சென்னை: தமிழ் திரையுலகில் முன்னணி நடிகரான தனுஷ், தற்போது தமிழ், தெலுங்கு, ஹிந்தி என பல்வேறு மொழிகளில் நடித்து வருகிறார். தமிழில் தனுஷ் இயக்கி, நடித்த அவரது 50வது படமான ராயன் கடந்த மாதம் வெளியாகி பெரும் வரவேற்பைப் பெற்றுள்ளது. மேலும் பாக்ஸ் ஆபிஸில் 100 கோடிக்கு மேல் வசூல் செய்து தனுஷ் திரை வாழ்வில் அதிக வசூல் செய்த படமாக சாதனை படைத்துள்ளது.
ராயன் படத்தில் தனுஷ், துஷாரா விஜயன் ஆகியோர் கதாபாத்திரமும், ஏ.ஆர்.ரஹ்மான் பின்னணி இசையும் ரசிகர்கள் மத்தியில் பாராட்டை பெற்று வருகிறது. இதனைத்தொடர்ந்து தமிழில் அருண் மாதேஸ்வரன் இயக்கும் இசைஞானி இளையராஜாவின் வாழ்க்கை வரலாறு படத்தில் இளையராஜா கதாபத்திரத்தில் நடித்து வருகிறார்.
தெலுங்கில் தனுஷ், சேகர் கம்முலா இயக்கத்தில் குபேரா என்ற படத்தில் நடித்து வருகிறார். இந்த படத்தில் ராஷ்மிகா மந்தனா, நாகார்ஜுனா ஆகியோர் நடிக்கின்றனர். அதேபோல் பாலிவுட்டில் ஆனந்த் எல்.ராய் இயக்கத்தில் தேரே இஷ்க் மெய்ன் என்ற படத்தில் நடிக்கவுள்ளார். முன்னதாக ஆனந்த் எல்.ராய் இயக்கத்தில் தனுஷ் நடித்த ராஞ்சனா, அத்ராங்கி ரே ஆகிய படங்கள் பெரும் வெற்றி பெற்றது குறிப்பிடத்தக்கது.
இந்நிலையில் ஹாலிவுட்டின் பிரபல இயக்குநர்களான ரூஸோ பிரதர்ஸ் இயக்கவுள்ள படத்தில் தனுஷ் நடிக்கவுள்ளதாக தகவல் வெளியாகியுள்ளது. ஏற்கனவே ரூஸோ பிரதர்ஸ் இயக்கத்தில் 'தி கிரே மேன்' என்ற படத்தில் நடித்தார். அடுத்ததாக ரூஸோ பிரதர்ஸ் 'அவெஞ்சர்ஸ் டோம்ஸ்டே' என்ற படத்தை இயக்கவுள்ள நிலையில், அந்த படத்தில் தனுஷ் நடிக்க வாய்ப்புள்ளதாக கோலிவுட் வட்டாரத்தில் கூறப்படுகிறது.
ஈடிவி பாரத் தமிழ் வாட்ஸ்ஆப் சேனலில் இணைய இங்கே கிளிக் செய்யவும்
இதையும் படிங்க: வயநாடு நிலச்சரிவு: பாதிக்கப்பட்ட மக்களுக்கு நடிகர் பிரபாஸ் ரூ.2 கோடி நிதியுதவி - Prabhas donates for wayanad
