அமெரிக்கா: அமெரிக்காவில் அதிபர் தேர்தல் நடக்கவுள்ள நிலையில், குடியரசுக் கட்சி வேட்பாளர் ட்ரம்பை எதிர்த்து ஜனநாயக கட்சியின் வேட்பாளர் இந்திய வம்சாவளியைச் சேர்ந்த கமலா ஹாரிஸ் போட்டியிடுகிறார். கடந்த 21ஆம் தேதி அதிபர் தேர்தலில் இருந்து விலகுவதாக தற்போதைய அதிபர் ஜோ பைடன் அறிவித்ததை அடுத்து, அதிபர் வேட்பாளாராக துணை அதிபர் கமலா ஹாரிஸ் அறிவிக்கப்பட்டார்.
இந்தியா உட்பட உலக நாடுகளே இந்த தேர்தலை உற்று நோக்கி வருகிறது. இந்தச் சூழலில், அமெரிக்காவின் முன்னாள் அதிபர் பராக் ஒபாமாவின் ஆதரவு கமலா ஹாரிஸுக்கு கிட்டுமா என்ற கேள்வியும், எதிர்பார்ப்பும் அமெரிக்க மக்களிடையே எழுந்து வந்தது. அதற்கு முற்றுப்புள்ளி வைக்கும் விதமாக, பராக் ஒபாமாவும், அவரது மனைவி மிச்செல் ஒபாமாவும் கமலா ஹாரிஸை தொலைபேசி வாயிலாக தொடர்பு கொண்டு தங்களது ஆதரவையும், பாராட்டுகளையும் தெரிவித்துள்ளனர்.
Earlier this week, Michelle and I called our friend @KamalaHarris. We told her we think she’ll make a fantastic President of the United States, and that she has our full support. At this critical moment for our country, we’re going to do everything we can to make sure she wins in… pic.twitter.com/0UIS0doIbA
— Barack Obama (@BarackObama) July 26, 2024
அதுகுறித்த வீடியோவை தமது எக்ஸ் பக்கத்தில் பகிர்ந்துள்ள ஒபாமா, “கமலா ஹாரிஸை நினைத்து நாங்கள் பெருமைப்படுகிறோம். இது வரலாற்று சிறப்புமிக்கதாக இருக்கும். உங்களது வெற்றிக்காக நானும், மிச்செலும் முடிந்த அனைத்தையும் செய்வோம். அதிபர் அலுவலகத்துக்கு உங்களை அழைத்துச் செல்ல முழு ஆதரவை செலுத்துவோம்'' என அதில் கூறப்பட்டுள்ளது. இதற்கு நன்றி தெரிவித்த கமலா ஹாரிஸ் தேர்தலுக்கு முன்பு உங்களோடு பிரச்சாரம் செய்ய ஆவலாக இருக்கிறேன்'' என கூறினார்.
ஜனநாயக கட்சியைச் சேர்ந்த ஒபாமா அமெரிக்காவின் முதல் கறுப்பின அதிபர் என்ற பெருமையை பெற்றவர். அதே வழியில் துணை அதிபராக உள்ள கமலா ஹாரிஸ் அதிபராக ஒபாமா குடும்பம் தங்களது ஆதரவை தெரிவித்துள்ளது. கமலா ஹாரிஸ் ஜனநாயக தேசிய மாநாட்டிலேயே பெரும்பான்மையான பிரதிநிதிகளின் ஆதரவை ஏற்கனவே பெற்றுள்ளார். இந்த நிலையில், ஒபாமா மற்றும் அவரது மனைவியின் ஆதரவு கமலா ஹாரிஸுக்கு மிகப்பெரிய அங்கீகாரமாகவே பார்க்கப்படுகிறது.
அமெரிக்காவின் அடுத்த அதிபராக கமலா ஹாரிஸ் வரவேண்டும் என்ற ஒபாமாவின் விருப்பத்தின் பிரதிபலிப்பாக இந்த ஆதரவு நிலைப்பாடு உள்ளது. கமலா ஹாரிஸுக்கு ஆதரவாக ஒபாமா பிரச்சாரம் செய்தால் தேர்தலில் அதன் எதிரொலி மிக பெரியதாகவே அமையும்.
இதையும் படிங்க: இஸ்ரேலுக்கு கமலா ஹாரீஸ் வார்னிங்.. "போரை பார்த்துக் கொண்டு சும்மா இருக்க முடியாது" எனப் பேச்சு!
