சென்னை: இசையமைப்பாளராக திரையுலகில் எண்டரி கொடுத்த விஜய் ஆண்டனி, ரசிகர்களை வைஃப் (Vibe) ஆக்குவதில் வல்லவர். தனது இசையின் மூலம் தனக்கான ரசிகர்களை உருவாக்கியிருக்கும் இவர், 'நான்' படத்தின் மூலம் தமிழ் சினிமாவில் ஹீரோவாக எண்டரி கொடுத்ததை அடுத்து, சலீம், பிச்சைக்காரன் 1,2 மற்றும் கோடியில் ஒருவன் போன்ற நல்ல படங்களை தனது ரசிகர்களுக்கு கொடுத்து வருகிறார்.
இந்நிலையில், தற்போது ஹீரோ, டைரக்டர், எடிட்டர், தயாரிப்பாளர் என அனைத்திலும் சகலகலா வல்லவனாக வலம் வந்துகொண்டு இருக்கிறார். இசையைப் போன்று நடிப்பில் கொடிகட்டி பறக்கவில்லை என்றாலும், வித்தியாசமான கதாப்பாத்திரங்களில் நடித்து, தனக்கான தனி இடத்தை தக்கவைத்துள்ளார் விஜய் ஆண்டனி. இந்நிலையில், தமிழ் புத்தாண்டை முன்னிட்டு கடந்த வாரம் இவர் நடிப்பில் 'ரோமியோ' படம் வெளியானது.
இப்படத்தை விஜய் ஆண்டனி பிலிம் கார்ப்பரேஷன் சார்பில், மீரா விஜய் ஆண்டனி தயாரித்திருந்தார். இயக்குநர் விநாயக் வைத்தியநாதன் இயக்கத்தில் உருவான இப்படம், திரையரங்குகளில் ரசிகர்கள் மத்தியில் நல்ல வரவேற்பை பெற்று வருகிறது. இப்படத்தில் விஜய் ஆண்டனி, தலைவாசல் விஜய், நடிகை மிருணாளினி உள்ளிட்டோர் நடித்துள்ளனர். நகைச்சுவை கலந்த ரொமாண்டிக் காதல் படமாக எடுக்கப்பட்டுள்ள இப்படத்தின் பாடல்கள், ரசிகர்களை வெகுவாக கவர்ந்துள்ளது.
கடந்த வாரம் வெளியான இப்படம் ஓரளவுக்கு ஓடி வரும் நிலையில், தேர்தல் பரபரப்புக்கு மத்தியிலும் ரோமியோ படம் ரசிகர்களை கவர்ந்துள்ளது குறிப்பிடத்தக்கது. இப்படத்தில் வழக்கமான விஜய் ஆண்டனியாக இல்லாமல், கலகலப்பான விஜய் ஆண்டனியை பார்க்க முடிந்ததாக படம் பார்த்த ரசிகர்கள் தெரிவித்துள்ளனர்.
இந்த நிலையில், இப்படம் குறித்து சமூக வலைத்தளங்களில் சில விமர்சனங்கள் எழுந்த நிலையில், சினிமா விமர்சகரான ப்ளூ சட்டை மாறன் கடும் எதிர்மறை விமர்சனங்களை தெரிவித்திருந்தார். அதில், படத்தின் பாடல் தொடங்கி விஜய் ஆண்டனியின் நடிப்பு வரை, குறைவின்றி அனைத்தையும் விமர்சனம் செய்திருந்தார்.
இந்நிலையில், இதற்கு பதிலடி கொடுக்கும் வகையில் விஜய் ஆண்டனி தனது X வலைதள பக்கத்தில், "பல நல்ல படங்களை தவறாக விமர்சித்துக் கொல்லும் புளு சட்டை மாறன் போன்ற சிலருக்கும், இவர்கள் சொல்வதையெல்லாம் உண்மை என நம்பி, ரோமியோ போன்ற பல நல்ல படங்களை கொண்டாடாமல், தமிழ் சினிமாவை குறை சொல்லும் அறிவு ஜீவிகளுக்கும் எனது ஆழ்ந்த அனுதாபங்கள். அன்பு மக்களே, ரோமியோ ஒரு நல்ல படம் போய் பாருங்கள். ரோமியோவை அன்பே சிவம் ஆக்கிடாதீங்க" என தனது ஆதங்கத்தை வெளிப்படுத்தி உள்ளார்.
இதையும் படிங்க: 'அரசியல்வாதிகள் நடிகர் ஆகலாம்; நடிகர்கள் அரசியலுக்கு வரக்கூடாதா?' - நடிகர் விஷால் கேள்வி - Actor Vishal
