ஹைதராபாத்: 'சில்வண்டு சிக்கும் சிறுத்தை சிக்காது லே' என்பதற்கு ஏற்ப வீட்டில் ஒரு எலி இருந்தாலும் அது காட்டும் ஆட்டத்தை சொல்வதற்கு வார்த்தைகளே கிடையாது. அந்த ஒரு எலியை விரட்டுவதற்குள் நமது பாடு பெரும்பாடாய் போய்விடுகிறது. நாமும் என்னென்னவோ மருந்துகள், எலிப் பொறி என வாங்கி வைத்தாலும் சிம்பிளி வேஸ்ட் என நமது கண் முன்னாடியே அசால்டாக சுத்திக்கொண்டிருக்கும்.
அப்ப, இந்த எலியை விரட்ட என்ன தான் வழி? என்றால் சில இயற்கை பொருட்களை வைத்து கூட எலிகளை விரட்டலாம் என்கிறது ஓர் சர்வதேச ஆய்வு..அது என்ன வழி? தெரிந்து கொள்ளுங்கள் இந்த செய்தி தொகுப்பில்..
புதினா எண்ணெய் : புதினா எண்ணெயின் வாசனை மனிதர்களுக்கு புத்துணர்ச்சியை அளித்தாலும், அது எலிகளை எரிச்சலூட்டுகிறது. எனவே எலிகளை விரட்ட, ஒரு சிறிய துணியில் சிறிது பெப்பர்மின்ட் எண்ணெயை தடவி எலிகள் நடமாடும் இடங்களில் வைக்கவும். 2 அல்லது 3 நாட்களுக்கு ஒருமுறை இந்த துணியை மாற்றிவருவதால் எலிகள் வராமல் இருக்கும்.
இவற்றுடன், கிராம்பு மற்றும் மிளகு பொடியை எலிகள் நடமாடும் இடங்களில் தூவுவதால் வீட்டில் இருந்து எலிகள் ஓடி விடும் என்கின்றனர். 2012ல்,இன்டர்நேஷனல் ஜர்னல் ஆஃப் பெஸ்ட் கன்ட்ரோல் அண்ட் மேனேஜ்மென்ட்டில் வெளியிடப்பட்ட ஆய்வில், வீடுகளில் இருந்து எலிகளை விரட்டுவதில் பெப்பர்மின்ட் (புதினா) எண்ணெய் பெரும் உதவியை செய்கிறது என தெரிவித்துள்ளது.
பேக்கிங் சோடா: சமையலில் பயன்படுத்தப்படும் பேக்கிங் சோடா எலிகளை விரட்டும் என்கின்றனர் நிபுணர்கள். இதற்கு முதலில் ஒரு கப் மைதாவை எடுத்து, அதில் பெப்பர்மின்ட் ஆயில் மற்றும் பேக்கிங் சோடா சேர்த்து கலக்கவும். இந்த மாவை சிறு சிறு உருண்டைகளாக செய்து வீட்டில் எலிகள் வரும் இடங்களில் வைப்பதால் பலன் கிடைக்கின்றது.
நாப்தலின் உருண்டை: எலிகளுக்கு நாப்தலினின் வாசனை பிடிக்காது என்பதால் இவற்றை நேரடியாக எலிகள் நடமாடும் இடத்தில் வைத்தால் எலிகள் ஓடிவிடும்.
எருக்கு இலைகள்: பொதுவாகவே,எருக்கு இலைகள் வீட்டிலிருந்து பூச்சிகளை விரட்ட உதவுகிறது. எருக்கு இலைகளை எலிகள் நடமாடும் இடத்தில் வைப்பதால் இதன் துர்நாற்றம் தாங்க முடியாமல் எலிகள் வீட்டை விட்டு ஓடிவிடுகின்றன. ஆனால், எருக்கு இலைகளைப் பறிக்கும் போது வெளியேறும் பால் தோல் மற்றும் கண்களில் படாமல் பார்த்துக் கொள்வது அவசியம்.
உருளைக்கிழங்கு பொடி: உருளைக்கிழங்கு பொடியை எலிகள் இருக்கும் இடங்களிலும், நடமாடும் இடங்களிலும் தூவ வேண்டும். எலிகளைக் கவரும் வகையில் சிறிது இனிப்புகளையும் தூளில் சேர்க்கலாம். இந்தப் பொடியை உண்ணும் எலிகள் தண்ணீருக்காக வெளியே வந்து தாகத்தால் இறந்து விடுகின்றன.
பூண்டு: எலிகள் பூண்டின் வாசனைக்கு ஓடி விடுகின்றன. எனவே, பொடியாக நறுக்கிய பூண்டை ஒரு பாட்டில் தண்ணிரில் கலந்து எலிகள் இருக்கும் மூலைகளில் தெளிக்கவும். இப்படி செய்வதால் எலிகள் வராமல் இருக்கும் என்று கூறப்படுகிறது.
பொறுப்பு துறப்பு: இங்கு வழங்கப்பட்ட அனைத்து தகவல்களும் பரிந்துரைகளும் உங்கள் புரிதலுக்காக மட்டுமே. அறிவியல் ஆராய்ச்சி, ஆய்வுகள், மருத்துவம் மற்றும் சுகாதார நிபுணத்துவ ஆலோசனைகளின் அடிப்படையில் இந்தத் தகவலை வழங்குகிறோம். ஆனால், இவற்றைப் பின்பற்றுவதா இல்லையா என்பது உங்கள் தனிப்பட்ட விஷயம்.
இதையும் படிங்க: டிராவலில் வாந்தி வராமல் இருக்க என்ன செய்யலாம்?..சூப்பர் டிப்ஸ் இதோ..!
