் இரண்டாவது இடமும் பெற்று தமிழக வீரர் பிரத்வி சேகர் சாதனை படைத்துள்ளார்.
தமிழ்நாட்டில் நடைபெற்ற 'கேலோ இந்தியா' கோகோ போட்டியில் மகாராஷ்டிரா அணி தங்கம் வென்றது. ஒடிசா வெள்ளி பதக்கமும் டெல்லி மற்றும் குஜராத் அணிகள் வெண்கல பதக்கம் வென்றன.
பிப்ரவரி: டெஸ்ட் கிரிக்கெட் வரலாற்றில் குறைந்த போட்டிகளில் 500 விக்கெட்டுகளை வீழ்த்திய இரண்டாவது வீரர் என்ற பெருமையை ரவிச்சந்திரன் அஸ்வின் படைத்தார். ராஜ்கோட்டில் நடைபெற்ற போட்டியில் இங்கிலாந்துக்கு எதிரான ஆட்டத்தில் இந்த சாதனையை அவர் செய்தார்.
மார்ச்: ஐபிஎல் போட்டிகளில் சென்னை சூப்பர் கிங்ஸ் அணியின் கேப்டனாக இருந்த தோனி 2024ஆம் ஆண்டு நடைப்பெற்ற போட்டிகளில் விக்கெட் கீப்பராக மட்டும் செயல்பட்டார்.சிஎஸ்கே அணியின் புதிய கேப்டனாக ருத்ராஜ் கெய்க்வாட் கேப்டனாக இருந்தார்.
ஏப்ரல்: உலக சாம்பியன் போட்டிக்கு தகுதி தேர்வாக நடைபெறும் பிடே கேண்டிடேட் போட்டி கனடாவில் நடைபெற்றது. இதில் 17 வயதான தமிழகத்தை சேர்ந்த குகேஷ் அமெரிக்காவை சேர்ந்த ஹிகாரு நகமுராவை வீழ்த்தி பிடே கேண்டிடேட் சாம்பியன் பட்டத்தை முதல்முறையாக வென்றார்.
மே: கடந்தாண்டு டிசம்பர் மாதம் ஸ்பெயின் நாட்டில் நடைபெற்ற எல்லோ பிரேக் கார்டு ஓபன் தொடரில் இரண்டு வெற்றிகளை பதிவு செய்த தமிழகத்தை சேர்ந்த வைஷாலிக்கு ( கிராண்ட் மாஸ்டர் பிரக்ஞானந்தாவின் சகோதரி) அதிகாரப்பூர்வமாக செஸ் கிராண்ட் மாஸ்டர் பட்டம் வழங்கப்பட்டது. இவர் இந்தியாவின் 84 ஆவது கிராண்ட் மாஸ்டர் ஆகவும் இந்திய அளவில் மூன்றாவது பெண் கிராண்ட் மாஸ்டர் என்பது குறிப்பிடத்தக்கது.
2024 ஆம் ஆண்டுக்கான ஐபிஎல் போட்டியின் இறுதி ஆட்டம் சென்னையில் நடைபெற்றது. இதில் முன்னாள் சாம்பியன் சன்ரைசர்ஸ் ஹைதராபாத் அணியை வென்று கொல்கத்தா அணி மூன்றாவது முறையாக கோப்பையை வென்றது.
சர்வதேச உலக செஸ் தொடர் நார்வையில் நடைபெற்றது. இதில் நம்பர் ஒன் வீரரான மேக்னஸ் கால்சனை தொடரின் மூன்றாவது சுற்றில் தமிழகத்தை சேர்ந்த பிரக்ஞானந்தா வீழ்த்தினார்.
ஜூன்: தென் ஆப்பிரிக்கா மகளிர் கிரிக்கெட் அணி இந்தியாவில் சுற்றுப்பயணம் மேற்கொண்டு விளையாடியது. இதில் 48 ஆண்டுகளுக்குப் பிறகு சென்னை சேப்பாக்கம் மைதானத்தில் இரு அணிகளுக்கும் இடையே டெஸ்ட் போட்டி நடைபெற்றது. இந்தப் போட்டியில் இந்திய அணி 10 விக்கெட் வித்தியாசத்தில் வெற்றி பெற்று சாதனை படைத்தது.
ஜூலை: பிரான்ஸ் தலைநகர் பாரிஸில் ஒலிம்பிக் போட்டிகள் கோலாகலமாக தொடங்கியது இதில் இந்தியாவிலிருந்து 112 வீரர்கள் பங்கேற்றனர். இவர்களில் சரத் கமல், சுபா வெங்கடேசன், இளவேனில், வித்யா ராம்ராஜ், பிரித்திவிராஜ் தொண்டைமான், ராஜேஷ் ரமேஷ், பிரவீன் சித்திரவேல், ஜெஸ்வின் ஆல்ட்ரின், நேத்ரா குமணன், சந்தோஷ் தமிழரசன், விஷ்ணு சரவணன், ஸ்ரீராம் பாலாஜி உள்ளிட்ட 13 வீரர்கள், வீராங்கனைகள் தமிழகத்திலிருந்து பங்கேற்றனர்.
ஆகஸ்ட்: தமிழ்நாடு பிரீமியர் லீக் 2024 தொடரில் இரண்டு முறை சாம்பியன் பட்டம் வென்ற கோவை அணியை நட்சத்திர வீரர் அஸ்வின் தலைமையிலான திண்டுக்கல் அணி வீழ்த்தி முதல்முறையாக சாம்பியன் பட்டம் வென்றது.
சென்னை தீவுத்திடல் பகுதியில் ஃபார்முலா4 கார் பந்தயத்தை விளையாட்டு துறை அமைச்சர் உதயநிதி ஸ்டாலின் தொடங்கி வைத்தார். பல்வேறு சர்ச்சைகளுக்கு மத்தியில் கடந்த ஆண்டு தடைப்பட்ட கார் பந்தயம் இந்த ஆண்டு தொடங்கி கோலாகலமாக நடைபெற்றது.
சென்னையில் நடைபெற்ற அல்டிமேட் டேபிள் டென்னிஸ் தொடரில் இறுதிப்போட்டியில் டெல்லி அணியை வீழ்த்தி நடப்புச் சாம்பியன் கோவா பட்டத்தை தக்க வைத்துக் கொண்டது. 8 அணிகள் பங்கேற்ற போட்டியில் சாம்பியன் பட்டத்தை தக்க வைத்த அணி என்ற சாதனையை கோவா அணி பெற்றது.
பாரிஸ் தலைநகரில் நடைபெற்ற பாராலிம்பிக் போட்டியில் தமிழக வீராங்கனை துளசி முருகேசன் வெள்ளிப் பதக்கமும், மனிஷா ராம்தாஸ் வெண்கல பதக்கமும், நித்யஸ்ரீ சுமதி சிவன் வெண்கல பதக்கமும், உயரம் தாண்டுதலில் மாரியப்பன் தங்கவேலு வெண்கல பதக்கம் வென்று சாதனை படைத்தனர்.
செப்டம்பர்: 29 ஆண்டுகளுக்கு பின்னர் தெற்காசிய ஜூனியர் தடகள சாம்பியன்ஷிப் போட்டிகள் சென்னையில் நடைப்பெற்றது. 6 நாடுகளை சேர்ந்த 210 வீரர்கள், 28 வகையான போட்டிகளில் பங்கேற்றனர். இந்தியா சார்பில் 62 வீரர்கள் பங்கேற்ற நிலையில் தமிழகத்தில் இருந்து 9 வீரர்கள் தலந்து கொண்டனர். இறுதியில் இந்திய அணி 21 தங்கம் உட்பட 48 பதக்கங்களை கைப்பற்றி முதலிடம் பிடித்தது. இதில் தமிழக வீரர்களான ஜித்தின், பிரதிக்ஷா, லட்சுமி உள்ளிட்ட வீரர்கள் பதக்கங்களை வென்றனர்.
ஹங்கேரியில் நடைபெற்ற 45 ஆவது பிடே ஒலிம்பியாட் போட்டியில் இந்தியாவின் ஆண்கள் மற்றும் மகளிர் அணிகள் தங்க பதக்கம் என்று வரலாற்று சாதனை படைத்தனர்.
அக்டோபர்: உஸ்பெகிஸ்தானில் நடைபெற்ற உலகக்கோப்பை குத்துச்சண்டை போட்டியில் 2 தங்கம், 1 வெள்ளி, 5 வெண்கல பதக்கம் என எட்டு பதக்கங்களை வென்று திரும்பிய தமிழக வீரர், வீராங்கனைகள் குத்துச்சண்டை பயிற்சி மையம் அமைத்துக் கொடுக்க வேண்டும் என தமிழக அரசிற்கு கோரிக்கை வைத்தனர்.
நவம்பர்: இந்தியாவின் 14 வது தேசிய சீனியர் சாம்பியன்ஷிப் போட்டி சென்னை எழும்பூரில் நடைபெற்றது. இந்த போட்டியில் ஹரியானா அணியை வீழ்த்தி ஒடிசா அணி சாம்பியன் பட்டத்தை வென்றது.வெற்றி பெற்ற அணிக்கு துணை முதலமைச்சர் உதயநிதி ஸ்டாலின் கோப்பைகளை வழங்கினார்.
அமெரிக்காவில் நடைபெற்ற ஆறாவது உலக கேரம் போட்டியில் சென்னை வண்ணாரப்பேட்டையை சேர்ந்த ஆட்டோ ஓட்டுனரின் மகள் காசிமா தனிப்பிரிவு, இரட்டையர் பிரிவு, குழு போட்டி என மூன்று பிரிவுகளிலும் தங்கம் வென்று சாதனை படைத்தார். தமிழ்நாட்டைச் சேர்ந்த நாகஜோதி, மித்ரா ஆகியோரும் வென்று சாதனை படைத்தனர்.
சென்னையில் நடைபெற்ற ஆசிய கோப்பை கூடைப்பந்து தகுதிச் சுற்று போட்டியில் கஜகஸ்தான் அணிக்கு எதிரான ஆட்டத்தில் 88 - 69 என்ற புள்ளிகணக்கில் வென்று இந்தியா சாதனை படைத்தது. 27 ஆண்டுகளுக்கு பிறகு இந்தியா கஜகஸ்தான் அணியை வீழ்த்தி இச்சாதனையை படைத்தது.
டிசம்பர்: சிங்கப்பூரில் நடைபெற்ற உலக செஸ் சாம்பியன் போட்டியில் நடப்பு சாம்பியனான சீனாவின் டிங் லுரெனை வீழ்த்தி இந்தியாவின் கிராண்ட் மாஸ்டரான தமிழகத்தை சேர்ந்த குகேஷ் முதன்முறையாக உலகச் சாம்பியன் பட்டத்தை வென்றார்.
இளம் வயதில் உலக செஸ் சாம்பியன் பட்டத்தை வென்ற கிராண்ட் மாஸ்டர் குபேஷிற்கு தமிழக அரசு சார்பில் 5 கோடி ரூபாய் பரிசுத்தொகையும், உலக கேரம் தொடரில் மூன்று பிரிவிலும் தங்கப் பதக்கம் என்ற தமிழகத்தை சேர்ந்த காசிமாவிற்கு 1 கோடி பரிசுத் தொகையும், கேரம் போட்டியில் வென்ற நாகஜோதி,மித்ராவிற்கு தலா 50 லட்சம் ரூபாயும் தமிழக அரசு அறிவித்தது.
அஸ்வின் ஓய்வு: அனைத்து வகை சர்வதேச கிரிக்கெட்டில் இருந்தும் தமிழக வீரர் அஸ்வின் தனது ஓய்வு அறிவித்தார். 38 வயதான அஸ்வின் 106 டெஸ்ட் போட்டிகள், 116 ஒரு நாள் போட்டிகளும், 65 டி20 போட்டிகளிலும் விளையாடி மொத்தம் 775 சர்வதேச விக்கெட்டுகளை கைப்பற்றி உள்ளார்.
டெஸ்ட் கிரிக்கெட்டில் மட்டுமே 37 முறை 5 விக்கெட்டுகளை வீழ்த்தி சாதனை படைத்துள்ளார். சர்வதேச கிரிக்கெட்டில் 11 முறை ஆட்டநாயகன் விருது பெற்றிருக்கிறார்.
