நியூயார்க்: உலகக் கோப்பை டி20 (T20 World Cup) தொடரின் 19-வது லீக் போட்டியில், கிரிக்கெட் ரசிகர்களால் ஆவலுடன் எதிர்பார்க்கப்பட்ட இந்தியா - பாகிஸ்தான் போட்டி அமெரிக்காவின் நியூயார்க் நகரில் நடைபெற்றது. மழையால் போட்டி தொடங்க தாமதமான நிலையில், டாஸ் வென்ற பாகிஸ்தான் பவுலிங் தேர்வு செய்தது. முதல் ஓவரில் ஷாகின் அஃப்ரிதி பந்தில் ரோகித் சர்மா சிக்ஸ் அடித்து தனது அதிரடி ஆட்டத்தைத் தொடங்கினார்.
இரண்டாவது ஓவரில் தனக்கு உரித்தான கவர் டிரைவில் பவுண்டரி அடித்து ரன் கணக்கை துவக்கிய கோலி, அதே ஓவரில் உஸ்மான் கானிடம் கேட்ச் கொடுத்து 4 ரன்களுக்கு அவுட்டானார். இதனையடுத்து ரோகித், ஷகின் அஃப்ரிதி பந்தில் ஃபூல் ஷாட் ஆட முயன்று 13 ரன்களுக்கு அவுட்டானார். அடுத்து பண்ட், அக்சர் படேல் ஜோடி அதிரடியாக ஆடியது. முகமது ஆமிரின் 5வது ஓவரில் பண்ட் பவுண்டரிகளாக விளாசினார். இஃப்திகார் ஒவரில் பவுண்டரி அடித்த அக்சர், நசீம் ஷா பந்தில் சிக்ஸ் அடிக்க ஆசைப்பட்டு 20 ரன்களுக்கு போல்டானார்.
தனது அதிரடியைத் தொடர்ந்த பண்ட் ராஃப் வீசிய இன்னிங்ஸின் 9வது ஒவரில் ஹாட்ரிக் பவுண்டரிகள் அடித்தார். மறுமுனையில் சூர்யகுமார் 7 ரன்களுக்கு அவுட்டானார். அடுத்து வந்த ஷிவம் துபே 3 ரன்களுக்கு நசீம் ஷா வீசிய பந்தில் அவரிடமே கேட்ச் கொடுத்து அவுட்டானார்.
அடுத்த ஓவரிலேயே இந்தியா அணிக்கு நம்பிக்கையாக திகழ்ந்த பண்ட் ஆமிர் ஓவரில் தேவையில்லாமல் லாங் ஆனில் சிக்ஸ் அடிக்க ஆசைப்பட்டு 42 ரன்களுக்கு அவுட்டானார். இதனைத் தொடர்ந்து அடுத்த பந்திலேயே ஜடேஜா டக் அவுட்டாக, இந்தியா பேட்ஸ்மேன்கள் திணறத் தொடங்கினர். கடைசி கட்ட ஓவர்களில் அதிரடி காட்டுவார் என எதிர்பார்க்கப்பட்ட பாண்டியா 7 ரன்களில் ஏமாற்றம் அளிக்க இந்தியா அணி 119 ரன்களுக்கு ஆல் அவுட்டானது.
எளிதான இலக்கை விரட்டிய பாகிஸ்தான் அணிக்கு பாபர் அசாம் பவுண்டரியுடன் துவக்கினார். இரண்டாவது ஓவரில் ரிஸ்வான் கொடுத்த சுலபமான கேட்சை ஷிவம் துபே தவறவிட்டார். ஆனால் இன்னிங்ஸின் 4வது ஓவரிலேயே பாபர், 13 ரன்களுக்கு ஸ்லிப்பில் கேட்ச் கொடுத்து பும்ரா ஓவரில் அவுட்டானார். அடுத்த வந்த உஸ்மான், அக்சர் சுழலில் எல்பிடபுள்யூ முறையில் அவுட்டானார்.
ஃபகர் சமான் வந்த வேகத்தில் சிக்சர் அடித்த நிலையில், 13 ரன்களுக்கு அவுட்டானார். இந்திய அணிக்கு ஆபத்தாக திகழ்ந்த ரிஸ்வான் இன்னிங்ஸின் 14வது ஓவரில், பும்ரா பந்தில் 31 ரன்களுக்கு போல்டானார். இந்த விக்கெட் ஆட்டத்தை இந்தியா பக்கம் திருப்பியது. இதற்கடுத்து பாகிஸ்தான் பேட்ஸ்மேன்கள் பவுண்டரி அடிக்க முடியாமல் திணறினர். அடுத்த வந்த ஷதாப் கான் (4), இஃப்திகார் (5) என பேட்டிங்கில் என அடுத்தடுத்து நடையைக் கட்டினர்.
கடைசி ஓவரில் 18 ரன்கள் தேவைப்பட்ட நிலையில், அர்ஷ்தீப் வீசிய பந்தில் இமாத் வசீம் 15 ரன்களில் அவுட்டானார். கடைசி இரண்டு பந்துகளில் 12 ரன்கள் என இருந்த நிலையில் நசீம் ஷா பவுண்டரி அடித்தார். கடைசி பந்தில் 1 ரன் மட்டுமே அடிக்கப்பட்ட நிலையில், இந்தியா அணி 6 ரன்கள் வித்தியாசத்தில் த்ரில் வெற்றி பெற்றது. பும்ரா 14 ரன்கள் கொடுத்து 3 விக்கெட் வீழ்த்தினார்.
பாகிஸ்தான் எளிதாக வெல்ல வேண்டிய போட்டியை சொதப்பலான பேட்டிங்கால் கோட்டைவிட்டது. பும்ரா கடந்த 50 ஓவர் உலகக் கோப்பைப் போட்டி போல, ரிஸ்வான் விக்கேட்டை வீழ்த்தி இந்தியாவிற்கு திருப்புமுனை தந்தார்.
இதையும் படிங்க: அகேல் ஹொசைன் சுழலில் சிக்கிய உகாண்டா.. 38 ரன்களுக்குள் சுருட்டி வெஸ்ட் இண்டீஸ் அபாரம்! - T20 WORLD CUP 2024
