சென்னை: திரை இசைக் கலைஞர்கள் சங்கத்தின் தேர்தல், சென்னை வடபழனியில் உள்ள அவர்களது சங்க அலுவலகத்தில் நடைபெற்று வருகிறது. இந்த தேர்தலில் இசை அமைப்பாளர் தீனா மீண்டும் போட்டியிடுகிறார். இது குறித்து அவர் செய்தியாளர்களிடம் கூறியதாவது, “எங்கள் மீது 2, 3 குற்றச்சாட்டு வைத்தார்கள். அசோசியேட் உறுப்பினர்களுக்கு ஏன் உரிமை கொடுத்ததாக கேட்கிறார்கள். நாங்கள் நீதிமன்றத்தில் வாதாடி, நீதிமன்ற அனுமதியுடன்தான் இந்த தேர்தலை நடத்துகிறோம்.
அசோசியேட் உறுப்பினர்களுக்கு உரிமை இருக்கிறது. நான் ஆயுட்கால உறுப்பினர். நான் இறந்து விட்டால், சங்கத்தில் இருந்து 1 லட்சம் ரூபாய் வரும். மருத்துவ உதவிக்கும் சங்கத்தில் 50 ஆயிரம் வரை வாங்கிக் கொள்ளலாம். ஆனால், 660 அசோசியேட் உறுப்பினர்களுக்கு அந்த உரிமை கிடையாது. மிகவும் கஷ்டத்தில் இருந்தார்கள்.
நான் இரண்டு முறை தலைவராக இருந்தபோது அவர்கள் மனுக்களை கொடுத்ததாகவும், முதல் முறையாக கரோனா காலத்தில் செய்ய முடியவில்லை. இரண்டாவது முறை 660 பேருக்கும் ஓட்டு வாங்கி கொடுத்திருக்கிறோம். ஓட்டுரிமை ஏன் கொடுத்தீர்கள் என்று எங்கள் மீது வழக்கு தொடர்ந்தார்கள். அந்த வழக்கில் வெற்றி பெற்று, இன்று சந்தோஷமாக எல்லோரும் வாக்களிக்கிறார்கள். இப்போது எல்லோரும் சமநிலையுடன் நடத்தக்கூடிய தேர்தலாக இருக்கிறது” என்றார்.
பவதாரிணி குறித்த கேள்விக்கு, “பவதாரிணி பெயரில் நாங்கள் பணம் எதுவும் கொடுக்கவில்லை. அது தவறானது. கையெழுத்து போட்டு நிவாரண நிதி வாங்கியதாக குற்றச்சாட்டு சொல்கிறார்கள். நாங்கள் அதையெல்லாம் நீதிமன்றத்தில் கொடுத்து அனுமதி வாங்கிய பிறகுதான் தேர்தல் நடத்த அனுமதி வழங்கப்பட்டது” என்றார்.
மீண்டும் ஏன் தேர்தலில் போட்டியிடுகிறீர்கள் என்ற கேள்விக்கு, “ஏற்கனவே ஒருவர் 11 முறை வரைக்கும் நின்றதாகவும், இந்த முறை தேர்தலில் நிற்க வேண்டிய நிர்பந்தம் இருந்தது. நான் நிற்கவில்லை என்றால், 660 உறுப்பினர்கள் ஓட்டு போட்டிருக்க முடியாது. தைரியமாக போராடி உரிமையை வாங்கி நிற்கிறேன்.
இது எனக்கு சவாலாக இருந்தது. சவாலை போராடி வென்றுள்ளோம். இன்றைக்குதான் கருத்து வேறுபாடு இருக்கும். நாங்களெல்லாம் இசை குடும்பத்தைச் சேர்ந்த சகோதரர்கள். தேர்தல் முடிவுக்குப் பின்னர், எந்த வித மனச்சிக்கலும் எங்களிடம் இருக்காது” என்று கூறினார்.
திரை இசைக் கலைஞர்கள் தேர்தலில் வாக்களிக்க வந்த இசையமைப்பாளர் தேவா செய்தியாளர்களைச் சந்தித்தார். அப்போது அவர், “ரொம்ப நாளுக்கு பிறகு இசைக் கலைஞர்களைச் சந்திக்கும் வாய்ப்பு கிடைத்தது. எல்லாரும் ஓட்டு போட்டார்கள். நானும் காலையில் வந்து எனது வாக்கைச் செலுத்தி விட்டேன்” எனத் தெரிவித்தார்.
இதையும் படிங்க: இசைக் கலைஞர்கள் சங்கத் தேர்தல்; 11 மணி நிலவரப்படி 170 ஓட்டுகள் பதிவு!
