இன்றைய காலக்கட்டத்தில் இளம்தலைமுறையினர் முதல் பெரியவர்கள் சந்திக்கும் முக்கிய பிரச்சனை முடி சம்பந்தப்பட்ட பிரச்சனையாக தான் இருக்கிறது. பள்ளி படிப்பை முடிந்தவுடன் முடியை பின்னி போடும் பழக்கத்தையும் பலர் முடித்துக்கொள்கின்றனர்.
தற்போது, பெரும்பாலானோர் ஃப்ரீ ஹேர், போனிடைல் எனப்படும் குதிரைவால் போட்டு கல்லூரிக்கும், வேலைக்கும் சென்று வருகின்றனர். இதுமட்டுமா? பலரும் தூங்கும் போது கூட கூந்தலை விரித்து போட்டு தூங்குகின்றனர். இப்படியிருக்க, இரவு தூங்கும் முன் முடியை பின்னி கொள்வதால் கிடைக்கும் நன்மைகளை தெரிந்து கொள்ளுங்கள்.
வறட்சியை தடுக்கும்: இரவில், கூந்தலை விரித்து வைத்து தூங்குவது கூந்தலில் உள்ள ஈரப்பதத்தை எடுத்து தலையில் வறட்சியை ஏற்படுத்துகிறது. இதனால், முடி உதிர்வு, பொடுகு போன்ற பிரச்சனைகள் ஏற்படுகின்றன. இரவில், முடியை நன்கு சீவி பின்னி தூங்கும் போது, முடியின் ஈரப்பதம் தக்க வைக்கப்படுகிறது. இதனால், முடி பளபளப்பாகவும் மென்மையாகவும் இருக்கும்.
முடி உதிர்வு பிரச்சனை நீங்கும்: ஃப்ரீ ஹேரில் தூங்கும் போது, முடி சேதமடையும் வாய்ப்புகள் அதிகம். தூங்குவதற்கு முன் முடியை சீவி ஜடை போடுவதால், தலையில் இரத்த ஓட்டம் சீராக நடைபெற்று முடி உதிர்வை தடுக்கும். கூடுதலாக, நிம்மதியான தூக்கத்திற்கு வழி வகுக்கும். ஜடை போடுவதால், முடி ஒன்றோடு ஒன்று உரசாமல் இருந்து, முடி சேதமடைவதை தடுக்கும்.
முகப்பரு நீங்கும்: முகத்தில் பரு ஏற்படுவதற்கு கூந்தலும் ஒரு காரணியாக தான் இருக்கிறது. தூங்கும் போது, முடியை விரித்துவிட்டு தூங்குவதால், முடியில் உள்ள அழுக்கு, பொடுகு, தூசுகள் முகத்தில் படிந்து விடுகின்றன. இதனால், பரு போன்ற சரும பிரச்சனைகள் ஏற்படுகின்றது. முகம் தெளிவாக, பளபளப்பாக இருக்க தூங்கும் போது ஜடை போட்டு தூங்குங்கள்.
கூந்தல் வளர்ச்சி மேம்படும்: தினசரி இரவு, முடியை சீவி பின்னல் போடுவதால் இரத்த ஓட்டம் சீராக நடைபெறும். மற்றும் முடியில் சிக்கல் ஏற்படாமல் இருப்பதால் முடி உதிர்வு பிரச்சனை நீங்கும். அதுமட்டுமல்லாமல், கூந்தலில் வறட்சி ஏற்படுவதை தடுக்கிறது. காலையில், அவசர அவசரமாக கல்லூரிக்கும், வேலைக்கும் கிளம்பி செல்லும் போது கூந்தல் சிக்கல் இல்லாமல் இருக்கும்.
- இது தவிர, தூங்கும் முன் ஜடை போட்டு தூங்கும் போது தலையில் ஈரப்பதம் இல்லாமல் இருப்பதை உறுதி செய்ய வேண்டும். தலைக்கு குளித்த ஈரப்பதத்துடன் முடியை பின்னக்கூடாது.
- முடியில் உள்ள சிக்குகளை நன்கு எடுத்து பின்னல் போட வேண்டும். அதே போல, இறுக்கமாக பின்னிப் போடக்கூடாது.
- இறுதியாக, கூந்தல் பராமரிப்பில் ஆரோக்கியம் மிகவும் முக்கியம். உடலில் நீர்ச்சத்து குறைபாடு இருந்தால், தலையில் வறட்சி ஏற்பட்டு முடி சம்பந்தப்பட்ட பிரச்சனைகளுக்கு வழிவகுக்கும் என்பதை நினைவில் வைத்துக்கொள்ளுங்கள்.
பொறுப்புத் துறப்பு: இங்கு, உங்களுக்கு வழங்கப்படும் அனைத்து தகவல்களும், பரிந்துரைகளும் உங்கள் புரிதலுக்காக மட்டுமே. அறிவியல் ஆராய்ச்சி, ஆய்வுகள், மருத்துவம் மற்றும் சுகாதார நிபுணத்துவ ஆலோசனைகளின் அடிப்படையில் இந்தத் தகவலை நாங்கள் வழங்குகிறோம். இவற்றைப் பின்பற்றும் முன் உங்கள் தனிப்பட்ட மருத்துவரின் ஆலோசனையைப் பெறுவது நல்லது என்பதை குறிப்பிடுகிறோம்
